Yosua

8 Na ĩndĩ Yeova amwĩa Yosua: “Ndũkakĩe kana ũteleme. Endanyʼa na aũme onthe ma kaũ mũkite na Ai. Na sisya, nĩnĩnenganĩte mokonĩ maku mũsumbĩ wa Ai, andũ make, ndũa yake, na nthĩ yake. 2 O ũndũ weekanie na Yeliko na mũsumbĩ wayo nowʼo ũkwĩkana na Ai na mũsumbĩ wayo, ate o yu no mwĩyosee mũtavo ũla mũkumya Ai vamwe na indo syoo. Ia aũme mamoveesye ĩtina wa ndũa.”

3 Na kwoou Yosua na aũme onthe ma kaũ mathi kũkita na Ai. Yosua anyuvie ngũmbaũ syĩ vinya 30,000 na aitũma na ũtukũ. 4 Na ameaĩa ũũ: “Mwaĩlĩte kũmoveesya ĩtina wa ndũa. Mũikathi vaasa mũno na ndũa, na inywʼonthe ĩkalai mwĩyũmbanĩtye. 5 Nĩngũthengeea ndũa nĩ na andũ ala angĩ onthe ngwĩthĩwa namo, na yĩla mekumaala moke kũkita naitũ ta tene, twĩvĩndũka tũsembe tũmakĩĩte. 6 Na matũsembanyʼa, nĩtũũsemba nĩ kana tũtume mathi vaasa na ndũa, nũndũ meĩthĩwa mayasya, ‘Masyokete matũkĩĩte o ta ĩvinda yĩla yĩngĩ.’ Na nĩtũkũendeea kũsemba tũmakĩĩte. 7 Ĩtina wa ũu, nenyu mwĩũkĩla vala mũmoveesye na mũikwata ĩ ndũa; Yeova Ngai wenyu nũkũmĩnengane mokonĩ menyu. 8 Na mwakwata ndũa ĩsu oou, mĩvĩvyei. No nginya mwĩke o kĩla Yeova ũwetete. Ũu nĩwʼo namwĩaĩa.”

9 Na ĩndĩ Yosua amaeka mathi, na mathi me nguthu nginya vala maaĩlĩte kũmoveesya; na kĩla ũmwe aũngama vandũ vake katĩkatĩ wa Mbetheli na Ai, ngalĩko ya ũthũĩlonĩ wa sua ya Ai, nake Yosua akomela kambinĩ na andũ ala angĩ.

10 Na Yosua aamũka ũnĩ wake kwakya tene na oombanyʼa nguthu sya asikalĩ, na ĩndĩ e vamwe na atumĩa ma Isilaeli mamatongoesya nginya Ai. 11 Na aũme onthe ma kaũ ala maĩ vamwe nake mathi me nguthu nginya mbee wa ndũa ya Ai na mamba kambi masianĩtye nayo. Mambie kambi ngalĩko ya ĩũlũ ya ndũa ĩsu, na mwanda waĩ katĩkatĩ woo na Ai. 12 Kavindanĩ o kau, aĩ anoosa aũme ta 5,000 na akamea moveesye katĩkatĩ wa Mbetheli na Ai, ngalĩkonĩ ya ũthũĩlonĩ wa sua ya ndũa ĩsu. 13 Na andũ mamba kambi ĩla nene ngalĩko ya ĩũlũ ya ndũa ĩsu na maia nguthu ĩla yamasesee ĩtina ngalĩko ya ũthũĩlonĩ wa sua ya ndũa ĩsu, na ũtukũ ũsu Yosua athi katĩkatĩ wa ũla mwanda.*

14 Na yĩla mũsumbĩ wa Ai wamwonie oou, aumaala e vamwe na aũme ma ndũa kwakya tene mekalaatĩte makomanĩe na Isilaeli kĩsionĩ kyasianĩtye na yĩla yalata ĩtindimalu nĩ kana mokite namo. Ĩndĩ ndeesĩ kana ve nguthu yamwoveesye ngalĩko ya ĩtina ya ndũa ĩsu. 15 Na yĩla aũme ma Ai mamavithũkĩie, Yosua na Aisilaeli onthe masemba na lelũ melekele weũnĩ. 16 Nĩvo ĩndĩ andũ onthe ala maĩ ndũanĩ meeiwe mamasembanyʼe; na o ũndũ maendeeie kũsembanyʼa Yosua, nowʼo maendeeie kũthi vaasa na ndũa. 17 Vai mũndũũme o na ũmwe watiĩtwe Ai na Mbetheli ũtaaumaala asembanyʼe Aisilaeli. Matiie mũvĩa wa ndũa wĩ mũvingũe na masembanyʼa Aisilaeli.

18 Na ĩndĩ Yeova amwĩa Yosua: “Tambũũkya mũsenge ũla wĩ kwʼokonĩ kwaku welekele Ai, nũndũ nĩngũmĩnengane kwʼokonĩ kwaku.” Na Yosua atambũũkya mũsenge ũla waĩ kwʼokonĩ kwake kwelekela ndũa ĩsu. 19 Na yĩla watambũũkisye kwʼoko kwake oou, nguthu ĩla yooveesye yookĩla na mĩtũkĩ kuma vala yaĩ na yasemba ndũanĩ na yamĩkwata. Na vau kwa vau makwatya ndũa ĩsu mwaki.

