Valũa wa Mbee kwa Akolintho

4 Mũndũ aĩle kũtwona ta athũkũmi * me ungu wa Klĩsto, na ta aũngamĩi ma nyũmba ma kĩmbithĩ kĩtheu kya Ngai. 2 Ũndũnĩ ũsu, kĩla kyendekaa kwa aũngamĩi ma nyũmba nĩ kwĩthĩawa me aĩkĩĩku. 3 Ĩndĩ ti ũndũ kwakwa kũsilĩlwa ninywʼĩ kana kũsilĩlwa nĩ asili ma andũ. * O nakwa nditonya kwĩsilĩla. 4 Nũndũ ndyĩsĩ ũndũ o na ũmwe mũthũku ĩũlũ wakwa. Ĩndĩ ũu ti kwasya kana nĩ mũlũngalu; ũla ũnzilĩlaa nĩ Yeova. 5 Kwoou mũikasilĩle ũndũ o na wĩva ĩvinda yawʼo yĩte ĩviku, nginya yĩla Mwĩaĩi wĩũka. Nake akaete kyeninĩ maũndũ ala mavithe ma kĩvindu na aituma mosũanĩo ma ngoo mamanyĩka, na ĩndĩ kĩla ũmwe aikwata ũtaĩo wake kuma kwa Ngai.

6 Yu ana-a-asa,  maũndũ aa naneena nĩtũmĩĩte ngelekanyʼo yakwa na Avolo nĩ kana mũunĩke, na kwĩsĩla kwitũ mũyĩmanyĩsya mwĩao ũũ: “Mũikavĩtũke maũndũ ala maandĩke,” nĩ kana mũikethĩwe na mĩtũlyo mũyendeesya ũmwe mbee wa ũla ũngĩ. 7 Nũũ ũla ũtumĩte wĩthĩwa wĩ kĩvathũkanyʼo na ala angĩ? Kwa wʼo, nĩ kyaũ wĩ nakyo ũtaanengwa? Na yu ethĩwa weekie kũnengwa, wĩĩkathĩĩa nĩkĩ ta ũtaanengwa?

8 Yu mwĩ eanĩe? Yu mwĩ athwii? Kana nĩmwambĩĩie kũsumbĩka ta asumbĩ mũte naitũ? Wendi wakwa nĩ ta kethĩwa nĩmwambĩĩie kũsumbĩka ta asumbĩ, nĩ kana o naitũ tũsumbĩke vamwe nenyu. 9 Nũndũ nĩona Ngai ta ũtwiĩte ithyĩ atũmwa ĩtina wa andũ onthe twĩloelwe, ta andũ masilĩlwe kũawa, nũndũ tũtwʼĩkĩte ta andũ me kĩwanzanĩ mekwĩloelwa nĩ nthĩ yonthe, na alaĩka na andũ. 10 Ithyĩ twĩ atumanu nũndũ wa Klĩsto, ĩndĩ inywʼĩ mwĩ oĩ nũndũ wa Klĩsto; ithyĩ twĩ onzu, ĩndĩ inywʼĩ mwĩ na vinya; inywʼĩ nĩmũnengetwe ndaĩa ĩndĩ ithyĩ tũinengetwe ndaĩa. 11 Kũvika saanĩ ũũ, tũendeee kwĩthĩwa na nzaa na waũni na kũtwʼĩkĩwa * na kũvũwa * na kwĩthĩwa tũte na wĩkalo 12 na kũthũkũma wĩa mũmũ, tũitethya wĩa na moko maitũ ene. Twaumangwa nĩtũathimaa, twathĩnwʼa nĩtũmĩĩasya; 13 yĩla twaneenewa naĩ tũsũngĩaa na ũuu; na nginya yu tũtwʼĩkĩte ta mavuti * ma nthĩ, ta kĩko kĩkũlũtĩtwe syĩndũnĩ syonthe.

14 Ndiũmũandĩkĩa maũndũ aa nĩ kana mwĩwʼe nthoni, ĩndĩ nĩ kana nĩmũtae ta syana syakwa ila nendete. 15 Nũndũ o na kau nĩmũtonya kwĩthĩwa na asũvĩi * 10,000 nthĩnĩ wa Klĩsto, mũi na aa-ĩthe aingĩ; nĩkwĩthĩwa nthĩnĩ wa Klĩsto Yesũ nĩnĩtwʼĩkĩte ĩthe wenyu kwĩsĩla ũvoo mũseo. 16 Kwoou, nĩmwĩsũva mũatĩĩe ngelekanyʼo yakwa. 17 Nĩkyo kĩtumi ngũmũtũma Timotheo kũla mũĩ, nũndũ nĩ mwana wakwa mwendwa na mũĩkĩĩku nthĩnĩ wa Mwĩaĩi. Nake akamũlilikanyʼa nzĩa syakwa syonthe sya kwĩka maũndũ nthĩnĩ wa Klĩsto Yesũ, o tondũ nĩmanyĩasya kĩla vandũ ikundinĩ syonthe.

18 Amwe menyu me na mĩtũlyo mayona ta ndeũka kũla mũĩ. 19 Ĩndĩ nĩngũka kũla mũĩ o mĩtũkĩ, Yeova enda, na ndikethĩwa nũkĩte kũmanya ũneeni wa asu me na mĩtũlyo, ĩndĩ vala maumĩtye vinya woo. 20 Nũndũ Ũsumbĩ wa Ngai ti ũneeni ĩndĩ nĩ vinya. 21 Mwĩenda ata? Mwĩenda nũke kwenyu na ndata kana mwĩenda nũke na wendo na nĩ mũuu vevanĩ?