7. Mĩao ya Ũsumbĩ wa Ngai nĩ mĩseo kwĩ mĩao ya andũ

Silikalĩ nĩsyumasya mĩao ya kũsũvĩa na kũtethya andũ kwa nzĩa syĩ kĩvathũkanyʼo. O nawʼo Ũsumbĩ wa Ngai nĩwĩthĩawa na mĩao ĩla ala masumbĩkĩtwe nĩwʼo maĩlĩte kũatĩĩa. Somai 1 Akolintho 6:9-11, na ĩndĩ mũineenea makũlyo aa:

• We wĩona nthĩ ta ĩkethĩwa yĩilye ata yĩla kĩla mũndũ ũkethĩwa ayĩatĩĩa mĩao ya Ngai ya mwĩkalĩle?a

• We nũkwona Yeova ta waĩlĩte kũtavya andũ manenge ndaĩa mĩao ya Ũsumbĩ wake? Nĩkĩ wasũngĩa ũu?

• Nĩ kyaũ kĩkwonanyʼa kana andũ ala mataatĩĩaa mĩao ĩsu no maalyũke?—Sisya mũsoa wa 11.

Andũ aingĩ mewʼaa mate eanĩe yĩla meũneenea maũndũ makonetye kũmanyana kĩ-mwĩĩ. Ĩndĩ o na ũu wĩ o vo, yĩla Mbivilia ĩkũneenea maũndũ makonetye kũmanyana kĩ-mwĩĩ, yĩkaa ũu ĩte kũvithanyʼa kĩndũ, ĩndĩ kwa nzĩa ya ndaĩa. Na kĩla yaĩtye nĩkĩtũtethasya. Vate nzika ũsu nĩ ũndũ ũkwosana na kĩlĩko, nũndũ Mbivilia yumĩte kwa Yeova, ũla nĩwe Mũmbi witũ. Nĩwĩsĩ kĩla kĩtwaĩlĩte vyũ. Na nũndũ wa ũu, nũtũtavasya kĩla twaĩle kwĩka nĩ kana tũmwendeesye, na nĩ kana twĩtanĩa thayũ tene na tene.

1. Yeova ethĩawa na woni wĩva ĩũlũ wa kũmanyana kĩ-mwĩĩ?

Yeova nĩwe ũnengete andũ mũthĩnzĩo wa kũmanyana kĩ-mwĩĩ. Endaa mũthĩnzĩo ũsu ũtanĩwe nĩ aũme na aka o ala matwaanĩte. Mũthĩnzĩo ũsu nũtumaa ala matwaanĩte methĩwa na syana, na ũkatuma monanyʼa wendo kwa nzĩa ĩla yaĩlĩte na ya kũtanĩthya. Na nĩkyo kĩtumi Ndeto ya Ngai yaĩtye atĩĩ: “Noitanĩa kĩveti kyaku kya ũthoo.” (Nthimo 5:18, 19) Yeova endaa Aklĩsto ala matwaanĩte methĩwe me aĩkĩĩku kwa ũla matwaanĩte nake, na kwoou mayaĩle kwĩka ũlaalai.—Soma Aevelania 13:4.

2. Ũlaalai nĩ kyaũ?

Mbivilia ĩtwĩĩte kana “andũ ala ilaalai . . . maikatiĩwa Ũsumbĩ wa Ngai.” (1 Akolintho 6:9, 10) Aandĩki ma Mbivilia ala maandĩkie na Kĩkiliki matũmĩie ndeto por·neiʹa kũelesya ũlaalai. Ndeto ĩsu yonanasya (1) kũmanyana kĩ-mwĩĩa katĩ wa andũ matatwaanĩte, (2) mũndũũme kũkoma na mũndũũme kana mũndũ mũka na mũndũ mũka, na (3) mũndũ kũmanyana kĩ-mwĩĩ na nyamũ. Nĩtũmũtanĩthasya Yeova, naitũ ene tũkatetheka ‘tweevathana na ũlaalai.’—1 Athesalonika 4:3.

