Ĩvuku ya Kelĩ ya Samũeli
22 Ndaviti nĩwainĩie Yeova wathi ũũ mũthenya ũla Yeova wamũvonokisye kuma kwʼokonĩ kwa amaitha make onthe na kuma kwʼokonĩ kwa Saũlo. 2 Aisye:
“Yeova nĩ ĩvia yakwa yĩ ngũka na ngome yakwa na nĩwe ũmbonokasya.
3 Ngai wakwa nĩ ĩvia yakwa, ũla nĩvithaa nthĩnĩ wake,
Ngao yakwa na ũvya* wakwa wa ũtangĩĩo,* wĩvitho wakwa mũlũmu*
Vandũ vakwa va kũkĩĩa, mũtangĩĩi wakwa; we ũla ũndangĩĩaa kuma ũngʼendunĩ.
4 Nĩkaĩlaa Yeova, ũla waĩlĩte kũtaĩwa,
Na nĩndangĩĩawa kuma amaithanĩ makwa.
5 Itulumo sya kĩkwʼũ nĩsyanthyũlũlũkile ngalĩko syonthe;
Andũ vathei mailye ta kĩwʼũ kingĩ kĩla kyũkaa na kĩthũlũmũko nĩmandelemilye.
6 Makanda ma Mbũa* nĩmanthyũlũlũkile;
Nĩnakelanilwe nĩ itei sya kĩkwʼũ.
7 Nĩneekaĩlile Yeova nĩ thĩnanĩ wakwa,
Neekaĩlile Ngai wakwa ĩngĩ na ĩngĩ.
Nĩvo ĩndĩ weewie wasya wakwa e ĩkalũnĩ yake,
Na kĩĩo kyakwa kya kwĩtya ũtethyo kyavika matũnĩ make.
8 Nthĩ nĩyambĩĩie kũtetema na kũthingitha;
Mĩsingi ya matu nĩyatetemie
Na yathingithanga ĩngĩ na ĩngĩ nĩkwĩthĩwa nĩwathatĩtwʼe.
9 Syũki nĩyambatie kuma manyiũũnĩ make,
Na mwaki ũvĩvasya vyũ wauma kanywʼanĩ wake;
Makaa makanĩte nĩmekisye mwaki kuma kwake.
10 Atheeete nĩwatumie matu mekumba,
Na kwaĩ ũtuku mwingĩ ungu wa nyaaĩ syake.
11 Akuĩtwe nĩ mũkelũvi na ookie aũlũkĩte.
Oonekie ta wakuĩtwe nĩ nthwau sya mũlaĩka.*
12 Nĩvo ĩndĩ weethyũlũlũkĩilye kĩvindu kĩthĩwe wĩkalo wake,
E kĩvindunĩ kya kĩwʼũ na matunĩ makamu.
13 Ũtisi ũla watisaa mbee wake nĩwatumie makaa me mwaki malĩlĩmbana.
14 Na ĩndĩ Yeova ambĩĩa kũtunduma kuma ĩtunĩ;
Ũla wĩ Ĩũlũ wa Onthe nĩwatumie wasya wake wĩwʼĩka.
15 Nĩwekisye maangi na amavalaanyʼa;
Ĩĩ, amekĩsya ũtisi amavũavũanyʼe.
16 Kũndũ kũliku vyũ ũkanganĩ nĩkwoonekie;
Mĩsingi ya nthĩ nĩyaumĩlilwʼe nĩ ũkanyʼo wa Yeova,
Nĩ mĩthũmũ yĩ na vinya kuma manyiũũnĩ make.
17 Nĩwatambũũkisye kwʼoko kwake kuma ĩũlũ;
Nĩwangwatie na angusya kuma kĩwʼũnĩ kĩliku.
18 Nĩwambonokisye kuma mũmaithanĩ wĩ vinya,
Kuma vala ve ala mamenaa, ala maĩ vinya kwĩ inyie.
19 Nĩmambũkĩie mũthenya ũla naĩ na mũisyo nĩ kana mambũkite,
Ĩndĩ Yeova andwʼĩĩka.
20 Nĩwambumaalilye andwaa vandũ vasũvĩĩku;*
Nĩwambonokisye nũndũ nĩwendeeiwʼe ninyie.
21 Yeova anduvaa kwosana na ũlũngalu wakwa;
Andĩvaa kwosana na ũtheu* wa moko makwa.
22 Nũndũ nĩnĩlũmanĩtye na nzĩa sya Yeova,
Na ndyaaĩka ũthũku kwa kũtia Ngai wakwa.
