Ĩvuku ya Kelĩ ya Samũeli
23 Ii nĩsyo ndeto sya mũthya sya Ndaviti mwana wa Yese:
“Ndeto ya Ndaviti mwana wa Yese,
Na ndeto ya mũndũũme ũla wookĩlilwʼe ĩũlũ,
Mwĩtĩkĩwʼa mauta wa Ngai wa Yakovo,
Mwini wa kwendeesya* wa mbathi sya Isilaeli.
2 Veva wa Yeova nĩwandongoeisye kũneena;
Ndeto yake yaĩ ũĩmĩnĩ wakwa.
3 Ngai wa Isilaeli nĩwaneenie;
Ĩvia ya Isilaeli ambĩie atĩĩ:
‘Yĩla ũla ũsumbĩkĩte andũ weethĩwa e mũlũngalu,
Asumbĩkĩte kwa kũmũkĩa Ngai,
4 Nĩ ta kyeni kya kwakya yĩla sua yaaa,
Kwakya kũte matu.
Nĩ ta kyeni kĩla kyũkaa mbua yaua,
Kĩla kĩtumaa nyeki ĩmea nthĩ.’
5 Yo nyũmba yakwa ĩyĩilye ũu mbee wa Ngai?
Nĩkwĩthĩwa nũtianĩĩte ũtianĩo wa tene na tene nakwa,
Ũvangĩtwe maũndũnĩ onthe na ũkaĩkĩĩthwʼa.
Nũndũ ũtianĩo ũsu wonanasya ũtangĩĩo wakwa wʼonthe na ũtanu wakwa wʼonthe,
Kyo kĩu tikyo kĩtumi ũtumaa yaĩla?
6 Ĩndĩ aũme onthe vathei mekĩtwʼe kũasa ta ikuthu syĩ mĩwʼa,
Nĩkwĩthĩwa maitonya kwoswa na kwʼoko.
7 Yĩla mũndũ ũkũmakiita,
Aĩlĩte kwĩthĩwa eyũmbanĩtye vyũ e na kyũma* na mũtĩ wa ĩtumo,
Na maĩlĩte kũvĩvwʼa vyũ na mwaki me vala maĩ.”
8 Aa nĩmo masyĩtwa ma ngũmbaũ sya kaũ sya Ndaviti: Yosevi-mbasevethi ũla Mũtakemoni, mũũngamĩi wa ala atatũ. Nĩwooaie andũ 800 na ĩtumo yake o ĩvindanĩ yĩmwe. 9 Aatĩĩwe nĩ Eleasali mwana wa Ndoto mwana wa Aoi ũla waĩ katĩ wa ila ngũmbaũ itatũ sya kaũ syaĩ na Ndaviti yĩla mavũthĩĩisye Avilisiti. Moombanĩe vau mokite, na yĩla aũme ma Isilaeli masyokie ĩtina makĩĩte, 10 we ndaakĩa ĩndĩ aendeeie kũaa Avilisiti nginya kwʼoko kwake kwanoa na kwaanda nũndũ wa kũkwata ũvyũ. Kwoou Yeova aete ũsindi* mũnene mũthenya ũsu; na andũ maatĩĩa Eleasali nĩ kana makose mũtavo wa andũ ala mooaĩtwe.
11 Aatĩĩwe nĩ Samuma mwana wa Akee ũla Mũalali. Avilisiti moombanĩe Lei, vala vaĩ mũũnda wausĩe ndengũ; na andũ masemba makĩa Avilisiti. 12 Ĩndĩ ndaakĩa, vandũ va ũu, aũngamie mũũndanĩ ũsu katĩ na aũtetea na aendeea kũaa Avilisiti, na kĩu kyatuma Yeova aete ũsindi* mũnene.