ĨMANYĨSYE MŨNANGO

3. Kĩai ũlaalai

Mũndũũme ũmwe waĩ mũĩkĩĩku weetawa Yosevu, nĩwangʼangʼanie mũno nĩ kana aendeee kwĩthĩwa na mwĩkalĩle mũtheu. Somai Mwambĩlĩlyo 39:1-12, na ĩndĩ mũineenea makũlyo aa:

• Nĩ kyaũ kyatumie Yosevu akuthũka na kũthi nza?—Sisya mũsoa wa 9.

• We nũkwona Yosevu ta weekie ũtwi ũla waĩle? Nĩkĩ wasũngĩa ũu?

VITIO: Kĩa Ũlaalai (5:06)

Yeova eenda ithyonthe tũleane na ũlaalai. Somai 1 Akolintho 6:18, na ĩndĩ mũineenea makũlyo aa:

• Nĩ maũndũ meva matonya kũtuma mũndũ eka ũlaalai?

• Ũtonya ata kũkĩa ũlaalai?

4. Nũtonya kũsinda motato

VITIO: No Ũsinde Motato kwa Kũsoma Mbivilia (3:02)

• Yĩla mwana-a-asa ũsu twoona vitionĩ wamanyie kana mosũanĩo na meko make mesaa kũtuma ethĩwa ate mũĩkĩĩku kwa mũka eekie ata?

O na Aklĩsto aĩkĩĩku nĩmangʼangʼanaa mavinda amwe nĩ kana methĩwe na mosũanĩo matheu. Ũtonya kwĩka ata nĩ kana ndũkaendeee kũsũanĩa maũndũ mate matheu? Somai Avilivi 4:8, na ĩndĩ mũineenea makũlyo aa:

• Twaĩlĩte kũsũanĩaa ĩũlũ wa maũndũ ta meva?

• Kũsoma Mbivilia na kwĩthĩwa na maũndũ maingĩ ma kwĩka ũthũkũminĩ wa Yeova, kũtonya kũtũtetheesya ata tũsinde ĩtatwa ya kwĩka naĩ?

5. Myolooto ya Yeova nĩtũtethasya

VITIO: Ndũkethĩwe Ũte na Ũmanyi (9:31)

• Mwanake ũsu eekie ũndũ wĩva watuma alika ĩtatwanĩ?—Sisya Nthimo 7:7-9.

• Kwosana na Nthimo 7:23, 26, ũlaalai no ũlikye mũndũ mathĩnanĩ manene. Tũtonya kwĩvathana na mathĩna ta meva tweethĩwa na mwĩkalĩle mũtheu?

• Tweethĩwa na mwĩkalĩle mũtheu tũkakwata moathimo meva ĩvinda yũkĩte?

Andũ amwe maasya kana ti ũndũ wa wendo kwĩthĩwa Mbivilia ĩleete aũme maikoma na aũme na aka maikoma na aka. Ĩndĩ Yeova, ũla nĩ Ngai wĩ wendo, endaa andũ onthe metanĩa thayũ tene na tene. Nĩ kana twĩtanĩa ũathimo ũsu, no nginya twĩkalae kwosana na mĩao yake. Somai 1 Akolintho 6:9-11, na ĩndĩ mũineenea ĩkũlyo yĩĩ:

• Kwosana na Ngai, wendi wa aũme kũkoma na aũme kana aka kũkoma na aka, nowʼo mũthũku wĩ wʼoka?

Nĩ kana tũmwendeesye Ngai, ithyonthe nĩtwaĩle kwĩka moalyũku. Tũkatetheka tweeka ũu? Somai Savuli 19:8, 11, na ĩndĩ mũineenea makũlyo aa:

• We nũkwona mĩao ya Yeova ya mwĩkalĩle ta yĩ vinya mũno kũatĩĩa? Nĩkĩ wasũngĩa ũu?

