Kũtũngĩlĩĩlwa kwa Mĩao
20 “Ethĩwa nĩmwathi kaũnĩ kũkita na amaitha menyu na mũyona kana mbalasi syoo na makasya moo ma kaũ na ita syoo sya asikalĩ nĩ mbingĩ mũno kwĩ syenyu, mũikamakĩe, nũndũ Yeova Ngai wenyu ũla wamumisye nthĩ ya Misili e vamwe nenyu. 2 Mũkilyĩ kũlika kaũnĩ, mũthembi aĩlĩte kũthengeea na aineena na andũ. 3 Aĩlĩte kũmatavya, ‘Ĩwʼai, inywʼĩ Aisilaeli, mwĩ vakuvĩ kũkita na amaitha menyu. Mũikatũlĩke ngoo. Mũikakĩe kana kũtelema kana kũtetema nũndũ woo, 4 nũndũ Yeova Ngai wenyu aendanĩtye nenyu okite amaitha menyu na aimũtangĩĩa.’
5 “O na ĩngĩ, anene maĩlĩte kũtavya andũ atĩĩ, ‘Nũũ wakĩte nyũmba nzaũ na ndanamba kũmĩlika? Ekai asyoke nyũmbanĩ yake. Aema kwĩka ũu, nũtonya kũkwʼĩĩa kaũnĩ na mũndũ ũngĩ aimĩlika. 6 Na nũũ ũvandĩte mũũnda wa mĩsavivũ na ndanambĩĩa kũya ũsyao wawʼo? Ekai athi na aisyoka mũsyĩ kwake. Nũndũ aema kwĩka ũu, nũtonya kũkwʼĩĩa kaũnĩ na mũndũ ũngĩ ayambĩĩa kũya ũsyao wawʼo. 7 Na nũũ wĩvaĩtye mũndũ mũka na ndanamba kũmũtwaa? Ekai athi na aisyoka mũsyĩ kwake. Nũndũ aema kwĩka ũu nũtonya kũkwʼĩĩa kaũnĩ na mũndũũme ũngĩ aimũtwaa.’ 8 O na ĩngĩ, anene asu maĩlĩte kũkũlya andũ, ‘Nũũ wĩ na wia na ũtũlĩkĩte ngoo? Aĩlĩte kũsyoka mũsyĩ kwake, nĩ kana ndakatume ana-a-ĩthe make matũlĩka ngoo o take.’* 9 Anene mamina kũneena na andũ, maĩlĩte kũnyuva anene ma ita matongoesye andũ.
10 “Ethĩwa nĩmwathengeea ndũa mũkite nayo, mwaĩlĩte kũmĩtangaasĩa maũndũ ala mwaĩle kwĩka mwĩwʼane. 11 Ethĩwa nĩmamũnenga ũsũngĩo wa mũuo na nĩmamũvingũĩa mĩomo, andũ onthe ala meethĩwa vau makatwʼĩka menyu kwondũ wa wĩa wa kũlasimĩthwʼa, na makamũthũkũmaa. 12 Ĩndĩ ethĩwa nĩyalea kwĩwʼana nenyu na vandũ va ũu ĩyambĩĩa kũkita nenyu, mwaĩlĩte kũmĩthyũlũlũka, 13 na vate nzika, Yeova Ngai wenyu akamĩnengane mokonĩ menyu, na no nginya mũae na ũvyũ kĩla mũndũũme wĩ ndũanĩ ĩsu. 14 Ĩndĩ o na ũu wĩ o vo, no mwĩyosee aka, syana, indo, na kyonthe kĩla kĩ ndũanĩ ĩsu, mũtavo wayo wʼonthe, na mũkaya mũtavo wa amaitha menyu, ũla Yeova Ngai wenyu ũmũnengete.
15 “Ũu nĩwʼo mũkekana na ndũa syonthe ila syĩ vaasa vyũ nenyu ila ite sya ndũa sya mbaĩ ii syĩ vakuvĩ nenyu. 16 Ĩndĩ ndũanĩ sya ngo ii sya andũ, ila Yeova Ngai wenyu ũkũmũnenga syĩthĩwe ũtiĩwa, mũikaeke mũndũ o na ũmwe ekale* thayũ. 17 Vandũ va ũu, mwaĩlĩte kũmananga vyũ, Aititi, Aamoli, Akanaanĩ, Avelisi, Aivi, na Ayevusi, o tondũ Yeova Ngai wenyu ũmwĩaĩe; 18 nĩ kana iikamũmanyĩsye kũatĩĩa syĩthĩo syoo syonthe sya kũthatya ila mbaĩ isu syĩkaa ngai syoo, na iituma mũmũvĩtĩsya Yeova Ngai wenyu.
19 “Ethĩwa nĩmwathyũlũlũka ndũa nĩ kana mũmĩkwate na mwĩthĩĩtwe mũyũkita nayo mĩthenya mingĩ, mũyaĩlĩte kwananga mĩtĩ yayo kwa kũmĩtema na ĩthoka. No mũye ũsyao wayo, ĩndĩ mũyaĩlĩte kũmĩtema. Yo nĩmwaĩlĩte kũthyũlũlũka mũtĩ wa kĩthekanĩ o ũndũ mũtonya kũthyũlũlũka mũndũ? 20 No mwanange mũtĩ o ũla mwĩsĩ ndũtũmĩawa kwondũ wa lĩu. No mũũteme na mũyaka wiio wa kũthyũlũlũka ndũa ĩla ĩkũkita nenyu, nginya ĩvalũke.