Ĩvuku ya Kelĩ ya Asumbĩ

23 Na ĩndĩ mũsumbĩ aumya mwĩao, na moombanyʼa atumĩa onthe ma Yuta na Yelusalemu. 2 Ĩtina wa ũu, mũsumbĩ ambata nyũmbanĩ ya Yeova e vamwe na aũme onthe ma Yuta, ekali onthe ma Yelusalemu, athembi, na athani, andũ onthe, kuma ũla mũnini nginya ũla mũnene. Na asoma methukĩĩsye ndeto syonthe sya ĩvuku ya ũtianĩo yĩla yeethĩĩtwe nyũmbanĩ ya Yeova. 3 Na mũsumbĩ aũngama ũtee wa kĩla kĩtuĩ na aseũvya* ũtianĩo mbee wa Yeova athanĩte kana akamũatĩĩaa Yeova na kũkwata mĩao yake, molilikanyʼo make, na motwʼĩo make na ngoo yake yonthe na thayũ* wake wʼonthe kwa kwĩanĩasya ndeto sya ũtianĩo ũsu, ila syaandĩkĩtwe ĩvukunĩ yĩu. Na andũ onthe meetĩkĩlana na ũtianĩo ũsu.

4 Na ĩndĩ mũsumbĩ eeaĩa Mũthembi Mũnene Ilikia, athembi ala maĩ ungu wake, na asungi ma mũomonĩ maumye ĩkalũnĩ ya Yeova mĩio yonthe ĩla yaseũvĩtwʼe kwondũ wa Mbaali, kwondũ wa ũla mũtĩ wa ũthaithi,* na kwondũ wa nguthu yonthe ya matunĩ. Na aivĩvĩsya nza wa Yelusalemu ivaũũkonĩ sya Kitiloni, na oosa mũu wasyo atwaa Mbetheli. 5 Na kwoou aveta athembi ma ngai ngeni, ala asumbĩ ma Yuta manyuvĩte nĩ kana matoeeasye nthembo ĩũlũ wa kũndũ kũtũlu ndũanĩ sya Yuta na isionĩ ila syathyũlũlũkĩte Yelusalemu, o na nĩwavetie ala matumaa nthembo itoa kwondũ wa Mbaali, kwondũ wa sua, kwondũ wa mwei, kwondũ wa ikundi sya ndata ila itũmĩawa nĩ asomi ma ndata, na kwondũ wa nguthu yonthe ya matunĩ. 6 Nĩwaumisye ũla mũtĩ wa ũthaithi* nyũmbanĩ ya Yeova na aũtwaa ũtee wa ndũa ya Yelusalemu, Mwandanĩ wa Kitiloni, na aũvĩvĩsya Mwandanĩ wa Kitiloni na aũtumbatumba watwʼĩka kĩtoo na anyaĩĩkya kĩtoo kĩu mbũanĩ ila syathikawa andũ onthe. 7 O na nĩwaomboie nyũmba sya aũme ala maĩ malwaya ma ĩkalũnĩ, ila syaĩ nyũmbanĩ ya Yeova na vala aka matumĩaa maeema ma ũla mũtĩ wa ũthaithi.*

