Kwa Aevelania
2 Nĩkyo kĩtumi nĩ ũndũ wa vata kũmasũvĩa mũno maũndũ ala twĩwʼĩte, nĩ kana tũikese kwelelũka. 2 Ethĩwa ndeto ĩla yaneeniwe kwĩsĩla alaĩka yaĩ ndũmu, na kĩla mũvĩtanyʼa na mũndũ ũte mwĩwi nĩwakwatie ũĩvanĩsyo kwosana na ũsili wa katĩ, 3 tũkavonoka ata ethĩwa nĩtũũvũthĩĩsya ũtangĩĩo ũũ ũnenevete ũu? Nũndũ ũtangĩĩo ũsu wambĩĩie kũtavanwʼa kwĩsĩla Mwĩaĩi waitũ na andũ onthe ala mawĩwie matũĩkĩĩthya kana nĩ wa wʼo, 4 o nake Ngai nĩwaumisye ũkũsĩ vamwe namo kwĩsĩla syama na maũndũ ma ũsengyʼo na mawĩa manene o vamwe na veva mũtheu ũla wanenganiwe kwosana na kwenda kwake.
5 Nĩkwĩthĩwa nthĩ ĩla yũkĩte ndaamĩia ungu wa alaĩka, na nĩyo tũũneena ĩũlũ wayo. 6 Ĩndĩ ve vandũ ngũsĩ ĩmwe yaĩtye: “Mũndũ nĩ kyaũ nĩ kana ũmũlilikane, kana mwana wa mũndũ nĩ kyaũ nĩ kana ũmũsũvĩe? 7 Nĩwamũtwie mũnini kwĩ alaĩka; nĩwamwĩkĩie ngovia ya nguma na ndaĩa, na wamũnyuva ethĩwe ĩũlũ wa wĩa wa moko maku. 8 Nĩwaiie syĩndũ syonthe ungu wa nyaaĩ syake.” Na yĩla waiie syĩndũ syonthe ungu wake, Ngai ndaatia kĩndũ o na kĩmwe kĩte ungu wake. O na kau yu tũikwona syĩndũ syonthe siĩtwe ungu wake. 9 Ĩndĩ nĩtũũmwona Yesũ, ũla watwʼĩkĩthĩtwʼe mũnini kwĩ alaĩka, yu ekĩĩtwe ngovia ya ũnene na ndaĩa nĩkwĩthĩwa nĩwakwie, nĩ kana kwĩsĩla ũseo mwingĩ asame kĩkwʼũ kwondũ wa kĩla ũmwe.
10 Nĩkwĩthĩwa ũla kwondũ wake na kwĩsĩla kwake syĩndũ syonthe syeethĩiwe vo nĩwoonie nĩ ũndũ waĩle, ĩvinda ya kũete ana aingĩ ũtheunĩ mũtisu, amũtwʼĩkĩthye kwĩthĩwa e mwĩanĩu ũla Mũtongoi Mũnene wa ũtangĩĩo woo kwĩsĩla mathĩna. 11 Nũndũ ũla ũkũmathesya na ala meũthewʼa onthe maumĩte kwa ĩthe ũmwe, na kwa kĩtumi kĩu ndewʼaa nthoni kũmeta ana-a-asa, 12 nũndũ aĩtye: “Ngatavanyʼa ĩsyĩtwa yaku kwa ana-a-asa makwa; ngaũtaĩa na mbathi katĩ wa kĩkundi.” 13 O na ĩngĩ aĩtye: “Ngamwĩkwatya.” Na akasyoka akasya: “Sisya! nyie na syana nini ila Yeova wanengie.”
14 Kwoou, nĩkwĩthĩwa “syana nini” nĩ andũ me na mwĩĩ na nthakame, o nake nĩwatwʼĩkie mũndũ wĩ na mwĩĩ na nthakame, nĩ kana kwĩsĩla kĩkwʼũ kyake atonye kũmũmina ũla wĩ na ũtonyi wa kũete kĩkwʼũ, nake nĩ Ndevili, 15 na atonye kũmathasya onthe ala methĩĩtwe ũkombonĩ thayũnĩ woo wʼonthe nũndũ wa kũkĩa kĩkwʼũ. 16 Nũndũ ti alaĩka ũkũtetheesya, ĩndĩ etetheesya ũsyao wa Avalaamu. 17 Na nũndũ wa ũu, yaĩ no nginya ethĩwe ailye ta “ana-a-asa” make maũndũnĩ onthe, nĩ kana atwʼĩke mũthembi mũnene wĩ tei na mũĩkĩĩku maũndũnĩ ala makonetye Ngai, na ayumya nthembo ya wĩwʼanĩthyo kwondũ wa naĩ sya andũ. 18 Na nũndũ we mwene nĩwathĩnie yĩla watatawa, nũtonya kũmatetheesya ala meũtatwa.