Kwa Aevelania

12 Kwoou nũndũ nĩtũthyũlũlũkĩtwe nĩ ngũsĩ singĩvĩte ũu, * ekai twĩkye ũtee kĩla ũito na naĩ ĩla ĩtũvĩngĩsaa na mĩtũkĩ, na ekai tũsembe na wũmĩĩsyo masindanonĩ ma kũsemba ala me mbee witũ, 2 tũmũsyaĩtye nesa Mũtongoi Mũnene na Mwĩanĩsya wa mũĩkĩĩo witũ, Yesũ. Ũla kwondũ wa ũtanu ũla waiĩtwe mbee wake woomĩĩisye mũtĩ wa mathĩna, * avũthya nthoni, na yu ekalĩte nthĩ kwʼokonĩ kwa aũme kwa kĩvĩla kya ũsumbĩ kya Ngai. 3 Sũanĩai mũno ĩũlũ wa ũla woomĩĩisye ndeto ithũkĩte ũu kuma kwa eki ma naĩ, maineena ndeto itonya kũmasilĩla mo ene, nĩ kana mũikanoe na kũkwʼa ngoo.

4 Nthĩnĩ wa kũngʼangʼana kwenyu na naĩ ĩsu, mũinamba kũngʼangʼana nginya mũketĩkya nthakame. 5 Na nĩmũlĩtwe vyũ nĩ ũtao ũla ũneenaa nenyu ta ana, ũkyasya: “Mwana wakwa, ndũkavũthĩĩsye ũkanyʼo kuma kwa Yeova, o na ndũkakwʼe ngoo yĩla ũũlũngwa nĩwe; 6 nũndũ ala Yeova wendete nũmakanasya, ĩĩ, nũmũkũnaa kĩvoko mũndũ o na wĩva ũla we wamwosa ethĩwe mwana wake.”

7 Nĩmwaĩle kũmĩĩsya na mũyona ĩsu ta nzĩa ĩmwe ya kũlũngwa. * Ngai amwosaa inywʼĩ ta ana. Nũndũ nĩ mwana wĩva ũtakanawʼa nĩ ĩthe wake? 8 Ĩndĩ ethĩwa inywʼonthe mũyaakanwʼa kwa nzĩa ĩsu, mũi ana make ma wʼo, ĩndĩ mwĩ syana sya ũngĩ. 9 O na ĩngĩ, aa-ĩthe maitũ nĩmatũkanasya na nĩtwamanengae ndaĩa. Ithyĩ tyo twaĩle kũmwĩnyivĩsya na ngenda Ĩthe waitũ wa kĩ-veva * na tũyĩthĩwa thayũ? 10 Nũndũ nĩmatũkanisye o kwa ĩvinda ĩkuvĩ kwosana na maũndũ ala moonaa me maseo, ĩndĩ we atũkanasya nĩ kana tũtetheke na tũyĩthĩwa twĩ atheu o take. 11 Nĩ wʼo kana tũitanaa yĩla tũũkanwʼa, vandũ va ũu nĩtwĩwʼaa woo; ĩndĩ ĩtina ũkanyʼo ũetae mũuo na ũlũngalu kwa ala mamanyĩĩtwʼe nĩwʼo.

12 Kwoou lũlũmĩlyai moko ala maleelu na mau ala mate na vinya, 13 na endeeai kũlũngalya nzĩa kwondũ wa maaũ menyu, nĩ kana ĩmutha yĩla yonzu yĩikakitũke, ĩndĩ yĩvoe. 14 Manthai kwĩthĩwa na mũuo na andũ onthe na ũtheu ũla mũndũ waĩle kwĩthĩwa nawʼo nĩ kana emwona Mwĩaĩi. 15 Ĩsũvĩei mũno nĩ kana vaikethĩwe o na ũmwe wenyu ũemwa nĩ kũkwata ũseo mwingĩ wa Ngai, nĩ kana vaikese kumĩla mwĩi wĩ na sumu katĩ wenyu na kũete ithokoo, na aingĩ maivukwʼa nĩwʼo. 16 Na mũyĩsũvĩa vaikese kwĩthĩwa o na ũmwe wenyu kĩlaalai * kana mũndũ o na wĩva ũtosaa maũndũ ma kĩ-veva kwa ũito, ta Esau, ũla wanenganie ũtiĩwa wake ta we mwana wa mbee nĩ kana akwate kyaũya kĩmwe. 17 Nũndũ nĩmwĩsĩ kana ĩtina yĩla wendie kũkwata ũathimo, ndaaũkwata; nĩkwĩthĩwa o na kau nĩwatatie kũalyũla woni wa ĩthe etĩte methoi, ũu ndwaatonyeka.

18 Nũndũ mũyaathengeea kĩndũ kĩtonya kũkiitwa, kyakanĩte mwaki, kĩ na ĩtu yiũ na kĩvindu kingĩ na kĩuutani, 19 na wasya mũnene wa soo na wasya waneenaa ndeto, ũla andũ mawĩwʼa meesũvanie maikatavwʼe ũndũ ũngĩ o na ũmwe. 20 Nũndũ mayaĩ matonya kũmĩĩsya mwĩao ũla waĩtye: “O na nyamũ yavũũsya kĩĩma kĩu, no nginya ĩkimangwe na mavia.” 21 O na ĩngĩ, ũndũ ũla woonekie waĩ wa kũtelemya mũno nginya Mose asya atĩĩ: “Nĩ na wia na nĩngũtetema.” 22 Ĩndĩ nĩmũthengeeete Kĩĩma kya Saioni na ndũa ya Ngai ũla wĩ thayũ, Yelusaleme ya ĩtunĩ, na ngili mbingĩ mũno sya alaĩka 23 mombanĩte vamwe, na kĩkundi kya ala masyaiwe mbee na ala maandĩkĩtwe ĩtunĩ, na Ngai Mũsili wa onthe, na thayũ wa kĩ-veva wa alũngalu ala matwʼĩkĩthiwʼe eanĩu, 24 na Yesũ mwĩwʼanĩthya wa ũtianĩo mweũ, na nthakame ĩla yaminzangiwʼe, ĩla ĩneenaa kwa nzĩa nzeo kũvĩtũka nthakame ya Aveli.

25 Sisyai mũikese kũlea kwĩthukĩĩsya ũla ũkũneena. Nũndũ ethĩwa ala maleile kũmwĩthukĩĩsya ũla wanenganae ũkanyʼo wa Ngai ĩũlũ wa nthĩ mayaavonoka, tũkavonoka ata ethĩwa tũkamũlea ũla ũneenaa kuma ĩtunĩ! 26 Ĩvinda yĩu wasya wake nĩwathingithisye nthĩ, ĩndĩ yu nĩwathanĩte ũũ: “Ngathingithya nthĩ o ĩngĩ, na ti o nthĩ yĩ yoka, ĩndĩ o vamwe na ĩtu.” 27 Yu ndeto, “o ĩngĩ,” syĩonanyʼa kũvetwa kwa syĩndũ ila iũthingithwʼa, ĩĩ, syĩndũ ila syaseũviwʼe, nĩ kana syĩndũ ila iteũthingithwʼa itiwe. 28 Kwoou, nũndũ tũkanengwa Ũsumbĩ ũla ũtatonya kũthingithwʼa, ekai tũendeee kũkwata ũseo mwingĩ, ũla kwĩsĩla kwawʼo tũtonya kũmũthũkũma Ngai ũthũkũmi mũtheu twĩ na kĩkĩo kya Ngai na wia. 29 Nũndũ Ngai waitũ nĩ mwaki ũla ũvĩvasya vyũ.