13 Aũngamĩi 3 katĩ wa aũngamĩi 30 nĩmatheeie kũla kwĩ Ndaviti ngunganĩ ya Atulamu ĩvindanĩ ya ngetha, na nguthu ya* Avilisiti yambĩte kambi Mwandanĩ* wa Alevai. 14 Ĩvindanĩ yĩu, Ndaviti aĩ ngomenĩ, na kĩsese kya Avilisiti kyaĩ Mbethileemu. 15 Na ĩndĩ Ndaviti aweta kĩla wendaa, asya: “Ta keka no nĩnywʼe kĩwʼũ kya kĩthima* kĩla kĩ vakuvĩ na mũvĩa wa Mbethileemu!” 16 Nĩvo ĩndĩ ila ngũmbaũ itatũ sya kaũ syalikile kambinĩ ya Avilisiti na vinya na syatava kĩw’ũ kĩthimanĩ kĩla kĩ vakuvĩ na mũvĩa wa Mbethileemu na syakĩetee Ndaviti; ĩndĩ nĩwaleile kũkĩnywʼa na akĩtĩa Yeova. 17 Aisye: “Ame Yeova, ndyamba kũsũanĩa kwĩka ũu! Yo nĩnaĩle kũnywʼa nthakame ya aũme aa malikilye mathayũ moo mũisyonĩ mathi kũuta kĩwʼũ kĩu?” Kwoou alea kũkĩnywʼa. Aa nĩmo maũndũ ala ngũmbaũ isu syake itatũ sya kaũ syeekie.
18 Avisai mwana-a-inyia wa Yoavu mwana wa Nzeluia nĩwe waĩ mũũngamĩi wa ala angĩ atatũ; ooaie andũ 300 na ĩtumo yake, na aĩ nguma o ta asu atatũ. 19 O na kau nĩwe wanengetwe ndaĩa vyũ kwĩ ala atatũ na nĩwe waĩ mũnene woo, kĩanda kyake kĩyaaĩsa kwĩanana na kya ala atatũ ma mbee.
20 Mbenaia mwana wa Yeoiata aĩ mũndũũme ngũmbaũ* na nĩweekie maũndũ maingĩ manene kũu Kaviseeli. Nĩwooaie ana elĩ ma Alieli kuma Moavi, na mũthenya ũmwe kwĩ ĩa nĩwalikile ĩimanĩ ya kĩwʼũ na ooaa mũnyambũ. 21 O na nĩwooaie Mũmisili waĩ mũnene mũno. O na kau Mũmisili ũsu akwete ĩtumo, Mbenaia aendie kũkita nake na ndata na avulya ĩtumo yĩu wakwete na amũaa o nayo. 22 Mbenaia mwana wa Yeoiata nĩweekie maũndũ asu, na aĩ nguma o ta ila ngũmbaũ itatũ sya kaũ. 23 O na kau nĩwanengetwe ndaĩa kwĩ ala 30, ndaaĩsa kwĩthĩwa na kĩanda ta kya ala atatũ. O na ũu wĩ o vo, Ndaviti nĩwamũnyuvie aũngamĩe asungi make.
24 Asaeli mwana-a-inyia wa Yoavu aĩ katĩ wa ala 30: Elianani mwana wa Ndoto kuma Mbethileemu, 25 Samuma ũla waĩ Mũalote, Elika ũla waĩ Mũalote, 26 Elesu ũla waĩ Mũvaliti, Ila mwana wa Ikesi ũla waĩ Mũtekoa, 27 Avi-eseli ũla waĩ Mũanathothi, Mevunai ũla waĩ Mũuusa, 28 Nzalimoni ũla waĩ Mũaoi, Maalai ũla waĩ Mũnetova, 29 Elevu mwana wa Mbaana ũla waĩ Mũnetova, Itai mwana wa Livai kuma Ngivea ya Ambenyamini, 30 Mbenaia ũla waĩ Mũvilathoni, Ititai ũla waumĩte myandanĩ ya* Ngaasi, 31 Avi-alivoni ũla waĩ Mũaliva, Asimavethi ũla waĩ Mũmbaliumu, 32 Eliava ũla waĩ Mũsaalivoni, ana ma Yaseni, Yonathani, 33 Samuma ũla waĩ Mũalali, Aiamu mwana wa Salali ũla waĩ Mũalali, 34 Elivieleti mwana wa Aasivai mwana wa ũla Mũmaaka, Eliamu mwana wa Aithoveli ũla waĩ Mũngilo, 35 Esilo ũla waĩ Mũkalimeli, Vaalai ũla waĩ Mũalavu, 36 Ikali mwana wa Nathani kuma Nzova, Mbani ũla waĩ Mũngati, 37 Nzeleki ũla waĩ Mũamimoni, Naalai ũla waĩ Mũmbeelothi, mũkui wa mĩio ya kaũ wa Yoavu mwana wa Nzeluia, 38 Ila ũla waĩ Mũithili, Ngalevu ũla waĩ Mũithili, 39 na Ulia ũla waĩ Mũititi; onthe maĩ 37.