Ũvuanyʼo kwa Yoana

15 Na noona wonanyʼo ũngĩ ĩtunĩ, mũnene na wa kũsengyʼa, alaĩka mũonza me na mothĩnyʼo mũonza. Asu nĩmo ma mũthya, nũndũ kwĩsĩla mo ũthatu wa Ngai ũkathela.

2 Na noona kĩndũ kĩilye ũkanga wa kĩoo ũvulanĩte na mwaki, na ala masindie ĩla nyamũ ya kĩthekanĩ na mũvwʼanano wayo na namba ya ĩsyĩtwa yayo maũngamĩte ũtee wa ũla ũkanga wa kĩoo, makwete mbeve sya Ngai. 3 Na mainaa wathi wa Mose, ĩla ngombo ya Ngai, na wathi wa kala Kalondu, makyasya:

“Mawĩa maku nĩ manene na ma ũsengyʼo, Yeova Ngai, Mwene Vinya Wʼonthe. Nzĩa syaku nĩ sya ũlũngalu na sya wʼo, Mũsumbĩ wa tene na tene. 4 Nũũ ũla ũtakakũkĩa, we Yeova, na kũkumya ĩsyĩtwa yaku, nũndũ nue weka mũĩkĩĩku? Nũndũ mbaĩ syonthe ikooka na kũthaitha mbee waku, nĩkwĩthĩwa mĩao yaku mĩlũngalu nĩvuanĩtwʼe.”

5 Ĩtina wa maũndũ asu noona vala vandũ vatheu va ĩeema ya ũkũsĩ vaivingũwa ĩtunĩ, 6 na alaĩka mũonza ala me na ala mothĩnyʼo mũonza mauma vala vandũ vatheu, mekĩĩte ngũa ya katane ntheu ĩkũtisatisa na makeyova mĩsivi ya thaavu ithũinĩ syoo. 7 Na ũmwe wa ila syũmbe inya syĩ thayũ anenga ala alaĩka mũonza mbakũli mũonza sya thaavu syusũĩte ũthatu wa Ngai, ũla wĩkalaa tene na tene. 8 Na vala vandũ vatheu vausũa syũki nũndũ wa ndaĩa ya Ngai na nũndũ wa vinya wake, na vaiĩ mũndũ waĩ atonya kũlika vandũ vau vatheu nginya ala mothĩnyʼo mũonza ma ala alaĩka mũonza mathele.