Kwa Aevelania

8 Na yu ũũ nĩwʼo ũndũ wa vata ũla tũũweta: Twĩ na mũthembi mũnene ũu, ũla wĩkalĩte kwʼokonĩ kwa aũme kwa kĩvĩla kya ũsumbĩ kya ũla Mũnene ĩtunĩ, 2 nake nĩ mũthũkũmi * wa vala vandũ vatheu na wa yĩla ĩeema ya wʼo, yĩla yaseũviwʼe nĩ Yeova, ĩndĩ ti mũndũ. 3 Nũndũ kĩla mũthembi mũnene anyuvawa nĩ kana aumye mĩthĩnzĩo na nthembo; kwoou yaĩ no nginya ũũ nake ethĩwe na kĩndũ kya kumya. 4 Ta kethĩwa e kũũ nthĩ, ndethĩwa e mũthembi, nũndũ kwĩ andũ ala maumasya mĩthĩnzĩo kwosana na ĩla Mĩao. 5 Andũ asu mathũkũmaa ũthũkũmi mũtheu ta ngelekanyʼo na kyuu kya maũndũ ma ĩtunĩ; o tondũ Mose weaĩwe nĩ Ngai yĩla waĩ vakuvĩ kũseũvya yĩla ĩeema. Ngai amwĩie: “Ĩkĩĩthya kana nĩwaseũvya syĩndũ syonthe kwosana na ngelekanyʼo ĩla wooniwʼe wĩ kĩĩmanĩ.” 6 Ĩndĩ yu Yesũ nũnengetwe ũthũkũmi mũseo mũno * nũndũ nĩwe mwĩwʼanĩthya wa ũtianĩo ũla mũseo, ũla watianĩiwe kwosana na mĩao na wĩ na mawatho maseo.

7 Ta kethĩwa ũtianĩo wa mbee ndwaĩ mavĩtyo, vayĩthĩwa vaĩ na vata wa ũtianĩo ũngĩ. 8 Nũndũ nĩwonanĩtye kana andũ asu me na mavĩtyo yĩla ũkwasya: “‘Sisyai! Mĩthenya nĩyũkĩte,’ easya ũu Yeova, ‘yĩla ngatianĩa ũtianĩo mweũ na nyũmba ya Isilaeli na nyũmba ya Yuta. 9 Ndũkethĩwa ũilye ta ũtianĩo ũla natianĩe na aa-ũmae moo mũthenya ũla nakwatie kwʼoko kwoo na kũmaumya nthĩ ya Misili, nũndũ mayaatĩĩa ũtianĩo wakwa, na kwoou nĩnaekie kũmasũvĩa,’ easya ũu Yeova.

10 “‘Nũndũ ũũ nĩwʼo ũtianĩo ũla ngatianĩa na nyũmba ya Isilaeli ĩtina wa mĩthenya ĩsu,’ easya ũu Yeova. ‘Ngeekĩa mĩao yakwa ilĩkonĩ syoo na ngamĩandĩka ngoonĩ syoo. Na ngatwʼĩka Ngai woo, namo makatwʼĩka andũ makwa.

11 “‘Na maikamanyĩanyʼa ĩngĩ mũndũ na ũngĩ wa nthĩ yake na mũndũ na mwana-a-ĩthe, makyasya: “Mũmanye Yeova!” Nũndũ onthe makamanya nyie, kuma ũla mũnini kũvika ũla mũnene vyũ katĩ woo. 12 Nĩkwĩthĩwa ngamewʼĩa tei nũndũ wa meko moo mate malũngalu, na ndikalilikana naĩ syoo ĩngĩ.’”

13 Kwa kũweta “ũtianĩo mweũ,” eonanyʼa kana nũvetete ũla mũkũũ. Na yu kĩla kĩvetetwe na kĩendeee na kũkũa kĩ vakuvĩ kũthela vyũ.