20 Yĩla aũme ma Ai mavĩndũkie masisya ĩtina, nĩmoonie syũki ya ndũa yambatĩte nginya matunĩ, na mayaĩ na vinya wa kũsemba ngalĩko o na ĩmwe. Na ĩndĩ andũ ala masembete melekele weũnĩ mavĩndũkĩa ala mamasembanĩtye. 21 Na yĩla Yosua na Aisilaeli onthe moonie kana aũme ala mooveesye nĩmakwata ndũa na moona syũki ya ndũa yambatĩte, nĩmavĩndũkie na mambĩĩa kũkita aũme ma Ai. 22 Na ala maĩ ndũanĩ maumaala makomane namo, na nũndũ wa ũu, aũme ma Ai makitanĩwʼa vau katĩkatĩ, Aisilaeli amwe me ngalĩko ĩno na ala angĩ me ngalĩko ĩya ĩngĩ, na mamakũna nginya matia vate ũmwe wĩ thayũ kana ũnavonoka. 23 Ĩndĩ nĩmakwatie mũsumbĩ wa Ai e thayũ na mamũtwaa vala ve Yosua.

24 Aisilaeli nĩmooaĩe ekali onthe ma Ai weũnĩ kũla mamaatĩĩe; nĩmamoaie onthe na ũvyũ nginya ũla wa mũthya, na ĩndĩ Aisilaeli onthe masyoka Ai na mamĩkũna na ũvyũ. 25 Andũ onthe ma Ai ala mooaiwe mũthenya ũsu, aũme na aka, maĩ 12,000. 26 Yosua ndaatũnga kwʼoko kũla watambũũkĩtye mũsenge nakwʼo nginya yĩla waĩkĩĩthisye kana ekali onthe ma Ai nĩmaminwa vyũ. 27 Ĩndĩ Aisilaeli nĩmeeyoseie indo na mũtavo kuma ndũanĩ ĩsu, o tondũ Yeova wamwĩaĩe Yosua.

28 Na ĩndĩ Yosua avĩvya Ai na amĩtwʼĩkĩthya mbumbu na ĩanzo yĩtakatũwa ĩngĩ, na ũu nĩwʼo yĩilye nginya ũmũnthĩ. 29 Na Yosua asũsya mũsumbĩ wa Ai mũtĩnĩ nginya ĩ ya wĩoo, na sua yĩkilyĩ kũthũa, asya mwĩĩ wake umwʼe mũtĩnĩ ũsu. Na ĩndĩ mawĩkya mũvĩanĩ wa ndũa na mawũmbĩĩa mbumbu nene ya mavia, na mbumbu ĩsu yĩ vau nginya ũmũnthĩ.

30 Ĩvinda yĩu nĩwʼo Yosua wamwakĩie Yeova Ngai wa Isilaeli kĩthembeo Kĩĩmanĩ kya Evali, 31 o tondũ Mose mũthũkũmi wa Yeova wameaĩe Aisilaeli na o tondũ vaandĩkĩtwe ĩvukunĩ ya Mĩao ya Mose: “Seũvyai kĩthembeo kya mavia mate matile na matasĩtwe na mũio wa kyũma.”* Vau nĩ vo mamũthembeie Yeova nthembo sya kũvĩvwʼa vamwe na nthembo sya ngwatanĩo.

32 Na ĩndĩ aumĩĩsya mavianĩ asu Mĩao ĩla Mose waandĩkĩte mbee wa Aisilaeli. 33 Ĩvindanĩ yĩu, Aisilaeli onthe, atumĩa moo, anene moo, na asili moo maũngamĩte ngalĩko syelĩ sya yĩla Ĩsandũkũ me mbee wa athembi Alivai ala makuĩte ĩsandũkũ ya ũtianĩo wa Yeova. Ekali ma ũeninĩ maĩ vo, o vamwe na ala masyaĩtwe nĩ Aisilaeli. Nusu ĩmwe yaũngamĩte mbee wa Kĩĩma kya Ngelisimu, na nusu ĩla ĩngĩ ĩkaũngama mbee wa Kĩĩma kya Evali (o tondũ Mose mũthũkũmi wa Yeova weeĩaĩte), nĩ kana andũ ma Isilaeli maathimwe. 34 Ĩtina wa ũu, nĩwasomie na wasya ndeto syonthe sya ĩla Mĩao, moathimo na iumo ila syaandĩkĩtwe, kwosana na maũndũ onthe ala maandĩkĩtwe ĩvukunĩ ya Mĩao. 35 Vai ndeto o na ĩmwe katĩ wa ndeto syonthe ila Mose weeĩaĩe andũ Yosua ũtaasoma na wasya mbee wa ũmbano wʼonthe wa Isilaeli, o vamwe na aka na syana na ekali ma ũeninĩ ala mekalaa* katĩ wa Aisilaeli.