KĨLA TWEEMANYĨSYA

Yeova nĩwe ũnengete mũũme na mũka mũthĩnzĩo wa kũmanyana kĩ-mwĩĩ nĩ kana maũtanĩe.

Makũlyo ma Kũsyokeleela

• Ũlaalai ũkonetye maũndũ meva?

• Nĩ kyaũ kĩtonya kũtũtetheesya twĩvathane na ũlaalai?

• Tũtethekaa ata yĩla twaatĩĩa myolooto ya Yeova ya mwĩkalĩle?

MAŨNDŨ ANGĨ MA KWĨMANYĨSYA

Ĩmanyĩsye wone nĩkĩ Ngai wendaa mũndũũme na mũndũ mũka, ala mekwenda kwĩkalanyʼa ĩmwe, matwaane kwosana na mĩao.

“Mbivilia Yaĩtye Ata Ĩũlũ wa Mũndũũme na Mũndũ Mũka Kwĩkalanyʼa Ĩmwe Matatwaanĩte?” (Ũvoo wĩ kĩsesenĩ)

Ĩmanyĩsye wone nĩkĩ mwolooto wa Mbivilia ũla ũkonetye aũme kũkoma na aũme na aka kũkoma na aka, ũtonanasya kana twaĩle kũmena ala mekaa ũu.

“Ve Ũthũku Aũme Kũkoma na Aũme Kana Aka Kũkoma na Aka?” (Ũvoo wĩ kĩsesenĩ)

Ĩmanyĩsye wone ũndũ mĩao ya Ngai ĩla ĩkonetye kũmanyana kĩ-mwĩĩ ĩtũsũvĩaa.

“Kwʼo Kũmanyana Kĩ-mwĩĩ Kwĩsĩla Mũnuka Nĩ Kũthũku?” (Ũvoo wĩ kĩsesenĩ)

Nthĩnĩ wa ngewa yĩ na kyongo, “Manguie Nesa Mũno,” soma wone kĩla kyatetheeisye mũndũũme ũmwe wakomaa na aũme avĩndũa mwĩkalĩle wake nĩ kana amwendeesye Ngai.

“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 4, 2011)

Ĩũlũ wa nthĩ, andũ methĩawa na mawoni me kĩvathũkanyʼo ĩũlũ wa ũkĩ. Amwe nĩmanyuvaa kũnywʼa na anyanya moo mavinda kwa mavinda. Angĩ nĩmanyuvaa kũlea kũnywʼa o na ĩndĩĩ. Namo angĩ nĩmanyusaa mũno nginya makamilwa vyũ. Mbivilia yĩthĩawa na woni mwaũ ĩũlũ wa ũkĩ?

1. Nĩ ũthũku kũnywʼa ũkĩ?

Mbivilia ndyaĩtye kana nĩ ũthũku kũnywʼa ũkĩ. Vandũ va ũu, yĩla ĩkũtalanyʼa syĩndũ mbingĩ nzeo ila Ngai ũtũnengete, nĩwetaa “mbinyu ĩla ĩtanasya ngoo ya mũndũ.” (Savuli 104:14, 15) Aũme na aka amwe aĩkĩĩku mawetetwe Mbivilianĩ nĩmanyusaa ũkĩ.—1 Timotheo 5:23.

2. Nĩ ũtao mwaũ Mbivilia ĩnengete ala manyuva kũnywʼa ũkĩ?

Yeova nũmenete ũnywi na ũthengi. (Akalatia 5:21) Ndeto yake yaĩtye: “Ndũkethĩwe katĩ wa anywi ma mbinyu.” (Nthimo 23:20) Kwoou ethĩwa nĩtwanyuva kũnywʼa, o na ethĩwa twĩnywʼa twĩ ithyoka, tũyaĩle kũnywʼa mũno nginya ũkethĩa tũyĩsa kũsũanĩa nesa, kũsiĩĩa ndeto na meko maitũ, kana kũsũvĩa ũima witũ wa mwĩĩ. Ethĩwa tũitonya kũthima ũndũ tũnyusaa ũkĩ, nĩtwaĩle kwĩthĩwa twĩyũmbanĩtye kũekana nawʼo vyũ.

