Valũa wa Mbee wa Vetelo

5 Kwoou, nũndũ o nakwa nĩ mũtumĩa, na nĩ ngũsĩ ya mathĩna ala mamũkwatie Klĩsto, na nĩ ũmwe wa ala makakwata ũtheu mũtisu ũla ũkavuanw’a, nĩmesũva atumĩa ala me katĩ wenyu: 2 Sũvĩai ĩĩthya ya Ngai yĩla yĩ ungu wa ũsũvĩo wenyu, mwĩ asyaĩĩsya, na ti kwa kũthing’ĩĩw’a, ĩndĩ na ngenda methonĩ ma Ngai; mũte kwenda kwĩyĩuna ene, ĩndĩ mwĩke ũu na mea; 3 mũte kwĩnenevya ĩũlũ wa ala Ngai ũtw’ĩte ũtiĩwa wake, ĩndĩ mwĩthĩwe ngelekany’o kwa ĩĩthya. 4 Na yĩla mũĩthi ũla mũnene wĩumĩlw’a, mũkakwata ngovia ĩtanangĩkaa ya ũtheu mũtisu.

5 O ta ũu, inyw’ĩ aũme ma mũika, ĩnyivĩsyei atumĩa. Kĩla ũmwe nĩ evw’ĩke wĩnyivyo kwelekela ũla ũngĩ, nĩkwĩthĩwa Ngai nũmavĩngaa ala me mĩng’athĩlĩĩlyo, ĩndĩ nũmonasya ũseo mwingĩ ala me na wĩnyivyo.

6 Kwoou ĩnyivyei ungu wa kw’oko kwĩ vinya kwa Ngai, nĩ kana emũnenevya ĩvinda yĩla yaĩlĩte yavika, 7 na mũimwiĩa kwĩmakĩa kwenyu kw’onthe, nũndũ nũmũthĩnĩkĩaa. 8 Sũvĩai ilĩko syenyu, ĩkalai mwĩ metho! Mũmaitha wenyu Ndevili aendaa kũũ na kũũ ta mũnyambũ ũkũluma, aimantha mũndũ amelye. 9 Ĩndĩ mũsiĩĩei mwĩ alũmu mũĩkĩĩonĩ, mũimanya kana mathĩna o asu nomo makwataa ana-a-asa menyu onthe ĩũlũ wa nthĩ. 10 Ĩndĩ ĩtina wa kũthĩna ĩvinda ĩnini, Ngai wa ũseo mwingĩ w’onthe, ũla wamwĩtie mũlike ũtheunĩ wake mũtisu wa tene na tene mwĩ ngwatanĩo vamwe na Klĩsto, akamũmanyĩsya vyũ. Akatuma mwĩthĩwa alũmu, akatuma mwĩthĩwa na vinya, na akamũlũlũmĩlya vyũ. 11 Vinya nĩ wake tene na tene. Ameni.

12 Namũandĩkĩa na ndeto mbũthũ kwĩsĩla Silivano, * nake nĩ mwana-a-asa nonaa e mũĩkĩĩku, nĩ kana nĩmwĩkĩe inyw’ĩ vinya na kũmũĩkĩĩthya kana ũũ nĩw’o ũseo mwingĩ wa Ngai. Ũngamai mwĩ alũmu nthĩnĩ waw’o. 13 Mũndũ mũka * ũla wĩ Mbaviloni, ũla ũnyuvĩtwe o tenyu, nĩwamũkethya, o na Maliko mwana wakwa nĩwamũkethya. 14 Kethany’ai na ngethi ya wendo.

Inyw’onthe ala mwĩ ngwatanĩo vamwe na Klĩsto, ĩthĩwai na mũuo.