Kwa Aevelania

13 Endeeai kwĩthĩwa na wendo wa ana-a-asa. 2 Mũikolwe nĩ kũthokasya aeni, nũndũ kwa kwĩka ũu amwe nĩmathokisye alaĩka matesĩ. 3 Endeeai kũmalilikana ala me yela, * ta mwovetwe vamwe namo, na ala maendeee kũthĩnwʼa, nũndũ o nenyu mwĩ o na mwĩĩ. * 4 Mũtwaano nũnengwe ndaĩa nĩ andũ onthe, na kĩtanda kya mũtwaano kĩthĩwe kĩte kĩvuku, nũndũ Ngai akasilĩla ilaalai * na mathaaa. * 5 Ĩthĩwai mũte na wendi wa mbesa thayũnĩ wenyu, ĩndĩ ĩanĩwai nĩ syĩndũ ila mwĩ nasyo. Nũndũ aĩtye: “Ndikakũtia nongi, na ndikakũeka nongi.” 6 Nĩ kana twĩthĩwe na ũkũmbaũ mũnene, na kwasya: “Yeova nĩwe mũtetheesya wakwa; ndikakĩa kĩndũ. Mũndũ atonya kũmbĩka ata?”

7 Malilikanei ala matongoetye katĩ wenyu, ala mamũtavisye ndeto ya Ngai, na o mũendeee kũsũanĩa ĩũlũ wa maũndũ maseo ala maumanaa na mwĩkalĩle woo, atĩĩai ngelekanyʼo yoo ya mũĩkĩĩo.

8 Yesũ Klĩsto nowe ũla ĩyoo na ũmũnthĩ, na tene na tene.

9 Mũikelelũkwʼe nĩ momanyĩsyo ma mĩthemba mingĩ na maeni, nũndũ nĩ kavaa ngoo kũlũlũmĩlwʼa nĩ ũseo mwingĩ kwĩ kũlũlũmĩlwʼa nĩ malĩu, * nĩkwĩthĩwa maitethasya ala monaa malĩu tamo syĩndũ ila sya vata.

10 Twĩ na kĩthembeo, na ala mathũkũmaa ũthũkũmi mũtheu ĩeemanĩ mayĩtĩkĩlĩtwʼe kũya kuma vo. 11 Nũndũ mĩĩ ya nyamũ ila mũthembi mũnene ũtwaaa nthakame yasyo vala vandũ vatheu yĩthĩwe nthembo ya naĩ ĩvĩvĩawʼa nza wa kambi. 12 Kwoou, Yesũ o nake athĩnĩiwʼe nza wa mũvĩa wa ndũa nĩ kana athesye andũ na nthakame yake mwene. 13 Kwondũ wa ũu, tũendei vala ũĩ nza wa kambi, na o tondũ we woomĩĩisye kũvũthwʼa o naitũ nĩtũmĩĩsye, 14 nũndũ vaa tũi na ndũa ĩtatonya kwanangĩka, ĩndĩ twĩmantha na kĩthito ĩla ĩkoka. 15 Na kwĩsĩla kwake ekai kĩla ĩvinda tũmumĩasye Ngai nthembo ya ũtaĩo, nayo nĩ ũsyao wa ilomo sitũ ila itavanasya ũtheinĩ ĩsyĩtwa yake. 16 O na ĩngĩ, mũikolwe nĩ kwĩka nesa na kũtetheesya angĩ na syĩndũ ila mwĩ nasyo, nũndũ Ngai nĩwendeeawʼa mũno nĩ nthembo ta isu.

17 Ĩthĩwai mwĩ ewi kwa ala matongoetye katĩ wenyu na mũyĩthĩwa mwĩnyivĩtye, nũndũ nĩmamũsũvĩaa inywʼĩ * na makaumya ũtalo ũndũnĩ ũsu, nĩ kana meke ũu me na ũtanu na ti me na kyeva, nũndũ ũndũ ũsu ũkatuma mũũmĩa.

18 Endeeai kũtũvoyea, nũndũ nĩtũĩkĩĩĩte kana twĩ na wasya mũseo wa ngoo, na twĩenda kwĩthĩwa twĩ aĩkĩĩku maũndũnĩ onthe. 19 Ĩndĩ mũno mũno nĩngũmwĩsũva mũmboyee nĩ kana nĩsyoke kũla mũĩ mĩtũkĩ.

20 Na yu Ngai wa mũuo, ũla wamũthayũũkisye mũĩthi mũnene wa malondu, Mwĩaĩi waitũ Yesũ, na nthakame ya ũtianĩo wa tene na tene, 21 amũnenge syĩndũ syonthe nzeo nĩ kana mwĩke kwenda kwake, ũla kwĩsĩla Yesũ Klĩsto ũtumaa twĩka maũndũ ala mendeeasya methonĩ make, nake nataĩwe tene na tene. Ameni.

22 Na yu, ana-a-asa, nĩenda mwĩthukĩĩsye nesa ndeto ii sya kũmũthangaasya, nũndũ namũandĩkĩa valũa mũkuvĩ. 23 Nĩenda mũmanye kana mwana-a-asa waitũ Timotheo nũnathaiwʼe. Ethĩwa nũkũka mĩtũkĩ, ngeethĩwa vamwe nake yĩla nĩmwona inywʼĩ.

24 Ngethesyei onthe ala matongoetye katĩ wenyu o vamwe na atheu onthe. Ala me Italia nĩmamũkethya.

25 Ũseo mwingĩ nĩwĩthĩwe vamwe nenyu inywʼonthe.