3. Tũtonya ata kũnenga ndaĩa ũtwi wa ala angĩ ĩũlũ wa ũkĩ?

Kĩla mũndũ nĩwe waĩle kwĩtwʼĩĩa ethĩwa nũkũnywʼa ũkĩ. Tũyaĩle kũsilĩla mũndũ ũla watwʼa kũnywʼa ũkĩ kwa kĩthimo, o na tũyaĩle kũthingʼĩĩsya mũndũ anywʼe ate kwenda. (Alomi 14:10) O na eka ũu, nĩtũnyuvaa kũlea kũnywʼa ethĩwa kwĩka ũu no kũtume ala me vakuvĩ naitũ mewʼa mate eanĩe. (Soma Alomi 14:21.) Tũimanthaa ‘kwĩyĩuna ene, ĩndĩ tũmanthaa kũuna ũla ũngĩ.’—Soma 1 Akolintho 10:23, 24.

ĨMANYĨSYE MŨNANGO

4. Twʼa ethĩwa nũũnywʼa ũkĩ

Yesũ oonaa kũnywʼa ũkĩ ata? Nĩ kana ũmanye ũsũngĩo, sũanĩa kyama kya mbee kĩla weekie. Somai Yoana 2:1-11, na ĩndĩ mũineenea makũlyo aa:

• Nthĩnĩ wa kyama kĩu, tũtonya kwĩmanyĩsya kyaũ ĩũlũ wa woni wa Yesũ kwelekela ũkĩ na ala maũnyusaa?

• Nũndũ Yesũ ndaavatana ũkĩ, Mũklĩsto aĩle kwonaa ata mũndũ ũla wanyuva kũũnywʼa?

O na kau Mũklĩsto e na ũthasyo wa kũnywʼa ũkĩ, ũu ti kwasya kana mavinda onthe nĩwaĩlĩte kwĩka ũu. Somai Nthimo 22:3, na ĩndĩ mũineenea ũndũ maũndũ aa maatĩĩe matonya kũtuma ũtwʼa nũũnywʼa kana ndwĩnywʼa ũkĩ:

• Ethĩwa nũũtwaa ngalĩ kana kũtũmĩa masinĩ.

• Ethĩwa wĩ mũito.

• Ethĩwa ndakĩtalĩ nũnakũvatie kũnywʼa ũkĩ.

• Ethĩwa wĩ na thĩna wa kwĩsiĩĩa wĩnywʼa kĩthimo kĩana ata.

• Ethĩwa mĩao ndĩũkwĩtĩkĩlya kũnywʼa ũkĩ.

• Ethĩwa wĩ na mũndũ ũnyuvĩte kũeka kũnywʼa nũndũ anaĩ na thĩna wa kũnywʼa ũkĩ mwingĩ navu tene.

Nĩwaĩle kũnengane ũkĩ mbokanĩ sya alũsi kana syathĩnĩ ingĩ ta isu? Nĩ kana wone ũndũ ũmwe ũtonya kũũtethya kwĩka ũtwi, ĩloelei VITIO.

VITIO: Nĩvaĩle Kwĩthĩwa na Ũkĩ Mbokanĩ Yakwa? (2:41)

Somai Alomi 13:13 na 1 Akolintho 10:31, 32. Ĩtina wa kũsoma kĩla ĩandĩko, neeneai ĩkũlyo yĩĩ:

• Kũtũmĩa mwolooto ũũ kũtonya kũũtethya ata wĩke ũtwi ũũmwendeesya Yeova?

