Yosua
12 Yu ĩndĩ, aa nĩmo asumbĩ ma nthĩ ĩla Aisilaeli makĩlilye vinya, nthĩ ĩla mameisye ngalĩko ya wumĩlonĩ wa sua ya Yolotani, kuma Mwandanĩ wa* Alinoni nginya Kĩĩmanĩ kya Elimoni na kĩsio kyonthe kya Alava kwelekela wumĩlonĩ wa sua: 2 Mũsumbĩ Sioni wa Aamoli, ũla watwĩe Esivoni na wasumbĩkĩte kuma ndũanĩ ya Aloeli, ĩla yaĩ ũtumonĩ wa Mwanda wa* Alinoni, na kuma katĩkatĩ wa mwanda ũsu nginya Mwandanĩ wa* Yavoki, ũla waĩ mũvaka wa Aamimoni. Asumbĩkĩte nusu ya Ngileati. 3 O na ĩngĩ, nĩwasumbĩkĩte kĩsio kya Alava ngalĩko ya wumĩlonĩ wa sua nginya Ũkanganĩ wa Kinelethi,* na kũthi nginya Ũkanganĩ wa Alava, nawʼo nĩ Ũkanga wa Mũnyũ,* ngalĩko ya wumĩlonĩ wa sua kwelekela Mbethi-yesimothi, na kwelekela ngalĩko ya ĩtheo kũkuumana na ivaũũko sya Visika.
4 O na ĩngĩ, Aisilaeli nĩmoosie kĩsio kya Mũsumbĩ Oku wa Mbasani, ũla waĩ ũmwe katĩ wa Alevai ma mũthya ala matialĩte. Ekalaa Asitalothi na Etilei 5 na asumbĩkĩte Kĩĩmanĩ kya Elimoni, Saleka, na kĩsio kyonthe kya Mbasani, nginya mũvakanĩ wa Angesuli na Amaaka, na nĩwasumbĩkĩte nusu ya Ngileati, kũvika mũvakanĩ wa kĩsio kya Mũsumbĩ Sioni wa Esivoni.
6 Mose mũthũkũmi wa Yeova vamwe na Aisilaeli nĩmamakĩlilye vinya, na ĩtina wa ũu, Mose mũthũkũmi wa Yeova nĩwanengie Aleũveni, Angati, na nũsu ya mbaĩ ya Manase nthi yoo mamĩmesye.
7 Aa nĩmo asumbĩ ma nthĩ ĩla Yosua na Aisilaeli makĩlilye vinya ngalĩko ya ũthũĩlonĩ wa sua ya Yolotani, kuma Mbaali-ngati Mwandanĩ wa Levanoni nginya Kĩĩmanĩ kya Alaki, kĩla kyambatĩte kĩsianĩtye na Seili, na ĩtina wa kũmasinda, Yosua nĩwanengie mbaĩ sya Isilaeli nthĩ yoo imĩmesye kwosana na ũndũ syaaĩwe, 8 nayo yaĩ kĩsio kĩla kĩ iĩma, kĩsio kya Sevela, kĩsio kya Alava, ivaũũkonĩ, weũnĩ, na kĩsio kya Nekevu; nthĩ ĩsu yaĩ ya Aititi, Aamoli, Akanaanĩ, Avelisi, Aivi, na Ayevusi. Kwoou asumbĩ asu maĩ aa:
9 Mũsumbĩ ũmwe wa Yeliko; mũsumbĩ ũmwe wa Ai, ĩla yaĩ ũtee wa Mbetheli;
10 mũsumbĩ ũmwe wa Yelusalemu; mũsumbĩ ũmwe wa Eviloni;
11 mũsumbĩ ũmwe wa Yalimuthi; mũsumbĩ ũmwe wa Lakisi;
12 mũsumbĩ ũmwe wa Ekiloni; mũsumbĩ ũmwe wa Ngeseli;
13 mũsumbĩ ũmwe wa Ndevilu; mũsumbĩ ũmwe wa Ngeteli;
14 mũsumbĩ ũmwe wa Olima; mũsumbĩ ũmwe wa Alati;
15 mũsumbĩ ũmwe wa Livina; mũsumbĩ ũmwe wa Atulamu;
16 mũsumbĩ ũmwe wa Maketa; mũsumbĩ ũmwe wa Mbetheli;
17 mũsumbĩ ũmwe wa Tavua; mũsumbĩ ũmwe wa Eevieli;
18 mũsumbĩ ũmwe wa Aveki; mũsumbĩ ũmwe wa Lasaloni;
19 mũsumbĩ ũmwe wa Matoni; mũsumbĩ ũmwe wa Asoli;
20 mũsumbĩ ũmwe wa Similoni-meloni; mũsumbĩ ũmwe wa Akisavu;
21 mũsumbĩ ũmwe wa Taanaki; mũsumbĩ ũmwe wa Mekito;
22 mũsumbĩ ũmwe wa Ketesi; mũsumbĩ ũmwe wa Yokineamu kũu Kalimeli;
23 mũsumbĩ ũmwe wa Ndoli, ĩla yaĩ ivaũũkonĩ sya Ndoli; mũsumbĩ ũmwe wa Ngoiimu kũu Ngilikali;
24 mũsumbĩ ũmwe wa Tilisa; ũtalo wʼonthe wa asumbĩ asu waĩ 31.