Ĩvuku ya Kelĩ ya Asumbĩ
8 Elisa nĩwaneenie na inyia wa kamwana kala waĩ anathayũũkya* na amwĩa atĩĩ: “Ũkĩla ũthi, we na mũsyĩ waku, mũkekale mwĩ aeni vala mũtonya, nũndũ Yeova nĩwaĩtye kana nĩkũkwĩthĩwa yũa, na yĩĩthĩwa ĩũlũ wa nthĩ ĩno myaka mũonza.” 2 Na kwoou mũndũ mũka ũsu ookĩla na eeka kĩla ũla mũndũ wa Ngai ũla wa wʼo wamũtavisye. Nĩwaendie na mũsyĩ wake na matũa nthĩ ya Avilisiti myaka mũonza.
3 Na myaka mũonza yathela, mũndũ mũka ũsu asyoka kuma nthĩ ya Avilisiti na athi kwĩsũva mũsumbĩ atũngĩwe nyũmba yake na mũũnda wake. 4 Yu ĩndĩ, mũsumbĩ akwetye kũneena na Ngeasi mũthũkũmi wa ũla mũndũ wa Ngai ũla wa wʼo, aimwĩa: “Kwa mbelesye maũndũ onthe manene ala Elisa wĩkĩte.” 5 Na kavindanĩ o kau waendeee kũelesya mũsumbĩ ũndũ Elisa wathayũũkĩtye mũndũ, mũndũ mũka ũla wathayũũkĩwʼe mwana alika kwa mũsumbĩ, ayĩsũvana atũngĩwe nyũmba yake na mũũnda wake. Na Ngeasi amwona oou asya: “Mwĩai wakwa mũsumbĩ, ũũ nĩwe mũndũ mũka ũla ngũwetaa, na ũũ nĩwe mwana wake, ũla Elisa wathayũũkisye.” 6 Na mũsumbĩ akũlya mũndũ mũka ũsu, na amũnenga ngewa yonthe. Na ĩndĩ mũsumbĩ anyuva mũndũ ũmwe waĩ na ũkũmũ nyũmbanĩ yake nĩ kana atetheesye mũndũ mũka ũsu, na amwĩa: “Tũngĩa mũndũ mũka ũũ malĩ yake yonthe na ũsyao wʼonthe ũla umĩte mũũndanĩ wake kuma yĩla waumie nthĩ ĩno nginya yu.”
7 Elisa ookie Ndamasikũ ĩvindanĩ yĩla Mbeni-atati mũsumbĩ wa Silia waĩ mũwau. Na kwoou Mbeni-atati eewa atĩĩ: “Ũla mũndũ wa Ngai ũla wa wʼo nĩwũkie kũũ.” 8 Na kwoou mũsumbĩ eea Aasaeli: “Osa mũthĩnzĩo na ũithi ũkakomane na ũla mũndũ wa Ngai ũla wa wʼo. Mwĩe aneene na Yeova kwondũ wakwa na aikũlya atĩĩ: ‘Nyie nĩngũvoa ũwau ũũ wakwa?’” 9 Aasaeli nĩwaendie kũkomana nake akuĩte mũthĩnzĩo wa syĩndũ syonthe nzeo sya Ndamasikũ, na syĩndũ isu syaĩ mĩio 40 ya ngamĩle. Nĩwaendie na aũngama mbee wake na amwĩa: “Mwana waku, Mbeni-atati mũsumbĩ wa Silia nĩwandũma vala ũĩ, aikũlya atĩĩ: ‘Nyie nĩngũvoa ũwau ũũ wakwa?’” 10 Na Elisa amwĩa: “Enda ũkamwĩe atĩĩ: ‘Vate nzika, nũũvoa.’ Ĩndĩ Yeova nũmbonetye kana ndelea kũkwʼa.” 11 Na ekala amũketeee Aasaeli nginya eewʼa nthoni. Na ĩndĩ mũndũ ũsu wa Ngai ũla wa wʼo ambĩĩa kũĩa. 12 Na Aasaeli amũkũlya: “Mwĩai wakwa, nĩkĩ ũkũĩa?” Na amũsũngĩa amwĩa: “Nũndũ nĩnĩsĩ thĩna ũla ũkaetee andũ ma Isilaeli. Ndũa syoo mbiĩĩe ũkaivĩvya, aũme moo me vinya ũkoaa na ũvyũ, syana syoo ũkaitilanga ilungu, na aka moo aito ũkatembũa mavu moo.” 13 Na Aasaeli asya: “Mũthũkũmi waku, ũla ũkũtalwa ta ngitĩ, atonya ata kwĩka ũndũ ta ũsu?” Ĩndĩ Elisa asya: “Yeova nũmbonetye kana ũkasumbĩka Silia.”