5. Twʼa ũkanyusaa ũkĩ wĩana ata

Watwʼa kana ũkanyusaa ũkĩ, lilikana ũndũ ũũ: O na kau Yeova ndatũvatĩte kũnywʼa ũkĩ, nũmenete ũthengi. Nĩkĩ? Somai Osea 4:11, 18, na ĩndĩ mũineenea ĩkũlyo yĩĩ:

• Vatonya kũthi ata mũndũ anywʼa ũkĩ mwingĩ?

Nĩ kyaũ kĩtonya kũtũtetheesya tũikanyusae ũkĩ mwingĩ? Nĩtwaĩle kwĩthĩwa na wĩtingʼo nĩ kana tũikavĩtũkae mĩvaka ĩla twĩyĩkĩĩe. Somai Nthimo 11:2, na ĩndĩ mũineenea ĩkũlyo yĩĩ:

• Nĩkĩ nĩ ũndũ mũseo kwĩyĩkĩĩaa mĩvaka ĩũlũ wa tũkanyusaa ũkĩ wĩana ata?

6. Nĩ kyaũ kĩtonya kũtũtetheesya tũekae kũnywʼa ũkĩ mwingĩ?

VITIO: ‘Neewʼaa Nakwie Ngoo Vyũ’ (6:32)

• Kwosana na ũndũ twoona vitionĩ, Dmitry eekaa ata yĩla wanywʼa ũkĩ?

• Yĩla watwie kũeka kũnywʼa, aekie o vau kwa vau?

• Nĩ kyaũ kyesie kũmũtetheesya aeka kũnywʼa ũkĩ mũno?

Somai 1 Akolintho 6:10, 11, na ĩndĩ mũineenea makũlyo aa:

• Mbivilia yaĩtye ata ĩũlũ wa kũnywʼa mũno?

• Nĩ kyaũ kĩkwonanyʼa kana mũndũ ũnyusaa ũkĩ mũno no aalyũke?

Somai Mathayo 5:30, na ĩndĩ mũineenea ĩkũlyo yĩĩ:

• Kũtila kwʼoko kwonanasya kana mũndũ nĩwaĩle kwĩyĩima maũndũ mana nĩ kana amwendeesye Yeova. Ũtonya kwĩka ata ethĩwa ũendeee kũngʼangʼana ũsinde kĩmanyĩo kya kũnyusaa ũkĩ mũno?a

Somai 1 Akolintho 15:33, na ĩndĩ mũineenea ĩkũlyo yĩĩ:

• Vatonya kũthi ata ethĩwa ũtindanasya na andũ manyusaa ũkĩ mũno?

KĨLA TWEEMANYĨSYA

Yeova atũnengie ũkĩ nĩ kana twĩtanĩthye, ĩndĩ nũmenete ũnywi na ũthengi.

Makũlyo ma Kũsyokeleela

• Woni wa Mbivilia nĩ mwaũ ĩũlũ wa ũkĩ?

• Kũnywʼa ũkĩ mwingĩ kũtonya kũtũetee mathĩna meva?

• Tũtonya kwonanyʼa ata kana nĩtũnengete ndaĩa motwi ma ala angĩ ĩũlũ wa kũnywʼa ũkĩ?

MAŨNDŨ ANGĨ MA KWĨMANYĨSYA

Andũ ma mũika matonya kwĩka motwi maseo ata makonetye ũkĩ?

Sũanĩa Kelĩ Ũtanamba Kũnywʼa (2:31)

Soma nĩ kana wone matambya ala ũtonya kwosa ũsinde kĩmanyĩo kya kũnyusaa ũkĩ mwingĩ.

“Ndũkasumbĩkwe Nĩ Ũkĩ” (Mũsyaĩĩsya, Ĩtukũ 1, Mwei wa 1, 2010)

Mũklĩsto nĩwaĩle kũatĩĩa kĩthĩo kya kũtinanyʼa ngilasi?

