Meko ma Atũmwa
3 Na Vetelo na Yoana nĩmambatĩte ĩkalũnĩ, nũndũ yaĩ ĩsaa ya mboya, ta saa kenda, * 2 na mũndũũme ũmwe waĩ mwau mamutha kuma kũsyawa nĩwakuĩtwe. Na kĩla mũthenya nĩmamwiaa vakuvĩ na mũomo wa ĩkalũ ũla wĩtawa Mwanakavye, nĩ kana avoye andũ ala malikaa ĩkalũnĩ mĩthĩnzĩo ya tei. 3 Yĩla woonie Vetelo na Yoana mokĩte kũlika ĩkalũnĩ, nĩwambĩĩe kũmavoya mĩthĩnzĩo ya tei. 4 Ĩndĩ Vetelo na Yoana mamũketeea, na mamwĩa: “Tũsisye.” 5 Nake amaketeea, eteele mamũnenge kĩndũ. 6 Ĩndĩ Vetelo asya: “Vetha kana thaavu, nyie ndi nasyo, ĩndĩ kĩla nĩ nakyo nĩkyo ngũũnenga. Ĩsyĩtwanĩ ya Yesũ Klĩsto Mũnasaleti, ũkĩla ũthi!” 7 Amina kwasya ũu, amũkwata kw’oko kwa aũme na amũkĩlya. Na vau kwa vau maaũ make na maleenyũ ma ngũlimũ syake makwata vinya; 8 na athaanyũka aũngama, na ambĩĩa kũthi na alika ĩkalũnĩ vamwe namo ekinyĩtye, akĩthaanyũkanga na kũmũtaĩa Ngai. 9 Na andũ onthe mamwona ekinyĩtye na aimũtaĩa Ngai. 10 Na nĩmamanyie kana mũndũ ũsu nĩ ũla ũnekalaa mũvĩanĩ wa ĩkalũ ũla wĩtawa Mwanakavye eteele anengwe mĩthĩnzĩo ya tei, na kwoou maseng’a mũno na masaanĩw’a nĩ ũndũ kwĩkĩkie kwake.
11 Na mũndũũme ũsu o aendeee kũmekwatĩla Vetelo na Yoana, andũ onthe masemba mathi vala maĩ maseng’ete mũno, na vo veetawa Valanda wa Solomoni. 12 Na yĩla Vetelo woonie ũu, akũlya andũ asu atĩĩ: “Andũ ma Isilaeli, nĩkĩ ũndũ ũũ watuma mũseng’a mũno wĩana ũu, na nĩkĩ mũtũsyaĩĩsye ta twatuma mũndũ ũũ ambĩĩa kũthi nũndũ wa vinya witũ kana kĩkĩo kitũ kwa Ngai? 13 Ngai wa Avalaamu na wa Isaka na wa Yakovo, Ngai wa aa-ũmae maitũ, nũmũkumĩtye mũthũkũmi wake, Yesũ, ũla mwamũnenganie kwa Vilato na mwamũlea mbee wake, o na kau aĩ anatw’a kũmũthasya. 14 Ĩĩ, nĩmwamũleile ũla mũtheu na mũlũngalu, na mwasya mũnengwe mũndũ waĩ mũaani, 15 na nĩmwamũaie Ũla ũnyuvĩtwe kũnengane thayũ. * Ĩndĩ Ngai amũthayũũkya, na ithyĩ twĩ ngũsĩ sya ũndũ ũsu. 16 Na kwĩsĩla ĩsyĩtwa ya Yesũ, na mũĩkĩĩo witũ ĩsyĩtwanĩ yake, mũndũ ũũ mũkwona na mũmwĩsĩ nĩwakwata vinya. Na mũĩkĩĩo ũla twĩ naw’o nũndũ wa Yesũ, nĩwatuma mũndũũme ũũ avoa vyũ inyw’onthe mwene. 17 Na yu ana-a-asa, nĩnĩsĩ mweekie ũu nũndũ wa kũlea kũmanya, o tondũ atongoi menyu o namo meekie. 18 Ĩndĩ kwa nzĩa ĩsu, Ngai nĩwĩanĩĩtye maũndũ ala waneenie tene kwĩsĩla kanyw’a wa athani onthe, kana Klĩsto wake aĩ athĩnw’e.
19 “Kwoou, ĩlilei na mũialyũka nĩ kana naĩ syenyu ivutwe, na mũikwata ũvuũkyo kuma kwa Yeova mwene * 20 na aimũtũma Klĩsto, ũla ũnyuvĩtwe kwondũ wenyu, nake nĩ Yesũ. 21 Ĩndĩ no nginya Yesũ ekale ĩtunĩ, nginya ĩvinda ya kũtũngĩĩwa kwa syĩndũ syonthe ila Ngai waneenie kwĩsĩla kanyw’a wa athani make ma tene atheu. 22 Kwa w’o, Mose aisye: ‘Yeova Ngai wenyu akamũkĩlĩlya mwathani ũilye takwa kuma katĩ wa ana-a-ĩthe menyu. No nginya mwĩthukĩĩsye maũndũ onthe ala wĩmũtavya. 23 Na vate nzika, mũndũ o na wĩva ũla ũtamwĩthukĩĩasya Mwathani ũsu akaanangwa vyũ kuma katĩ wa andũ.’ 24 Na athani onthe, kwambĩĩa Samueli na ala mamũatĩĩe, ala mathanie, nĩmaeleisye nesa ĩũlũ wa mĩthenya ĩno. 25 Inyw’ĩ mwĩ ana ma athani, na ma ũtianĩo ũla Ngai watianĩie na aa-ũmae menyu. Amwĩie Avalaamu atĩĩ: ‘Na kwĩsĩla ũsyao waku mĩsyĩ yonthe ĩũlũ wa nthĩ ĩkaathimwa.’ 26 Ĩtina wa Ngai kũmũthayũũkya mũthũkũmi wake, nĩwambie kũmũtũma kũla mũĩ nĩ kana amũathime kwa kũalyũla kĩla ũmwe wenyu atie meko make mathũku.”