23 Motwʼĩo make onthe me mbee wakwa;
Ndikelelũka nĩtie mĩao yake.
24 Ngekalaa ndaweteka ũthũku mbee wake,
Na ngeesũvĩaa ndikeke ĩvĩtyo.
25 Yeova nandĩve kwosana na ũlũngalu wakwa,
Kwosana na ũtheu* wakwa mbee wake.
26 Kwa mũndũ ũla ũlũmanasya naku we nũlũmanasya nake;
Kwa ũla ũtaweteka ũthũku, mũndũ wĩ vinya, we nũĩkĩĩthasya kana ndũweteka ũthũku;
27 Kwa ũla mũtheu nĩwonanasya wĩ mũtheu,
Ĩndĩ kwa ũla mũthyoeku nĩwonanasya wĩ mũĩ mbeange.*
28 Nũndũ nũtangĩĩaa ala me wĩnyivyo,
Ĩndĩ metho maku nĩmaleanaa na ala me mĩngʼathĩlĩĩlyo, na nũmanyivasya.
29 Nũndũ we wĩ taa wakwa, ame Yeova;
Yeova nĩwe ũmulĩkaa kĩvindunĩ kyakwa.
30 Kwa ũtethyo waku no nũkite nguthu ya avenani;
Kwa vinya wa Ngai no nĩlĩse ũkũta.
31 Nzĩa ya Ngai ũla wa w’o nĩ mbĩanĩu;
Ndeto ya Yeova nĩ ntheu.*
We nĩ ngao kwa onthe ala mevithaa nthĩnĩ wake.
32 Nũndũ nũũ Ngai ate o Yeova?
Na nũũ ĩvia eka Ngai witũ?
33 Ngai ũla wa w’o nĩ ngome yakwa ndũmu,
Na akatuma nzĩa yakwa yĩthĩwa yĩ ndũngalu.*
34 Nũtumaa maaũ makwa methĩwa mailye ta ma nthia;
Nũtumaa nĩũngama kũndũ kũtũlu.
35 Nũmanyĩasya moko makwa kwondũ wa kaũ;
Moko makwa no makumbe* ũta wa ũthuku.
36 Nũnengae ngao yaku ya ũtangĩĩo,
Na wĩnyivyo waku nũnenevasya.
37 Nũthanthaasya nzĩa ĩla ngũkinyĩla;
Maaũ makwa maikatendelũka.*
38 Ngasembanyʼa amaitha makwa na ndimamina;
Ndikasyoka nginya matutwe vyũ.
39 Na ngamatuta vyũ na ndimatumbatumba, wĩthĩe mayũkĩla;
Makavalũka ungu wa nyaaĩ syakwa.
40 Ũkanenga vinya kwondũ wa kaũ;
Ũkatuma nthũ syakwa ivalũka ungu wakwa.
42 Nĩmaĩaa matetheewʼe, ĩndĩ vai o na ũmwe wa kũmatangĩĩa;
O na nĩmamũĩĩaa Yeova, ĩndĩ ndamasũngĩaa.
43 Ngamatumbatumba mavinye ta kĩtoo kya nthĩ;
Ngamavevenza na ndimakinyanga ta ndaka yĩ nzĩanĩ.
44 Ũkambonokya kuma vala ve andũ makwa ala mamanthĩaa mavĩtyo.
Ũkanzũvĩa nĩthĩwe mũtongoi wa mbaĩ mbingĩ;
Andũ ndesĩ makanthũkũma.
45 Andũ aeni makooka mengʼuthĩte mbee wakwa;
Makambĩwʼa nũndũ wa maũndũ ala makewʼa ĩũlũ wakwa.*
46 Andũ aeni makathelwa nĩ ũkũmbaũ;*
Makooka matetemete kuma ngomenĩ syoo.
47 Yeova e thayũ! Nataĩwe, Ĩvia yakwa!
Ngai wa ĩvia ya ũtangĩĩo wakwa nanenevwʼe.
48 Ngai ũla wa w’o nũmbĩvanĩasya;
Nũkĩlasya vinya ngo sya andũ ikenyivya ungu wakwa;
49 Nũmbonokasya kuma vala ve amaitha makwa.
Nũmbũkĩlasya ĩũlũ wa ala mambithũkĩaa;
Nũndangĩĩaa kuma vala ve mũndũ mũngʼendu.
50 Nĩkyo kĩtumi ngaũtũngĩa mũvea, ame Yeova, nĩ katĩ wa mbaĩ,
Na ngaina mbathi sya kũtaĩa ĩsyĩtwa yaku:*