Valũa wa Kelĩ kwa Akolintho
5 Nũndũ nĩtwĩsĩ kana o na ethĩwa nyũmba yitũ, nayo nĩ ĩeema yĩĩ, ĩkaanangĩka, Ngai akatũnenga nyũmba ya tene na tene ĩtunĩ, ĩtakĩtwe na moko. 2 Nũndũ yĩla twĩ nyũmbanĩ ĩno * nĩtũlumaa, twĩ na mea maingĩ ma kwĩvwʼĩka ĩla yitũ ya kuma * ĩtunĩ, 3 nĩ kana yĩla tũkevwʼĩka nyũmba ĩsu, tũikethĩwe athei. 4 Nĩ wʼo kana ithyĩ ala twĩ ĩeemanĩ yĩĩ nĩtũlumaa, twĩ aitavĩe, nũndũ tũikwenda kwĩvwʼĩkũa ĩeema yĩĩ, ĩndĩ twĩenda kwĩvwʼĩka nyũmba ĩsu ĩngĩ, nĩ kana kĩla kĩtonya kũkwʼa kĩmelwʼe nĩ thayũ. 5 Na ũla watũmbanisye kwondũ wa ũndũ ũsu nĩ Ngai, ũla watũnengie veva ta ũĩkĩĩthyo wa kĩla kĩkoka.
6 Twĩ na ũkũmbaũ mũnene na nĩtwĩsĩ kana ĩvinda yĩla twĩ na wĩkalo witũ nthĩnĩ wa mwĩĩ ũũ, tũi vala ve Mwĩaĩi, 7 nũndũ tũendaa kwa kũĩkĩĩa, na ti kwa kwona. 8 Ĩndĩ twĩ na ũkũmbaũ mũnene na nĩ kavaa tũkethĩwa tũte nthĩnĩ wa mwĩĩ ũũ na tũyĩthĩwa na wĩkalo witũ vamwe na Mwĩaĩi. 9 Kwoou twĩthĩwe twĩ vala ũĩ kana tũi vala ũĩ, kĩeleelo kitũ nĩ kwĩthĩwa tũtonya kwĩtĩkĩlwa nĩwe. 10 Nũndũ ithyonthe no nginya twĩũngama mbee wa kĩvĩla kya sila kya Klĩsto, nĩ kana kĩla ũmwe akwate ĩtuvi kwosana na maũndũ ala weekaa yĩla waĩ na mwĩĩ ũũ, methĩwe nĩ maseo kana nĩ mathũku.
11 Kwoou nũndũ nĩtwĩsĩ kana nĩtwaĩle kũmũkĩa Mwĩaĩi, nĩtũtataa kũneena na andũ nĩ kana metĩkĩle, ĩndĩ nĩtwĩsĩkĩe nesa vyũ nĩ Ngai. Na nĩ na wĩkwatyo kana nĩtwĩsĩkĩe nesa nĩ wasya wenyu wa ngoo. 12 Tũikwĩyĩĩkĩĩthya kũla mũĩ ĩngĩ ĩndĩ twĩenda kũmũnenga kĩtumi kya kwĩkathĩĩa ĩũlũ witũ, nĩ kana mwĩthĩwe mũtonya kũmasũngĩa ala mekathĩĩaa nũndũ wa ũndũ mekwoneka mailye, ĩndĩ ti ĩũlũ wa kĩla kĩ ngoonĩ. 13 Nũndũ ethĩwa twaĩ na kĩlĩko kĩthũku, ũu waĩ kwondũ wa Ngai, na ethĩwa twĩ na kĩlĩko kĩseo, nĩ kwondũ wenyu. 14 Nũndũ wendo ũla Klĩsto wĩ nawʼo nũtũthingʼĩĩasya, nĩkwĩthĩwa ũũ nĩwʼo tũeleetwe, kana mũndũ ũmwe nĩwakwie kwondũ wa onthe; kwoou ĩndĩ, onthe nĩmakwʼĩte. 15 Na akwie kwondũ wa onthe nĩ kana ala me thayũ maikethĩwe thayũ kwondũ woo ene, ĩndĩ kwondũ wa ũla wamakwʼĩĩe na athayũũkwʼa.
16 Kwoou kuma yu na kũendeea tũimwĩsĩ mũndũ o na ũmwe kwosana na mwĩĩ. O na ethĩwa nĩtwamwĩsĩ Klĩsto kwosana na mwĩĩ, vate nzika yu tũimwĩsĩ ũu. 17 Kwoou, ethĩwa mũndũ o na wĩva e ngwatanĩo vamwe na Klĩsto, we nĩ kyũmbe kyeũ; maũndũ ma tene nĩmavĩtie; sisya! maũndũ meũ nĩmethĩĩtwe vo. 18 Ĩndĩ maũndũ onthe maumaa kwa Ngai, ũla watwĩwʼanĩthisye nake mwene kwĩsĩla Klĩsto na atũnenga ũthũkũmi wa wĩwʼanĩthyo, 19 na ũu nĩ kwasya kana kwĩsĩla Klĩsto, Ngai ewʼanĩthasya nthĩ nake mwene, ateũmĩtalĩla mavĩtyo, na nũtũnengete ndeto ya wĩwʼanĩthyo.
20 Kwoou nĩtũtũmĩtwe kũneena vandũ va Klĩsto, na kwoou Ngai no ta ũkwĩsũvana kwĩsĩla kwitũ. Na nĩtũũmwĩsũva kwondũ wa Klĩsto, tũkyasya: “Ĩwʼanĩthwʼai na Ngai.” 21 We ũla ũtaamanya naĩ, nĩwamũtwʼĩkĩthisye naĩ * kwondũ witũ, nĩ kana kwĩsĩla kwake twĩthĩwe twĩ alũngalu methonĩ ma Ngai.