Motalo
30 Na ĩndĩ Mose aneena na aũngamĩi ma mbaĩ sya Isilaeli, ayasya: “Ũũ nĩwʼo Yeova ũmwĩaĩe: 2 Ethĩwa mũndũũme nĩwamwĩvĩtĩa Yeova kana nĩweeyĩava kwĩanĩsya* wĩvĩto wa kwĩyĩima, no nginya eanĩsye ndeto yake. Aĩlĩte kwĩka kyonthe kĩla weevĩta kwĩka.
3 “Na ethĩwa mũndũ mũka nĩwamwĩvĩtĩa Yeova kana nĩweevĩta wĩvĩto wa kwĩyĩima e wa mũika na e o nyũmbanĩ ya ĩthe wake 4 na ĩthe ayĩwʼa wĩvĩto wake kana wĩvĩto ũla weevĩta wa kwĩyĩima na ĩthe wake aiema kũleana nake, wĩvĩto o na wĩva ũla weevĩta wĩendeea kwĩthĩwa ũmwovete, na wĩvĩto o na wĩva ũla weevĩta wa kwĩyĩima wĩendeea kwĩthĩwa ũmwovete. 5 Ĩndĩ ĩthe eewʼa wĩvĩto wake kana eewʼa nĩweevĩta kwĩyĩima ũndũ mũna na aimũvata, wĩvĩto wake ndwĩendeea kũmwova. Yeova nũkũmũekea mũndũ mũka ũsu nũndũ ĩthe wake nĩwamũvata.
6 “Ĩndĩ ethĩwa nĩwatwawa e o mwove nĩ wĩvĩto wake kana nĩ watho ũla wathanie atasũanĩĩte 7 na mũũme wake aiwĩwʼa na ailea kũmũvata mũthenya ũla wawĩwʼa, wĩvĩto o na wĩva ũla wĩvĩtĩte kana wĩvĩto o na wĩva wa kwĩyĩima ũla wĩvĩtĩte wĩendeea kwĩthĩwa ũmwovete. 8 Ĩndĩ ethĩwa mũthenya ũla mũũme wawĩwʼa nĩwamũvata, mũũme no aũngamye wĩvĩto ũsu kana watho ũla wathanie atasũanĩĩte, na Yeova nũkũekea mũndũ mũka ũsu.
9 “Ethĩwa mũndũ mũka nĩ ndiwa kana mũtwaano wake nĩ mũthasye na nĩweevĩta, wĩvĩto o na wĩva ũla weevĩta wĩĩthĩwa ũmwovete.
10 “Ĩndĩ ethĩwa mũndũ mũka nĩweevĩta wĩvĩto kana nĩweevĩta wĩvĩto wa kwĩyĩima e o nyũmbanĩ ya mũũme 11 na mũũme wake aiwĩwʼa na ailea kũmũvata kana kũleana nake, wĩvĩto o na wĩva ũla weevĩta kana wĩvĩto o na wĩva wa kwĩyĩima ũla weevĩta wĩendeea kwĩthĩwa ũmwovete. 12 Ĩndĩ wĩvĩto o na wĩva ũla weevĩta kana wĩvĩto o na wĩva wa kwĩyĩima ũla weeyĩava ndwĩendeea kwĩthĩwa ũmwovete kuma mũthenya ũla mũũme wawĩwʼa na awũũngamya vyũ. Mũũme wake nĩwawũũngamya, na Yeova nũkũekea mũndũ mũka ũsu. 13 Ethĩwa mũndũ mũka nĩweevĩta wĩvĩto o na wĩva kana ethĩwa nĩweeyĩava kwĩanĩsya wĩvĩto o na wĩva wa kwĩyĩima,* mũũme nĩwe waĩle kũtwʼa nũkũwĩanĩsya kana nũkũwũũngamya. 14 Ĩndĩ ethĩwa mĩthenya nĩyaendeea kũvĩta na mũũme wake ndeũleana nake o na vanini, akeethĩawa amwĩtĩkĩlĩtye kwĩanĩsya wĩvĩto o na wĩva ũla wĩvĩtĩte kana wĩvĩto o na wĩva wa kwĩyĩima ũla wĩvĩtĩte. Mũũme akeethĩawa amwĩtĩkĩlĩtye nũndũ ndaaleana nake mũthenya ũla wamwĩwie ayĩvĩta. 15 Ĩndĩ mũũme aũngamya wĩvĩto wake ĩtina wa ĩvinda ĩna, ĩtina wa mũthenya ũla wawĩwie, nĩwe ũkaĩvĩa ĩvĩtyo ya mũka.
16 “Ĩsu nĩyo myolooto ĩla Yeova wamũnengie Mose ĩũlũ wa mũndũũme na mũka wake, na ĩũlũ wa mũndũũme na mwĩĩtu wake wa mũika ũla wĩkalaa nyũmbanĩ yake.”