“Makũlyo Kuma kwa Asomi Maitũ” (Mũsyaĩĩsya, Matukũ 15, Mwei wa 2, 2007)

Nthĩnĩ wa ngewa yĩ na kyongo “Nanyusaa Ũkĩ Mwingĩ Mũno,” soma wone ũndũ mũndũũme ũmwe wasindie kĩmanyĩo kya kũnyusaa ũkĩ mũno.

“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 5, 2012)

O na kau nũmwendete Yeova mũno, na nũtataa ũndũ ũtonya wĩvathane na maũndũ ala matonya kũmũũmĩsya, mavinda kwa mavinda ndũlea kũvĩtya. Ĩndĩ o na vailye ũu, naĩ imwe nĩ ngito kwĩ ingĩ. (1 Akolintho 6:9, 10) Yĩla weeka naĩ ngito, lilikana kana Yeova ndanaeka kũkwenda na nĩwĩyũmbanĩtye ũkũekea na ayĩũtetheesya.

1. No nginya twĩke ata nĩ kana Yeovaatũekee?

Ala mamwendete Yeova nĩmaũmĩaa mũno mamanya kana nĩmekie naĩ ngito. Ĩndĩ nĩmewʼaa makiakiwʼa mũno nĩ ndeto ii Yeova watavisye andũ make: “O na ethĩwa naĩ syenyu nĩ ndune mũno, ikeethĩwa nzaũ ta ĩa.” (Isaia 1:18) Tweelila kuma ngoonĩ, Yeova akatũekea vyũ. Twĩlilaa ata? Nĩtwĩwʼaa twaũmĩa mũno nũndũ wa naĩ ĩla twĩkĩte na kĩu kĩitũsukuma tũmwĩsũve Yeova nĩ kana atũekee. Ĩtina wa ũu, nĩtwĩkĩaa kĩthito tũvĩndũe mosũanĩo mataĩle kana meko ala matumie tũlika naĩnĩ, na ĩndĩ tũitata ũndũ tũtonya twĩkale kwosana na myolooto mĩtheu ya Yeova.—Soma Isaia 55:6, 7.

2. Yeova atũmĩaa atumĩa ata kũtũtetheesyayĩla tweeka naĩ?

Yĩla tweeka naĩ ngito, Yeova atwĩĩte ‘tũmete atumĩa ma kĩkundi.’ (Soma Yakovo 5:14, 15.) Aũme asu nĩmamwendete Yeova vamwe na malondu make. Na nĩmamanyĩĩtwʼe ũndũ matonya kũtũtetheesya tũtũngĩĩe ngwatanĩo yitũ vamwe na Yeova.—Akalatia 6:1.

Atũmĩa matũtetheeasya ata yĩla tweeka naĩ ngito? Atũmĩa elĩ kana atatũ nĩmalũngaa ũla wĩkĩte naĩ matũmĩĩte Maandĩko. O na nĩmamũnengae ũtao ũtonya kũmũtethya na maimwĩkĩa vinya nĩ kana ndakasyokee naĩ ĩngĩ. Ĩndĩ ethĩwa mũndũ ũla wĩkĩte naĩ ndekwenda kwĩlila, atumĩa nĩmamũvetaa kĩkundinĩ nĩ kana masũvĩane ala angĩ kĩkundinĩ na mwĩkalĩle ũtaĩle.

ĨMANYĨSYE MŨNANGO

3. Kumbũla naĩ nĩkũtũngĩĩaa ngwatanĩo yitũ vamwe na Yeova

Yĩla tweeka naĩ, twĩthĩawa twamũvĩtĩsya Yeova, na kwoou twaĩle kumbũla naĩ sitũ vala ũĩ. Somai Savuli 32:1-5, na ĩndĩ mũineenea ĩkũlyo yĩĩ:

• Nĩkĩ nũseo mũno kumbũla naĩ sitũ vala ve Yeova, vandũ va kũtata kũivitha?

