Ĩvuku ya Kelĩ ya Asumbĩ
5 Yu ĩndĩ, Naamani mũnene wa ita sya mũsumbĩ wa Silia aĩ mũndũũme wĩ nguma na wanengetwe ndaĩa nĩ mwĩai wake, nũndũ Yeova nĩwamũtũmĩĩte kũnenga Silia ũsindi.* Aĩ ngũmbaũ ya kaũ, ĩndĩ aĩ na mangũ.* 2 Ĩvinda yĩmwe, Asilia mavithũkĩĩte amaitha moo o ũndũ meekaa nĩmoosie kelĩtu kamwe kuma nthĩ ya Isilaeli na katwʼĩka mũthũkũmi wa mũka wa Naamani. 3 Na kelĩtu kau keea mũndũ mũka ũsu kathũkũmaa* atĩĩ: “Mwa keka mwĩai wakwa nũthi kũneena na mwathani ũla wĩ Samalia! Ndaema kũmũvosya ũwau wake wa mangũ.” 4 Na kwoou athi* kũneena na vwana wake, na amũtavya kĩla kelĩtu kau kaumĩte Isilaeli kawetie.
5 Na ĩndĩ mũsumbĩ wa Silia asya: “Enda yu! Na nĩngũtũma valũa kwa mũsumbĩ wa Isilaeli.” Na kwoou athi akuĩte talendi ĩkũmi* sya vetha, ilungu 6,000 sya thaavu, na ngũa ĩkũmi. 6 Na atwaĩa mũsumbĩ wa Isilaeli valũa ũsu, wĩ na ndeto ii: “O vamwe na valũa ũũ, nĩnatũma Naamani mũthũkũmi wakwa kũla ũĩ nĩ kana ũmũvosye ũwau wake wa mangũ.” 7 Yĩla mũsumbĩ wa Isilaeli wasomie valũa ũsu oou, nĩwatembũie ngũa syake na asya: “Nyie ko inyie Ngai, ũndũ ndonya kũaa kana kũtangĩĩa thayũ? Nĩkĩ ũtũmie mũndũ ũũ vala nĩĩ, aimbĩa nĩmũvosye ũwau wake wa mangũ! Inywʼĩ ene nĩmwene nesa kana eenda o kũnthokoa.”
8 Ĩndĩ yĩla Elisa mũndũ wa Ngai ũla wa wʼo weewie kana mũsumbĩ wa Isilaeli nũtembũie ngũa syake, vau kwa vau nĩwatũmanie vala ve mũsumbĩ, ayasya: “Nĩkĩ ũtembũie ngũa syaku? Nĩngũkwĩsũva ũmũeke oke vala nĩĩ nĩ kana amanye kana kwa wʼo ve mwathani Isilaeli.” 9 Na kwoou Naamani ooka na mbalasi syake na makasya make ma kaũ na aũngama mũomonĩ wa nyũmba ya Elisa. 10 Ĩndĩ Elisa atũmana vala ũĩ atavwʼe ũũ: “Enda ũthambe mavinda mũonza Ũsĩnĩ wa Yolotani, na mwĩĩ waku nũũseũva ĩngĩ, na nũkwĩthĩwa mũtheu.” 11 Na Naamani athata na ambĩĩa kũthi, ayasya: “Aĩ nyie nĩsũanĩaa ũũ ngoonĩ yakwa, ‘Mwathani ũũ eumaala aũngame vaa nĩĩ na ayĩkaĩla ĩsyĩtwa ya Yeova Ngai wake, na aivyũlya kw’oko kwake kũũ na kũũ ĩũlũ wa mangũ makwa nĩ kana ambosye.’ 12 Syo mbũsĩ sya Ndamasikũ, Avana na Valivali, ti nzeo kwĩ kĩwʼũ kyonthe kĩla kĩ Isilaeli? Yo ndyĩĩ nthambĩa mbũsĩnĩ isu na ndyĩthĩwa mũtheu?” Ĩtina wa ũu, nĩwavĩndũkie na athi athatĩte mũno.
13 Nĩvo ĩndĩ athũkũmi make mamũthengeeie na mamwĩa: “Asa wakwa, ta kethĩwa mwathani ũũ akwĩa wĩke ũndũ wĩ vinya mũno, ndwĩthĩwa wawĩka? Kwoou ti kavaa mũno kwĩthĩwa o akwĩa, ‘Enda ũthambe na ũyĩthĩwa mũtheu’?” 14 Na Naamani eewʼa ũu atheea na eeyĩinda Ũsĩnĩ wa Yolotani mavinda mũonza, kwosana na ũndũ mũndũ wa Ngai ũla wa wʼo wawetete. Na ĩndĩ mwĩĩ wake waseũva ĩngĩ wekala ta wa kamwana kanini, na eethĩwa mũtheu.
