Valũa wa Mbee kwa Akolintho
6 Ethĩwa ve ũmwe wenyu wĩ na ĩkoani na ũngĩ, nĩkĩ we ũendaa kotinĩ kwa andũ mate alũngalu vandũ va kũthi kwa ala atheu? 2 No mwĩsĩ kana atheu makasilĩla nthĩ? Na yu ethĩwa ninywʼĩ mwĩsilĩla nthĩ, no mwĩ na ũtonyi wa kũtwʼa sila ĩũlũ wa maũndũ asu manini? 3 No mwĩsĩ kana tũkasilĩla alaĩka? Na yu nĩkĩ mũtatonya kũtwʼa sila ĩũlũ wa maũndũ ma thayũ ũũ? 4 Na yu ethĩwa mwĩ na makoani ma mũthemba ũsu maĩle kũsilwa, nĩkĩ mũũmatwaĩa andũ matetĩkĩlĩtwe nĩ kĩkundi matwʼĩke asili menyu? 5 Nĩneena maũndũ asu nĩ kana mwĩwʼe nthoni. No ve mũndũ mũĩ katĩ wenyu ũla ũtonya kũtwʼa sila katĩ wa ana-a-asa make? 6 Vandũ va ũu, mwana-a-asa etwaa mwana-a-asa kotinĩ, na eka ũu kwa andũ mate etĩkĩli!
7 Vate nzika, ũu wĩonanyʼa kana nĩmũemetwe vyũ yĩla mũũtwaana kotinĩ inywʼĩ kwa inywʼĩ. Nĩkĩ mũte kũeka mũvĩtĩwʼe? Kana nĩkĩ mũte kũeka mũvenwe? 8 Vandũ va ũu, o na nĩmũũmavĩtĩsya na kũmavena ana-a-asa menyu!
9 No mwĩsĩ kana andũ mate alũngalu maikatiĩwa Ũsumbĩ wa Ngai? Mũikakengeke. Andũ ala ilaalai, * athaithi ma mĩvwʼanano, mathaaa, * aũme ala metusaa aka, aũme ala makomaa na aũme, * 10 ingʼei, andũ me ĩtomo, anywi, aumani, na avenani maikatiĩwa Ũsumbĩ wa Ngai. 11 Na amwe menyu tene mailye ũu. Ĩndĩ nĩmwathambiwʼe; nĩmwatheiwʼe, na nĩmũtalĩlwe ũlũngalu ĩsyĩtwanĩ ya Mwĩaĩi Yesũ Klĩsto na nthĩnĩ wa veva mũtheu wa Ngai.
12 Maũndũ onthe kwakwa nĩmetĩkĩlanĩte na mĩao, * ĩndĩ ti maũndũ onthe matethasya. Maũndũ onthe kwakwa nĩmosanĩte na mĩao, ĩndĩ ndikaeka nĩsumbĩkwe nĩ ũndũ o na wĩva. 13 Lĩu nĩ kwondũ wa ĩvu na ĩvu kwondũ wa lĩu, ĩndĩ Ngai akaitwʼĩkĩthya syonthe vathei. Mwĩĩ ti kwondũ wa ũlaalai * ĩndĩ nĩ kwondũ wa Mwĩaĩi, nake Mwĩaĩi nĩ kwondũ wa mwĩĩ. 14 Ĩndĩ Ngai nĩwamũthayũũkisye Mwĩaĩi na o naitũ akatũthayũũkya kwĩsĩla vinya wake.
15 Mũyĩsĩ kana mĩĩ yenyu nĩ mamutha ma Klĩsto? Kwoou, nĩnaĩle kwosa mamutha ma Klĩsto nĩmakwatanyʼe na ĩlwaya? Vaitonyeka! 16 Inywʼĩ mũyĩsĩ kana ũla wakoma na ĩlwaya ethĩawa mwĩĩ ũmwe nayo? Nũndũ aĩtye “me elĩ makeethĩwa mwĩĩ ũmwe.” 17 Ĩndĩ mũndũ o na wĩva ũla ũkwatanĩtwʼe na Mwĩaĩi nĩ mwĩĩ ũmwe vamwe nake nthĩnĩ wa veva. 18 Kĩai ũlaalai! * Naĩ o na yĩva ĩla mũndũ ũtonya kwĩka yĩ nza wa mwĩĩ wake, ĩndĩ mũndũ o na wĩva ũla wĩkaa ũlaalai ethĩawa aiwĩka naĩ mwĩĩ wake mwene. 19 No mwĩsĩ kana mwĩĩ wenyu nĩ ĩkalũ ya veva mũtheu ũla wĩ nthĩnĩ wenyu, ũla Ngai ũmũnengete? O na ĩngĩ mũi menyu ene, 20 nũndũ nĩmwathooiwe na thooa mũnene. Maũndũnĩ onthe mũtaĩei Ngai mĩĩnĩ yenyu.