Ĩvuku ya Mbee ya Samũeli

27 O na ũu wĩ o vo, Ndaviti aisye ngoonĩ yake atĩĩ: “Mũthenya ũmwe, kwʼoko kwa Saũlo kũkambũaa. Ũndũ ũla mũseo naĩle kwĩka nĩ kũkĩĩa nthĩ ya Avilisiti; na ĩndĩ Saũlo akaeka kũmantha kĩsionĩ kyonthe kya Isilaeli, na ngavonoka kuma kwʼokonĩ kwake.” 2 Kwoou Ndaviti ookĩla e na aũme 600 ala maĩ nake na mainga kwa Akisi mwana wa Maoki, mũsumbĩ wa Ngathi. 3 Ndaviti nĩwekalile na Akisi kũu Ngathi, we na aũme make, kĩla mũndũũme e vamwe na mũsyĩ wake. Ndaviti aĩ na iveti syake ilĩ, Ainoamu wa Yesileeli na Avikaili, ũla waĩ Mũkalimeli, kĩveti ndiwa kya Navali. 4 Yĩla Saũlo wataviwʼe kana Ndaviti aĩ anasemba akakĩĩa Ngathi, nĩwaekie kũmũmantha.

5 Nĩvo ĩndĩ Ndaviti weeie Akisi atĩĩ: “Ethĩwa nĩnonete ũseo methonĩ maku, mwa nenge vandũ va kwĩkala ndũanĩ ĩmwe nini, nĩ kana nĩkale vo. Wĩthĩwa wĩ ũndũ mũseango mũthũkũmi waku kũlea kwĩkala ndũanĩ ya kĩ-ũsumbĩ vamwe naku.” 6 Kwoou mũthenya ũsu Akisi amũnenga Nzikilaki. Nĩkyo kĩtumi o na kũvika ũmũnthĩ Nzikilaki yĩthĩawa ya asumbĩ ma Yuta.

7 Ĩvinda yĩla* Ndaviti wekalile nthĩ ya Avilisiti yaĩ mwaka ũmwe na myei ĩna. 8 Ndaviti na aũme make nĩmakothaa kwambata makavithũkĩe Angesuli, Angilisi, na Aamaleki, nũndũ matũĩte kĩsionĩ kĩla kyaumĩte Telamu nginya Suli kũtheea nginya Misili. 9 Ndaviti avithũkĩa kĩsio kĩu, ndatialasya mũndũũme kana mũndũ mũka e thayũ, ĩndĩ nĩwoosaa malondu na mbũi, ngʼombe, mangʼoi, ngamĩle, na ngũa, na ĩtina wa ũu aisyoka kwa Akisi. 10 Nake Akisi amũkũlasya: “Ũmũnthĩ mũvithũkĩie va?” Nake Ndaviti amũsũngĩaa atĩĩ: “Ngalĩko ya ĩtheo* ya Yuta” kana “Ngalĩko ya ĩtheo ya Ayelameeli” kana “Ngalĩko ya ĩtheo ya Akeni.” 11 Ndaviti ndaekaa mũndũũme o na ũmwe kana mũndũ mũka o na ũmwe ekale thayũ nĩ kana ndakaetwe Ngathi, nĩkwĩthĩwa aasya: “Nĩ kana maikese kũmatavya ũndũ ĩũlũ witũ mayasya, ‘Ũũ nĩwʼo Ndaviti wĩkie.’” (Na ũu nĩwʼo weekaa ĩvinda yonthe yĩla wekalaa nthĩ ya Avilisiti.) 12 Kwoou Akisi nĩwaĩkĩĩie Ndaviti nĩkwĩthĩwa eetavasya: ‘Vate nzika, nũtwʼĩkĩte mũuke mũthũku katĩ wa andũ make ma Isilaeli, kwoou ĩvinda yonthe akeethĩawa mũthũkũmi wakwa.’