Kwosana na Yoana
2 Na mũthenya wa katatũ kwaĩ mboka ya mũtwaano Kena ya Kalilii, na inyia wa Yesũ aĩ vo. 2 O nake Yesũ na amanyĩwʼa make nĩmathoketwʼe mbokanĩ ĩsu ya mũtwaano.
3 Na yĩla mbinyu yanyivie, inyia wa Yesũ amwĩa: “Mai na mbinyu.” 4 Ĩndĩ Yesũ amwĩa: “Mũndũ mũka, ũndũ ũsu ũngonetye ata na ũkũkonetye ata? * Saa wakwa ndũnamba kũvika.” 5 Na inyia wake amea ala mathũkũmaa: “Ĩkai o ũndũ ũkũmũtavya.” 6 Na vaĩ mbisũ thanthatũ sya ĩvia sya kwĩkĩa kĩwʼũ ila syaiĩtwe vau kwosana na mĩao ya kwĩthesya ya Ayuti, na kĩla ĩmwe yaĩ ĩtonya kũlika ithimo * ilĩ kana itatũ. 7 Na Yesũ amea: “Usũsyai mbisũ kĩwʼũ.” Kwoou masyusũsya ki. 8 Na ĩndĩ amea: “Yu tavai kĩmwe mũtwaĩe mũũngamĩi wa mboka.” Namo mamũtwaĩa. 9 Na yĩla mũũngamĩi wa mboka wasamie kĩwʼũ kĩla kyaĩ kĩnaalyũkwʼa kĩkatwʼĩka mbinyu, na ndeesĩ vala yumĩte (o na kau athũkũmi ala matavĩte ĩ kĩwʼũ nĩmeesĩ), mũũngamĩi ũsu wa mboka nĩweetie mũtwaani 10 na amwĩa: “Kĩla mũndũ aetae mbinyu ĩla nzeo mbee, na andũ mamilwa, ayĩete ĩla ĩte nzeo mũno. Ĩndĩ we wiie mbinyu ĩla nzeo nginya yu.” 11 Yesũ eekie ũu e Kena ya Kalilii na kĩu nĩkyo kyaĩ kyama kyake kya mbee, na oonanyʼa ũnene wake na amanyĩwʼa make mamũĩkĩĩa.
12 Ĩtina wa vau nĩwaendie Kavelinaumi e na inyia wake na ana-a-inyia make na amanyĩwʼa make, ĩndĩ mayaaĩkala kũu mĩthenya mingĩ.
13 Na mboka ya Vasaka ya Ayuti nĩyathengeee, na Yesũ ambata Yelusaleme. 14 Na vau ĩkalũnĩ nĩweethĩie ala mathooasya ngʼombe na malondu na mavũĩ, na ala mavunzasya mbesa mailyĩ nthĩ ivĩlanĩ syoo. 15 Kwoou ĩtina wa kũseũvya mũtalisa wa makanda, amakuthũa ĩkalũnĩ onthe ala maĩ na malondu na ngʼombe, na eta mbesa sya ala mavunzasya mbesa na ang’uthũlanga mesa syoo. 16 Na amea ala matesaa mavũĩ: “Vetai syĩndũ ii vaa! Ekai kũmĩtwʼa nyũmba ya Asa wakwa nyũmba ya viasala!” * 17 Na amanyĩwʼa make malilikana kana nĩkũandĩkĩtwe: “Kĩthito kwondũ wa nyũmba yaku kĩkandya.”
18 Kwoou Ayuti mamwĩa: “Nĩ kyama kĩva ũtonya kũtwonyʼa kya kũĩkĩĩthya kana Ngai nũkũnengete ũkũmũ wa kwĩka maũndũ aa?” 19 Nake Yesũ amasũngĩa, amea: “Omboangai ĩkalũ yĩĩ, na ngayĩũngamya ĩngĩ ĩtina wa mĩthenya ĩtatũ.” 20 Na ĩndĩ Ayuti mamwĩa: “Ĩkalũ yĩĩ yaakiwe myaka 46, na wĩasya ũkayĩũngamya ĩtina wa mĩthenya ĩtatũ?” 21 Ĩndĩ ĩkalũ yĩla Yesũ waneenaa ĩũlũ wayo nĩ mwĩĩ wake. 22 Na yĩla wathayũũkiwʼe amanyĩwʼa make malilikana kana nĩwawetaa ũndũ ũsu, na maĩkĩĩa maandĩko na ũndũ Yesũ waĩtye.
23 Ĩndĩ yĩla waĩ Yelusaleme ĩvinda ya mboka ya Vasaka, andũ aingĩ nĩmeethĩiwe na mũĩkĩĩo ĩsyĩtwanĩ yake moona syama ila weekaa. 24 Ĩndĩ Yesũ ndaameyĩelela nũndũ nĩwamesĩ onthe 25 na nũndũ ndaĩ na vata wa mũndũ o na wĩva kũmumĩsya ũkũsĩ ĩũlũ wa andũ, nĩkwĩthĩwa nĩweesĩ kĩla kyaĩ nthĩnĩ wa mũndũ.