Valũa wa Mbee wa Vetelo

5 Kwoou, nũndũ o nakwa nĩ mũtumĩa, na nĩ ngũsĩ ya mathĩna ala mamũkwatie Klĩsto, na nĩ ũmwe wa ala makakwata ũtheu mũtisu ũla ũkavuanwʼa, nĩmesũva atumĩa ala me katĩ wenyu: 2 Sũvĩai ĩĩthya ya Ngai yĩla yĩ ungu wa ũsũvĩo wenyu, mwĩ asyaĩĩsya, na ti kwa kũthingʼĩĩwʼa, ĩndĩ na ngenda methonĩ ma Ngai; mũte kwenda kwĩyĩuna ene, ĩndĩ mwĩke ũu na mea; 3 mũte kwĩnenevya ĩũlũ wa ala Ngai ũtwʼĩte ũtiĩwa wake, ĩndĩ mwĩthĩwe ngelekanyʼo kwa ĩĩthya. 4 Na yĩla mũĩthi ũla mũnene wĩumĩlwʼa, mũkakwata ngovia ĩtanangĩkaa ya ũtheu mũtisu.

5 O ta ũu, inywʼĩ aũme ma mũika, ĩnyivĩsyei atumĩa. Kĩla ũmwe nĩ evwʼĩke wĩnyivyo kwelekela ũla ũngĩ, nĩkwĩthĩwa Ngai nũmavĩngaa ala me mĩngʼathĩlĩĩlyo, ĩndĩ nũmonasya ũseo mwingĩ ala me na wĩnyivyo.

6 Kwoou ĩnyivyei ungu wa kwʼoko kwĩ vinya kwa Ngai, nĩ kana emũnenevya ĩvinda yĩla yaĩlĩte yavika, 7 na mũimwiĩa kwĩmakĩa kwenyu kwʼonthe, nũndũ nũmũthĩnĩkĩaa. 8 Sũvĩai ilĩko syenyu, ĩkalai mwĩ metho! Mũmaitha wenyu Ndevili aendaa kũũ na kũũ ta mũnyambũ ũkũluma, aimantha mũndũ amelye. 9 Ĩndĩ mũsiĩĩei mwĩ alũmu mũĩkĩĩonĩ, mũimanya kana mathĩna o asu nomo makwataa ana-a-asa menyu onthe ĩũlũ wa nthĩ. 10 Ĩndĩ ĩtina wa kũthĩna ĩvinda ĩnini, Ngai wa ũseo mwingĩ wʼonthe, ũla wamwĩtie mũlike ũtheunĩ wake mũtisu wa tene na tene mwĩ ngwatanĩo vamwe na Klĩsto, akamũmanyĩsya vyũ. Akatuma mwĩthĩwa alũmu, akatuma mwĩthĩwa na vinya, na akamũlũlũmĩlya vyũ. 11 Vinya nĩ wake tene na tene. Ameni.

12 Namũandĩkĩa na ndeto mbũthũ kwĩsĩla Silivano, * nake nĩ mwana-a-asa nonaa e mũĩkĩĩku, nĩ kana nĩmwĩkĩe inywʼĩ vinya na kũmũĩkĩĩthya kana ũũ nĩwʼo ũseo mwingĩ wa Ngai. Ũngamai mwĩ alũmu nthĩnĩ wawʼo. 13 Mũndũ mũka * ũla wĩ Mbaviloni, ũla ũnyuvĩtwe o tenyu, nĩwamũkethya, o na Maliko mwana wakwa nĩwamũkethya. 14 Kethanyʼai na ngethi ya wendo.

Inywʼonthe ala mwĩ ngwatanĩo vamwe na Klĩsto, ĩthĩwai na mũuo.