8 Na ĩndĩ aumaalya athembi onthe nza wa ndũa sya Yuta, na avukya kũndũ kũtũlu kũla athembi matumaa nthembo itoa, kuma Ngeva nginya Mbeeli-sieva. O na ĩngĩ, nĩwaomboie kũndũ kũtũlu kũla kwaĩ mũvĩanĩ wa Yosua mũnene wa ndũa, kũla kweethĩawa ngalĩko ya kwʼoko kwa aka mũndũ ailika mũvĩanĩ wa ndũa. 9 Athembi ma kũndũ kũla kũtũlu mayeanĩasya ianda syoo kĩthembeonĩ kya Yeova kĩla kyaĩ Yelusalemu, ĩndĩ nĩmaĩsaa mũkate ũte ĩlawa vamwe na ana-a-asa moo. 10 O na ĩngĩ, nĩwavukisye Tovethi, ĩla yĩ Mwandanĩ wa Ana ma Inomu,* nĩ kana wĩthĩe vai mũndũ ũtonya kũthi vo avĩtĩlye mwana wake kana mwĩĩtu wake mwakinĩ kwondũ wa Moleki. 11 Na nĩwasiĩĩie mbalasi ila asumbĩ ma Yuta mavathĩte kwondũ wa* sua iikalike nyũmbanĩ ya Yeova syĩsĩlĩte kalumunĩ* ka Nathani-meleki, ũla waĩ na ũkũmũ nyũmbanĩ ya mũsumbĩ, kala kaĩ valandanĩ; o na nĩwavĩvisye makasya ma sua na mwaki. 12 O na ĩngĩ, mũsumbĩ nĩwaomboie ithembeo ila asumbĩ ma Yuta maakĩte kĩalanĩ kya kasũmba ka ĩũlũ ka Aasu, o vamwe na ithembeo ila Manase waakĩte iwanzanĩ ilĩ sya nyũmba ya Yeova. Nĩwaitumbatumbangie na anyaĩĩkya kĩtoo kyasyo Mwandanĩ wa Kitiloni. 13 O na mũsumbĩ nĩwavukisye kũndũ kũtũlu kũla kwaĩ mbee wa Yelusalemu na kwaĩ ngalĩko ya ĩtheo ya* Kĩĩma kya Wanangĩko,* kũla Solomoni mũsumbĩ wa Isilaeli waakĩte kwondũ wa Asitolethi ngai nga ya kũthatya ya Asitoni; na kwondũ wa Kemosi ngai ya kũthatya ya Moavi; na kwondũ wa Milikomu ngai ya kũthatya ya Aamimoni. 14 Nĩwatũlangile ituĩ sya ũthaithi na atema mĩtĩ ya ũthaithi* na ausũsya mavĩndĩ ma andũ kũla syaĩ. 15 O na ĩngĩ, nĩwaomboie kĩthembeo kĩla kyaĩ Mbetheli, vala vandũ vatũlu Yelovoamu mwana wa Nevati waseũvĩtye na vakatuma Aisilaeli meka naĩ. Ĩtina wa kũomboa kĩthembeo kĩu kya vandũ vau vatũlu, nĩwavĩvisye vandũ vau vatũlu, na atumbatumba kĩla kĩndũ kyatwʼĩka kĩtoo, na avĩvya ũla mũtĩ wa ũthaithi.*

16 Yĩla Yosia wavĩndũkie na oona mbũa ila syaĩ kĩĩmanĩ, nĩweeaie mavĩndĩ ala maĩ mbũanĩ isu maumwʼe na maivĩvĩwʼa kĩthembeonĩ kĩu, na nũndũ wa ũu, akĩvukya, kwosana na ndeto ya Yeova ĩla yaneenetwe nĩ mũndũ wa Ngai ũla wa w’o, ũla wathanĩte kana maũndũ asu makeekĩka. 17 Na ĩndĩ asya: “Ĩvia yĩĩya ya mbũa ngwona nĩ yakĩ?” Nĩvo ĩndĩ aũme ma ndũa mamwĩie: “Ĩsu nĩ mbũa ya mũndũ wa Ngai ũla wa w’o kuma Yuta, ũla wathanie ĩtambya yĩĩ woosea kĩthembeo kya Mbetheli.” 18 Nake amea: “Mũekei athũmũe. Mũndũ o na wĩva ndakathinyʼe mavĩndĩ make.” Na kwoou mayaathĩny’a mavĩndĩ make, o na mayaathĩnyʼa mavĩndĩ ma ũla mwathani waumĩte Samalia.

19 O na ĩngĩ, Yosia nĩwavetangie nyũmba syonthe sya ũthaithi ila syaĩ kũndũ kũtũlu kũla kwaĩ ndũanĩ sya Samalia, ila asumbĩ ma Isilaeli maakĩte nĩ kana mamũthatye Ngai, na eekana nasyo o ũndũ waĩ aneeka Mbetheli. 20 Na oosa athembi onthe ma kũndũ kũla kũtũlu ala maĩ vau na amathemba ĩũlũ wa ithembeo isu, na avĩvĩsya mavĩndĩ ma andũ ĩũlũ wasyo. Na ĩtina wa ũu, asyoka Yelusalemu.

21 Na ĩndĩ mũsumbĩ eeaĩa andũ onthe, aimea: “Tanĩai Vasaka kwondũ wa Yeova Ngai wenyu o tondũ vaandĩkĩtwe ĩvukunĩ yĩĩ ya ũtianĩo.” 22 Kũyaaĩthĩwa na Vasaka ĩngĩ ta ĩsu kuma mĩthenyanĩ ĩla asili masilanasya Isilaeli kana mĩthenyanĩ yonthe ya asumbĩ ma Isilaeli na asumbĩ ma Yuta. 23 Ĩndĩ mwakanĩ wa 18 wa Mũsumbĩ Yosia, Vasaka ĩsu nĩyatanĩiwe Yelusalemu kwondũ wa Yeova.

