Kwosana na Lũka
2 Na mĩthenyanĩ ĩsu mwĩao nĩwaumie kwa Kaisali Aukusito nĩ kana andũ nthĩ yonthe maandĩkĩthwʼe. 2 (Kũandĩkĩthwʼa kũu kwa mbee kweethĩiwe yĩla Kwilinio waĩ ngavana wa Silia.) 3 Na andũ onthe mathi kũandĩkĩthwʼa, kĩla ũmwe ndũanĩ yake. 4 Yosevu o nake nĩwaumie Kalilii, ndũanĩ ya Nasaleti, athi Yutia ndũanĩ ya Ndaviti ĩla yĩtawa Mbetheleemu, nũndũ aĩ wa mũsyĩ wa Ndaviti. 5 Na athi kũandĩkĩthwʼa vamwe na Meli, ũla waĩ anamũtwaa nũndũ nĩmeevaanĩtye, nake aĩ vakuvĩ kũsyaa. 6 Na kweethĩwa yĩla maĩ kũu, ĩvinda yake yavika ya kũsyaa. 7 Na asyaa kana kake ka mbee kavĩsĩ na akavwʼĩka ngũa na akakomya mũvalatĩnĩ, * nũndũ nyũmbanĩ ya aeni vayaĩ mwanya woo.
8 O na kĩsionĩ kĩu kwaĩ aĩthi mekalaa nza maisyaĩĩsya indo syoo ũtukũ. 9 Na o mĩtũkĩ mũlaĩka wa Yeova amaumĩlĩĩla na aũngama mbee woo, na kyeni kya ũtheu mũtisu wa Yeova kyamamulĩka na makwatwa nĩ wia mwingĩ. 10 Ĩndĩ mũlaĩka amea: “Mũikakĩe, nũndũ sisyai! nĩmũtavya ũvoo mũseo ũla ũkaetee andũ onthe ũtanu mũnene. 11 Nũndũ ũmũnthĩ ndũanĩ ya Ndaviti nĩkũsyaiwe mũtangĩĩi, nake nĩ Klĩsto ũla Mwĩaĩi. 12 Na ũũ nĩwʼo wonanyʼo kwenyu: Nĩmũkwĩthĩa kana kavwʼĩkĩtwe ngũa na kakomete mũvalatĩnĩ.” 13 Na o mĩtũkĩ nguthu nene ya ita sya ĩtunĩ yeethĩwa vamwe na ũla mũlaĩka, ĩkĩmũtaĩa Ngai na kwasya: 14 “Ngai nataĩwe kũu ĩũlũ mũno, na mũuo wĩthĩwe ĩũlũ wa nthĩ andũnĩ ala mamwendeeasya.” *
15 Kwoou yĩla alaĩka mamatiie na masyoka ĩtunĩ, aĩthi maneenanyʼa ene kwa ene, makyasya: “No nginya tũthi Mbetheleemu tũkone ũndũ ũla weekĩka, ũla Yeova watũmanyĩthya.” 16 Na mathi na mĩtũkĩ na meethĩa Meli vamwe na Yosevu, na kala kana kakomete mũvalatĩnĩ. 17 Yĩla moonie ũu, matavanyʼa ũvoo ũla matavĩtwʼe ĩũlũ wa kana kau. 18 Na onthe ala meewie masengʼa nũndũ wa maũndũ ala mataviwʼe nĩ aĩthi, 19 ĩndĩ Meli ambĩĩa kwia maũndũ asu kĩlĩkonĩ, na kũmasũanĩa ngoonĩ yake. 20 Na ĩndĩ aĩthi masyoka maimũkumya Ngai na kũmũtaĩa nũndũ wa maũndũ onthe ala meewie na kwona, o tondũ matavĩtwʼe.
21 Na ĩtina wa mĩthenya nyanya, ĩvinda yavika ya kwaĩka kana kau, nako keetwa Yesũ, ĩsyĩtwa yĩla yanenganĩtwe nĩ mũlaĩka o na mbee wa katanaitavwa.
22 Na ĩngĩ, yĩla ĩvinda yavikie ya kũthewʼa kwoo kwosana na Mĩao ya Mose, mambata na Yesũ Yelusaleme makamũnengane kwa Yeova, 23 o tondũ kũandĩkĩtwe Mĩaonĩ ya Yeova: “Kĩla mũsyawa wa mbee mũndũũme * aĩle kwĩtwa mũtheu wa Yeova.” 24 Na maumya nthembo kwosana na ũndũ Mĩao ya Yeova yaĩtye: “ndumbũ ilĩ kana maswii elĩ ma ĩvũĩ.”