15 Ĩtina wa ũu, nĩwasyokie vala ve mũndũ ũsu wa Ngai ũla wa wʼo, e vamwe na onthe ala waĩ namo,* na aũngama mbee wake na asya: “Yu nĩnamanya kana vai vandũ vangĩ ĩũlũ wa nthĩ ve Ngai eka Isilaeli. Na kwoou yu, nĩngũkwĩsũva, osa mũthĩnzĩo* ũũ wĩ kwʼokonĩ kwakwa nyie mũthũkũmi waku.” 16 Ĩndĩ Elisa asya: “Vate nzika, o tondũ Yeova ũla nthũkũmaa* wĩ thayũ, ndiosa mũthĩnzĩo ũũ.” Na Naamani aendeea kũmwĩsũva awose, ĩndĩ ndaaĩtĩkĩla. 17 Mũthya, Naamani asya: “Ethĩwa ti ũu, ĩndĩ, nĩngũkwĩsũva ũmbĩtĩkĩlye nyie mũthũkũmi waku nĩthi na mũthanga wa nthĩ ĩno ũtonya kũkuwa nĩ nyũmbũ ilĩ, nĩkwĩthĩwa nyie mũthũkũmi waku ndikaathembea ngai ingĩ nthembo ya kũvĩvwʼa kana nthembo ingĩ ate o Yeova. 18 Ĩndĩ Yeova naekee mũthũkũmi waku ũndũ ũũ ũmwe: Yĩla mwĩai wakwa walika nyũmbanĩ* ya Limoni nĩ kana akumanĩe ngai yake, etwʼĩĩkaa na kwʼoko kwakwa, na kwoou no nginya o nakwa nĩkumane nyũmbanĩ ya Limoni. Kwoou yĩla nakumana nyũmbanĩ ya Limoni, mwa Yeova nandekeae nyie mũthũkũmi waku nũndũ wa ũu.” 19 Nĩvo ĩndĩ Elisa wamwĩie: “Enda na mũuo.” Na yĩla Naamani waumie vau na aendanga mũendo wĩana ũna, 20 Ngeasi mũthũkũmi wa Elisa mũndũ wa Ngai ũla wa wʼo asya ũũ ngoonĩ yake: ‘Mwĩai wakwa aekana na Naamani ũũ Mũsilia athi ate kwosa kĩla wũkie nakyo. Vate nzika, o tondũ Yeova wĩ thayũ, nĩngũsemba nĩmũatĩĩe na ndyosa kĩndũ kuma kwake.’ 21 Na kwoou Ngeasi asemba aatĩĩa Naamani. Na yĩla Naamani woonie mũndũ okĩte asembete vala ũĩ, auma ĩkasyanĩ yake na amũthaũa na amũkũlya: “Maũndũ nĩ maseo?” 22 Na Ngeasi amwĩa: “Maũndũ nĩ maseo. Vwana wakwa nĩwandũma, aimbĩa, ‘Sisya! Yu tũũneena anake elĩ maumĩte kĩsionĩ kĩ iĩma kya Evilaimu ala methĩawa me amwe ma ana ma athani nĩmooka vala nĩĩ. Nĩngũkwĩsũva, ũmanenge talendi ĩmwe ya vetha na ngũa ilĩ.’” 23 Nake Naamani amwĩa: “Nũseo, osa talendi ilĩ.” Na aendeea kũmwĩsũva ose, na amwĩkĩĩa talendi ilĩ sya vetha mĩvukonĩ ĩlĩ, vamwe na ngũa ilĩ, na ainenga athũkũmi make elĩ, namo mathi mbee wa Ngeasi mamũkuĩe syĩndũ isu.
24 Yĩla mavikie Oveli,* nĩwoosie syĩndũ isu kuma mokonĩ moo, ailikya nyũmba na aeka aũme asu mathi. Mamina kũthi, 25 nĩwasyokie na aũngama mbee wa vwana wake. Na ĩndĩ Elisa amũkũlya: “Wauma va, Ngeasi?” Nake amũsũngĩa amwĩa: “Mũthũkũmi waku nde vandũ ũnathi.” 26 Nĩvo ĩndĩ Elisa wamwĩie: “Yo ngoo yakwa ndĩĩ naku yĩla mũndũ ũsu wumie ĩkasyanĩ yake nĩ kana aũthaũe? Yo yĩĩ nĩ ĩvinda ya kwosa vetha kana kwosa ngũa kana mĩũnda ya mĩthata kana mĩũnda ya mĩsavivũ kana malondu kana ngʼombe kana athũkũmi aũme kana athũkũmi aka? 27 Yu ĩndĩ, ũwau wa Naamani wa mangũ nũũkũkwata na ũkekalaa nawʼo, we na nzyawa syaku tene na tene.” Na vau kwa vau auma mbee wake e na mangũ, e mweũ ta ĩa.