24 O na ĩngĩ, Yosia nĩwavetangie vyũ andũ ala maneenanasya na maveva, andũ ala maĩ na mavinya ma kũvuanyʼa ĩvinda yũkĩte, mĩvwʼanano ya telavimu,* mĩvwʼanano ya kũthatya,* na syĩndũ syonthe sya kũthatya ila syaĩ nthĩ ya Yuta na Yelusalemu, nĩ kana eanĩsye ndeto sya ĩla Mĩao, ila syaandĩkĩtwe yĩla ĩvukunĩ mũthembi Ilikia weethĩĩte nyũmbanĩ ya Yeova. 25 Kũyaĩ kwaaĩthĩwa mũsumbĩ ũngĩ take, ũla wamũsyokeie Yeova na ngoo yake yonthe na thayũ* wake wʼonthe na vinya wake wʼonthe, kwosana na Mĩao yonthe ya Mose; o na kũyaaũkĩla ũngĩ take ĩtina wake.

26 Ĩndĩ o na ũu wĩ o vo, Yeova ndaavoovya ũthilĩku wake ũeke kwakanĩa Yuta nũndũ wa maũndũ onthe ma kũthatya ala Manase weekĩte amũthatye. 27 Yeova aisye: “O nayo Yuta nĩngũmĩveta mbee wa ũthyũ wakwa, o tondũ navetie Isilaeli; na nĩngũlea ndũa ĩno nanyuvie, Yelusalemu, na nyũmba ĩno naisye ũũ ĩũlũ wayo, ‘Ĩsyĩtwa yakwa yĩkekalaa vau.’”

28 Na ngewa ĩla ĩngĩ ya Yosia, maũndũ onthe ala weekie, yo ti mbandĩke ĩvukunĩ ya ngewa ya mavinda ma asumbĩ ma Yuta? 29 Mĩthenyanĩ yake Valao Neko mũsumbĩ wa Misili nĩwaendie akomanĩe na mũsumbĩ wa Asuli vakuvĩ na Ũsĩ wa Euvalati, na Mũsumbĩ Yosia aumaala okite nake; ĩndĩ yĩla Neko wamwonie, amũaĩa kũu Mekito. 30 Na kwoou athũkũmi make makua mwĩĩ wake na ĩkasya kuma Mekito nginya Yelusalemu na mamũthika mbũanĩ yake. Na ĩndĩ andũ ma nthĩ ĩsu moosa Yeoaasu mwana wa Yosia mamwĩtĩkĩsya mauta na mamũtwʼĩkĩthya mũsumbĩ vandũ va ĩthe wake.

31 Yeoaasu aĩ na myaka 23 yĩla watwʼĩkie mũsumbĩ, na asumbĩkie myei ĩtatũ e Yelusalemu. Inyia wake eetawa Amutali na aĩ mwĩĩtu wa Yelemia ũla watwĩe Livina. 32 Nĩwambĩĩie kwĩka kĩla kĩthũku methonĩ ma Yeova, aatĩĩe maũndũ onthe ala aa-ũmae make meekie. 33 Valao Neko nĩwamwovie yela kũu Livila nthĩ ya Amathi, nĩ kana aeke kũsumbĩka e Yelusalemu, na ĩndĩ aĩvĩthya andũ ma nthĩ ĩsu vainĩ wa talendi 100* sya vetha na talendi ĩmwe ya thaavu. 34 Eka ũu, Valao Neko nĩwatwʼĩkĩthisye Eliakimu mwana wa Yosia mũsumbĩ vandũ va Yosia ĩthe wake na avĩndũa ĩsyĩtwa yake amwĩta Yeoiakimu; ĩndĩ nĩwoosie Yeoaasu amũtwaa Misili, kũla wesie kũkwʼĩĩa. 35 Yeoiakimu nĩwanengie Valao vetha na thaavu ũsu, ĩndĩ aĩ no nginya aĩvĩthye andũ ma nthĩ ĩsu koti nĩ kana anenge Valao vetha ũla weetĩtye. Nĩwaĩvĩthisye kĩla mũndũ nthĩ ĩsu ndĩvi ĩla yatwʼĩtwe ya vetha na thaavu nĩ kana anenge Valao Neko.

36 Yeoiakimu aĩ na myaka 25 yĩla watwʼĩkie mũsumbĩ, na asumbĩkie myaka 11 e Yelusalemu. Inyia wake eetawa Nzevita na aĩ mwĩĩtu wa Vetaia ũla watwĩe Luma. 37 Nĩwaendeeie kwĩka kĩla kĩthũku methonĩ ma Yeova, aatĩĩe maũndũ onthe ala meekawa nĩ aa-ũmae make.