VITIO: “Ala Yeova Wendete Nũmakanasya” (3:01)

• O tondũ twoona vitionĩ, atumĩa matetheeisye Canon ata nĩ kana amũsyokee Yeova?

Nĩtwaĩle kũmatavya atumĩa maũndũ onthe tũte kũmavitha kĩndũ nũndũ methĩawa mayenda kũtũtetheesya. Somai Yakovo 5:16, na ĩndĩ mũineenea ĩkũlyo yĩĩ:

• Nĩ kwa nzĩa yĩva wĩthĩawa wĩ ũndũ wĩ laisi kwa atumĩa kũtũtetheesya yĩla twalea kũmavitha kĩndũ o na kĩmwe?

4. Yeova nĩwĩwʼĩaa eki ma naĩ tei

Yĩla mũndũ weeka naĩ ngito na alea kũatĩĩa myolooto ya Yeova, nũvetawa kĩkundinĩ, na nĩtũekaa kũtindanyʼa nake. Somai 1 Akolintho 5:6, 11, na ĩndĩ mũineenea ĩkũlyo yĩĩ:

• O tondũ ĩlawa yĩkaatasya mũtu, kũtindanyʼa na mwĩki wa naĩ ũte kwĩlila kũtonya kũtuma maũndũ methĩwa mailye ata kĩkundinĩ?

Ũndũ Yeova ũkuaa eki ma naĩ kwonanasya ata kana e tei, wendo na ndaũmaa vamwe ta mbili?

5. Yeova nũtũekeaa yĩla tweelila

Yesũ nĩwatũmĩie ngelekanyʼo ĩtonya kũtũtetheesya kũelewa ũndũ Yeova wĩwʼaa yĩla mũndũ weelila. Somai Luka 15:1-7, na ĩndĩ mũineenea ĩkũlyo yĩĩ:

• Kĩu twasoma kyaũmanyĩsya kyaũ ĩũlũ wa Yeova?

Somai Esekieli 33:11, na ĩndĩ mũineenea ĩkũlyo yĩĩ:

• Nĩ ĩtambya yĩva ya vata twaĩle kwosa twonanyʼe kana kwa wʼo nĩtwĩlilĩte?

KĨLA TWEEMANYĨSYA

Yĩla tweeka naĩ ngito, tweelila kuma ngoonĩ na tweekĩa kĩthito tũtie mũendele ũsu ũtaĩle, Yeova akatũekea.

Makũlyo ma Kũsyokeleela

• Nĩkĩ nũseo kumbũla naĩ sitũ kwa Yeova?

• Twaĩle kwĩka ata nĩ kana Yeova atũekee naĩ sitũ?

• Yĩla tweeka naĩ ngito, nĩkĩ twaĩle kũmantha ũtethyo kwa atumĩa ma kĩkundi?

MAŨNDŨ ANGĨ MA KWĨMANYĨSYA

Ĩloele vitio wone ũndũ Yeova woonisye mũndũũme ũmwe tei wake, o tondũ vaeleetwʼe nthĩnĩ wa Isaia 1:18.

Ndũkaaĩthĩwe na Nzika na Tei wa Yeova (5:02)

Atumĩa matetheasya ata ala meeka naĩ ngito?

“Ũndũ Atumĩa Monanasya Kana Nĩmendete Eki ma Naĩ na Nĩmamewʼĩaa Tei” (Mũsyaĩĩsya, Mwei wa 8, 2024)

Ĩmanyĩsye ũndũ eki ma naĩ ala malea kwĩlila monawʼa wendo na tei.

“Ũndũ Atumĩa Matonya Kũtetheesya Ala Mavetetwe Kĩkundinĩ” (Mũsyaĩĩsya, Mwei wa 8, 2024)

Ngewanĩ yĩ na kyongo, “Nĩne- ndaa Kũmũsyokea Yeova,” soma wone ũndũ mũndũũme ũmwe watiĩte ũwʼo weewie Yeova aimũkusya asyoke kĩkundinĩ.

“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 4, 2012)