Ĩvuku ya Kelĩ ya Asumbĩ
21 Manase aĩ na myaka 12 yĩla watwʼĩkie mũsumbĩ, na asumbĩkie myaka 55 e Yelusalemu. Inyia wake eetawa Evisiva. 2 Manase eekie kĩla kĩthũku methonĩ ma Yeova, aatĩĩe imanyĩo sya kũthatya sya mbaĩ ila Yeova walũngĩtye ikauma mbee wa andũ ma Isilaeli. 3 Nĩwatũngĩĩie kũndũ kũtũlu kũla Esekia ĩthe wake waanangĩte, na nĩwaakie ithembeo kwondũ wa Mbaali na aseũvya mũtĩ wa ũthaithi,* o tondũ Aavu mũsumbĩ wa Isilaeli weekĩte. Na nĩwakumanĩie nguthu yonthe ya matunĩ na amĩthũkũma. 4 O na nĩwaakie ithembeo nyũmbanĩ ya Yeova, ĩla Yeova waneenete ĩũlũ wayo akasya: “Ngekalasya ĩsyĩtwa yakwa Yelusalemu.” 5 Na nĩwaakie ithembeo kwondũ wa nguthu yonthe ya matunĩ iwanzanĩ ilĩ sya nyũmba ya Yeova. 6 O na nĩwavĩtĩilye mwana wake mwene mwakinĩ; nĩweekaa syama sya ũwe, nĩwamanthaa maũndũ meũmwonyʼa ĩũlũ wa ĩvinda yũkĩte, na nĩwanyuvie andũ ma kũneenanyʼa na maveva na andũ me na mavinya ma kũvuanyʼa ĩvinda yũkĩte. Nĩweekie mũno kĩla kĩthũku methonĩ ma Yeova, nĩ kana amũthatye.
7 Nĩwaiie mũvwʼanano mwasũvye wa mũtĩ wa ũthaithi* ũla waseũvĩtye nyũmbanĩ ĩla Yeova waneeneete na Ndaviti na mwana wake Solomoni, akasya: “Ĩvinda yonthe ngekalasya ĩsyĩtwa yakwa nyũmbanĩ ĩno na Yelusalemu, vala nĩnyuvĩte katĩ wa mbaĩ syonthe sya Isilaeli. 8 Na ndikaatuma ĩngĩ nyaaĩ sya Aisilaeli syanganga kuma nthĩ ĩla nanengie aa-ũmae moo, ĩndĩ nĩ kana ũu wĩthĩwe no nginya maatĩĩe nesa maũndũ onthe ala nameaĩe, Mĩao yonthe ĩla mũthũkũmi wakwa Mose wameaĩe maatĩĩe.” 9 Ĩndĩ mayaaĩwʼa, na Manase aendeea kũmelelũkya, na atuma meka naĩ nene o na kwĩ ila syeekawa nĩ mbaĩ ila Yeova waanangie syauma mbee wa Aisilaeli.
10 Yeova nĩwaneenaa ĩngĩ na ĩngĩ kwĩsĩla athũkũmi make athani, ayasya: 11 “Manase mũsumbĩ wa Yuta nĩwĩkĩte maũndũ aa onthe ma kũthatya; nĩwĩkĩte maũndũ mathũku o na kwĩ Aamoli onthe ala maĩ mbee wake, na nũtumĩte andũ ma Yuta meka naĩ na mĩvwʼanano yake ya kũthatya.* 12 Nũndũ wa ũu, ũũ nĩwʼo Yeova Ngai wa Isilaeli ũkwasya: ‘Nĩngũetee Yelusalemu na Yuta mũisyo mũnene wĩthĩe kĩla ũmwe ũkũwĩwʼa elalakwa nĩ matũ make elĩ. 13 Nĩngũtambũũkya ĩũlũ wa Yelusalemu ũlii wa kũthima ũla watũmĩiwe ĩũlũ wa Samalia na nĩngũtũmĩa o kavilũ kala katũmĩiwe ĩũlũ wa nyũmba ya Aavu, na nĩngũtuta vyũ Yelusalemu, o tondũ mũndũ ũvangũlaa mbakũli ĩkathea na aimĩkulumanyʼa. 14 Nĩngũeka ala matialĩte ma ũtiĩwa wakwa na nĩngũmanengane kw’okonĩ kwa amaitha moo, na makooswa ta mũtavo na kũvenwa syĩndũ syoo nĩ amaitha moo onthe, 15 nũndũ nĩmeekie kĩla kĩthũku methonĩ makwa na nĩmethĩĩtwe mainthatya ĩngĩ na ĩngĩ kuma mũthenya ũla aa-ũmae moo maumie Misili nginya ũmũnthĩ.’”
16 O na ĩngĩ, Manase nĩwetĩkisye mũno nthakame ĩte ĩvĩtyo nginya amyusũsya Yelusalemu kuma mũthya ũmwe nginya ũla ũngĩ, na ũu nĩ vamwe na naĩ yake ya kũtuma andũ ma Yuta mavĩtya kwa kwĩka kĩla kĩthũku methonĩ ma Yeova. 17 Na ngewa ĩla ĩngĩ ya Manase na maũndũ onthe ala weekie na naĩ ila weekie, yo ti mbandĩke ĩvukunĩ ya ngewa ya mavinda ma asumbĩ ma Yuta? 18 Na ĩndĩ Manase akwʼa na athikwa vamwe na aa-ũmae make mũũndanĩ wa nyũmba yake, mũũndanĩ wa Usa; na mwana wake Amoni atwʼĩka mũsumbĩ vandũ vake.
19 Amoni aĩ na myaka 22 yĩla watwʼĩkie mũsumbĩ, na asumbĩkie myaka ĩlĩ e Yelusalemu. Inyia wake eetawa Mesulemethi na aĩ mwĩĩtu wa Alusu ũla watwĩe Yotiva. 20 Amoni nĩwaendeeie kwĩka kĩla kĩthũku methonĩ ma Yeova, o ta Manase ĩthe wake. 21 Nĩwaendeeie kũkinyĩla nzĩanĩ syonthe ila ĩthe wake wakinyĩlaa, na nĩwaendeeie kũthũkũma na kũkumanĩa mĩvwʼanano ya kũthatya ĩla ĩthe wake wathũkũmaa. 22 Kwoou nĩwamũtiie Yeova Ngai wa aa-ũmae make, na ndaakinyĩla nzĩanĩ ya Yeova. 23 Ĩtina, athũkũmi ma Amoni nĩmavangĩthisye mũvango wa kũmũmina na mamũaĩa mũsumbĩ nyũmbanĩ yake mwene. 24 Ĩndĩ andũ ma nthĩ ĩsu mooaa onthe ala mavangĩthisye mũvango wa kũmũmina Mũsumbĩ Amoni, na matwʼĩkĩthya Yosia mwana wake mũsumbĩ vandũ vake. 25 Na ngewa ĩla ĩngĩ ya Amoni, maũndũ ala weekie, yo ti mbandĩke ĩvukunĩ ya ngewa ya mavinda ma asumbĩ ma Yuta? 26 Nĩmamũthikie mbũanĩ yake mũũndanĩ wa Usa, na Yosia mwana wake atwʼĩka mũsumbĩ vandũ vake.