Valũa wa Mbee kwa Akolintho

5 Nĩ wʼo kana ũlaalai * nũũwetwa katĩ wenyu, na ũlaalai * ta ũsu ndwĩ vo o na katĩ wa andũ ma mbaĩ ingĩ, wa mũndũ kwĩkala * na mũka wa ĩthe. 2 Na no mũkwĩkathĩĩa nũndũ wa ũndũ ũsu? Mũyaĩle kwĩthĩwa na kyeva nĩ kana mũndũ ũla wĩkĩte ũndũ ũsu avetwe katĩ wenyu? 3 O na kau ndi vau mũĩ, nĩ vau kĩ-veva, na nyie nĩnĩmũsilĩle mũndũ ũsu wĩkĩte ũndũ ũsu, ta nĩ vau nenyu. 4 Yĩla mũmbanĩte vamwe ĩsyĩtwanĩ ya Mwĩaĩi Yesũ, na nĩmwĩsĩ nĩ vamwe nenyu vevanĩ vamwe na vinya wa Mwĩaĩi waitũ Yesũ, 5 no nginya mũmũnengane mũndũ ũsu kwa Satani nĩ kana mwĩĩ wanangwe, na nĩ kana veva wĩtangĩĩwa mũthenyanĩ wa Mwĩaĩi.

6 Kwĩkathĩĩa kwenyu ti kũseo. Nũndũ mũtesĩ kana ĩlawa ĩnini nĩyĩkaatasya ngũmbwa yonthe ya mũtu? 7 Vetai ĩlawa ya tene nĩ kana mwĩthĩwe ngũmbwa nzaũ ya mũtu, o tondũ yu mũilye mũte na ĩlawa. Nũndũ vate nzika, Klĩsto, kalondu kaitũ ka Vasaka, nĩ mũthembe. 8 Kwoou ekai tũendeee kwĩthĩwa na mboka, na ti na ĩlawa ya tene, kana ĩlawa ya naĩ na ũthũku, ĩndĩ na mũkate ũte ĩlawa wa ũtheu wa ngoo na ũwʼo.

9 Nthĩnĩ wa valũa wakwa nĩnamũandĩkĩie mũeke kũtindanyʼa * na andũ ilaalai, * 10 na ũu ti kwasya kana mũikatindanyʼe o na vanini na andũ ilaalai * ma nthĩ ĩno kana andũ me ĩtomo kana avenani kana athaithi ma mĩvwʼanano. Ethĩwa vailye ũu, wĩthĩa no nginya mume ĩũlũ wa nthĩ. 11 Ĩndĩ yu nĩmũandĩkĩa mũeke kũtindanyʼa na mũndũ o na wĩva ũkwĩtwa mwana-a-asa na nĩ kĩlaalai * kana mũndũ wĩ ĩtomo kana mũthaithi wa mĩvwʼanano kana mũumani kana mũnywi kana mũvenani, o na mũikaye na mũndũ ta ũsu. 12 Nũndũ ve vata mwaũ kwakwa kũsilĩla ala me nza? Inywʼĩ mũyaĩle kũsilĩla ala me nthĩnĩ, 13 nĩ kana Ngai asilĩle ala me nza? “Vetai mũndũ ũsu mũthũku katĩ wenyu.”