25 Na sisya! Yelusaleme kwaĩ mũndũ weetawa Simeoni; mũndũ ũsu aĩ mũlũngalu na nĩwamũkĩaa Ngai, na nĩweeteele kũkiakiwʼa kwa Isilaeli, na veva mũtheu waĩ ĩũlũ wake. 26 O na ĩngĩ, nĩwavuanĩwʼe nĩ Ngai kwĩsĩla veva mũtheu kana ndakona kĩkwʼũ atonete Klĩsto wa Yeova. 27 Na atongoewʼe nĩ veva mũtheu, ooka ĩkalũnĩ, na yĩla asyai ma Yesũ maetie kana kau nĩ kana mekane nako o tondũ kweekawa kwosana na Mĩao, 28 akosa kana kau mokonĩ make na amũtaĩa Ngai na asya: 29 “Yu, Mwĩaĩi Mũsumbĩ Mũnene, eka ngombo yaku ĩthi na mũuo kwosana na ũndũ waneenie, 30 nũndũ metho makwa nĩmoona nzĩa yaku ya ũtangĩĩo 31 ĩla ũseũvĩtye mbee wa metho ma andũ onthe, 32 kyeni kya kũveta kĩndũ kĩla kĩvwʼĩkĩte metho ma andũ ma mbaĩ ingĩ, na ũtheu mũtisu kwa andũ maku Isilaeli.” 33 Na ĩthe wa kana kau na inyia wako maendeea kũsengʼa nũndũ wa maũndũ ala maneenawa ĩũlũ wako. 34 O na ĩngĩ, Simeoni amaathima na amwĩa Meli inyia wa kana kau atĩĩ: “Sisya! Kana kaa nĩkanyuvĩtwe kwondũ wa kũvalũka na kũkĩla ĩngĩ kwa andũ aingĩ ma Isilaeli na kwondũ wa wonanyʼo ũla ũkaneenewa naĩ 35 (ĩĩ, ũvyũ mũasa ũkaũtonya), nĩ kana mosũanĩo ma ngoo mbingĩ matonye kũvuanwʼa.”
36 Na kwaĩ mwathani mũndũ mũka weetawa Ana, mwĩĩtu wa Vanueli wa mbaĩ ya Aseli. Mũndũ mũka ũsu aĩ mũkũũ na ekalile na mũũme wake myaka mũonza kuma matwaana, * 37 nake aĩ ndiwa na aĩ na myaka 84. Ndatĩaa kũthi ĩkalũnĩ, aithũkũma ũthũkũmi mũtheu ũtukũ na mũthenya vamwe na kũtĩĩa kũya na kũvoya na kĩthingʼĩĩsyo. 38 Na saa o ũsu athengeea na ambĩĩa kũmũtũngĩa Ngai mũvea na kũneena ĩũlũ wa kala kana, aitavya onthe ala meeteele wovosyo wa Yelusaleme.
39 Kwoou ĩtina wa kwĩka maũndũ onthe kwosana na Mĩao ya Yeova, masyoka Kalilii ndũanĩ yoo ya Nasaleti. 40 Na kana kau kaendeea kwĩana na kwĩthĩwa na vinya, kausũĩtwe nĩ ũĩ, na Ngai nĩwaendeeie kũkonyʼa ũseo.
41 Na asyai mako nĩmaendaa Yelusaleme kĩla mwaka ĩvinda ya mboka ya Vasaka. 42 Na yĩla waĩ na myaka 12, mambata Yelusaleme, kwosana na ũndũ kweekawa ĩvinda ya mboka. 43 Na yĩla mĩthenya ya mboka yathelile masyoka, na kavĩsĩ Yesũ katiwa Yelusaleme, na asyai mako mayaamanya. 44 Na nũndũ moonaa Yesũ ta waĩ andũnĩ ala maendanĩtye namo, mathi kyalo kya mũthenya mũima, na ĩndĩ mambĩĩa kũmũmantha andũnĩ moo ma mũsyĩ na andũnĩ ala meesene namo. 45 Ĩndĩ malea kũmwona, masyoka Yelusaleme na mamũmantha na kĩthito. 46 Na ĩtina wa mĩthenya ĩtatũ mamwĩthĩa ĩkalũnĩ, ekalĩte katĩ wa amanyĩsya aimethukĩĩsya na kũmakũlya makũlyo. 47 Ĩndĩ onthe ala mamwĩthukĩĩsye nĩmasengʼaa mũno nũndũ wa ũmanyi wake na mosũngĩo make. 48 Na yĩla asyai make mamwonie nĩmasengʼie, na inyia wake amũkũlya: “Mwana wakwa, ũtwĩkie ũu nĩkĩ? Nyie na ĩthe waku tũthĩnĩkie mũno tũikũmantha.” 49 Ĩndĩ amakũlya: “Nĩkĩ mũũmanthaa? No mwĩĩsĩ kana no nginya nĩthĩwe nyũmbanĩ ya Asa wakwa?” 50 Ĩndĩ mayaaelewa nĩ kĩla wamatavasya.
51 Na ĩndĩ atheea namo na masyoka Nasaleti, na aendeea kũmenyivĩsya. * Na inyia wake aia nesa ndeto isu syonthe ngoonĩ yake. 52 Na Yesũ aendeea kwĩthĩwa na ũĩ na kwĩana na kwonwʼa ũseo nĩ Ngai na andũ.