14 Na ĩndĩ auma vala ve Elisa na asyoka kwa mwĩai wake, na mwĩai wake amũkũlya: “Elisa akwĩa ata?” Nake amũsũngĩa: “Andavya kana vate ndĩi nũũvoa.” 15 Ĩndĩ mũthenya ũla waatĩĩe, Aasaeli oosa ĩvula, ayĩinda kĩwʼũnĩ, na ayĩkwatĩĩa* ĩũlũ wa ũthyũ wa mũsumbĩ nginya akwʼa. Na Aasaeli asumbĩka vandũ vake.
16 Mwakanĩ wa katano wa Yeolamu mwana wa Aavu mũsumbĩ wa Isilaeli, yĩla Yeosavati waĩ mũsumbĩ wa Yuta, Yeolamu mwana wa Mũsumbĩ Yeosavati wa Yuta nĩwatwʼĩkie mũsumbĩ. 17 Aĩ na myaka 32 yĩla watwʼĩkie mũsumbĩ, na asumbĩkie myaka nyanya e Yelusalemu. 18 Nĩwakinyĩile nzĩanĩ ya asumbĩ ma Isilaeli, o tondũ ala ma nyũmba ya Aavu meekĩte, nĩkwĩthĩwa atwaĩte mwĩĩtu wa Aavu; na nĩwaendeeie kwĩka kĩla kĩthũku methonĩ ma Yeova. 19 Ĩndĩ Yeova ndendaa kwananga Yuta nũndũ wa Ndaviti mũthũkũmi wake, nĩkwĩthĩwa nĩwamwathĩte kũmũnenga taa, we na ana make mavinda onthe.
20 Mĩthenyanĩ yake, andũ ma Etomu nĩmangʼendeie Yuta, na meeyĩũngamĩsya mũsumbĩ woo. 21 Na kwoou Yeolamu akĩlanĩlya nginya Nzaili e na makasya make onthe, na ookĩla ũtukũ na avithũkĩa Aetomu ala mamũthyũlũlũkĩte vamwe na aũngamĩi ma makasya na amasinda; na asikalĩ makĩĩa maeemanĩ moo. 22 Ĩndĩ Etomu nĩyĩthĩĩtwe ĩingʼendea Yuta nginya ũmũnthĩ. O nayo Livina nĩyaleile kũsumbĩkwa ĩvindanĩ yĩu.
23 Na ngewa ĩla ĩngĩ ya Yeolamu, maũndũ onthe ala weekie, yo ti mbandĩke ĩvukunĩ ya ngewa ya mavinda ma asumbĩ ma Yuta? 24 Na ĩndĩ Yeolamu akwʼa na athikwa vamwe na aa-ũmae make Ndũanĩ ya Ndaviti. Na Aasia mwana wake atwʼĩka mũsumbĩ vandũ vake.
25 Mwakanĩ wa 12 wa Yeolamu mwana wa Aavu mũsumbĩ wa Isilaeli, Aasia mwana wa Mũsumbĩ Yeolamu wa Yuta nĩwatwʼĩkie mũsumbĩ. 26 Aasia atwʼĩkie mũsumbĩ e na myaka 22, na asumbĩkie mwaka ũmwe e Yelusalemu. Inyia wake eetawa Athalia na aĩ mwĩsũkũũe* wa Mũsumbĩ Omili wa Isilaeli. 27 Aasia akinyĩlaa nzĩanĩ ĩla nyũmba ya Aavu yakinyĩlaa na nĩwaendeeie kwĩka kĩla kĩthũku methonĩ ma Yeova, o ta nyũmba ya Aavu, nĩkwĩthĩwa nĩwailenyʼe ũndũ na nyũmba ya Aavu nũndũ nĩkwʼo ĩthe watwaanĩte. 28 Na kwoou athi Lamothi-ngileati e vamwe na Yeolamu mwana wa Aavu nĩ kana makokite na Mũsumbĩ Aasaeli wa Silia, ĩndĩ Asilia mamũũmĩsya Yeolamu. 29 Na kwoou Mũsumbĩ Yeolamu asyoka Yesileeli nĩ kana avoe kũla waũmĩĩtwʼe nĩ Asilia e Lama yĩla wokitaa na Mũsumbĩ Aasaeli wa Silia. Na Aasia mwana wa Yeolamu mũsumbĩ wa Yuta atheea Yesileeli akamwone Yeolamu mwana wa Aavu, nĩkwĩthĩwa aĩ mũũmĩsye.*