Valũa kwa Akolosai
3 Ĩndĩ ethĩwa mwathayũũkiw’e vamwe na Klĩsto, endeeai kũmantha maũndũ ala me ĩũlũ, vala Klĩsto wĩkalĩte nthĩ kw’okonĩ kwa aũme kwa Ngai. 2 Endeeai kũsũanĩa maũndũ ala me ĩũlũ, na ti maũndũ ala me kũũ nthĩ. 3 Nũndũ nĩmwakwie, na thayũ wenyu wĩ mokonĩ ma Klĩsto kwosana na kwenda kwa Ngai. 4 Yĩla Klĩsto ũkaumĩlw’a, nake nĩwe thayũ witũ, o nenyu mũkaumĩlw’a vamwe nake ũtheunĩ wake mũtisu.
5 Kwoou ũaai mamutha menyu maũndũnĩ makonetye ũlaalai, * ũvuku, mĩmeo ĩtasiĩĩka ya kũmanyana kĩ-mwĩĩ, wendi mũthũku, na ĩtomo, yĩla nĩ ũthaithi wa mĩvw’anano. 6 Nũndũ wa maũndũ asu, ũthilĩku wa Ngai nĩwũkĩte. 7 Na ũu now’o mwĩkalĩle wenyu waĩlye tene. 8 Ĩndĩ yu vetai maũndũ aa onthe kuma vala mũĩ: ũthilĩku, ũthatu, ũthũku, kũumana, na mũiveta ndeto nthũku kanyw’anĩ wenyu. 9 Mũikakengane ene kwa ene. Umyai mwĩkalĩle wa tene na meko maw’o, 10 na ĩvw’ĩkei mwĩkalĩle mweũ, ũla kwĩsĩla ũmanyi wa w’o ũtw’ĩkĩthaw’a mweũ kwosana na mũvw’ano wa Ũla wawũmbie, 11 na vaiĩ Mũkiliki kana Mũyuti, nzaĩko kana kũlea kwaĩkwa, na vaiĩ mũeni, Mũsithiani, ngombo, kana mũndũ mũthasye; ĩndĩ Klĩsto nĩ syĩndũ syonthe kwa onthe.
12 O ta ũu, nũndũ inyw’ĩ mwĩ anyuve ma Ngai, atheu na mendetwe, ĩvw’ĩkei ĩnee na wendo mwingĩ, ũseo, wĩnyivyo, ũuu, na wũmĩĩsyo. 13 Endeeai kũmĩanĩsya na kũekeanĩa na ngenda ethĩwa mũndũ o na wĩva e na ũndũ na ũngĩ. Na o tondũ Yeova wamũekeie inyw’ĩ na ngenda, o nenyu no nginya mwĩke oou. 14 Ĩndĩ o vamwe na maũndũ asu onthe, ĩvw’ĩkei wendo, nũndũ nĩw’o ũkwatanasya andũ vyũ makethĩwa na ngwatanĩo ndũmu.
15 O na ĩngĩ, ekai mũuo wa Klĩsto ũsumbĩke ngoonĩ syenyu, * nũndũ mweetĩiwe mũuo ũsu nthĩnĩ wa mwĩĩ ũmwe. Na ĩthĩwai mũitũnga mũvea. 16 Ekai ndeto ya Klĩsto yusũe vyũ nthĩnĩ wenyu na ĩituma mwĩthĩwa na ũĩ w’onthe. Endeeai kũmanyĩany’a na kũthangaany’a na savuli, mbathi sya kũmũkumya Ngai, mbathi sya kĩ-veva, mũyina kwa nzĩa ĩkwonany’a mwĩ na mũvea, na mũimwinĩa Yeova kuma ngoonĩ. 17 Ũndũ o na wĩva ũla mũũneena kana kwĩka, ĩkai maũndũ onthe ĩsyĩtwanĩ ya Mwĩaĩi Yesũ, na kwĩsĩla kwake mũimũtũngĩa Ngai mũvea, ũla nĩwe Asa.
18 Inyw’ĩ iveti, ĩnyivĩsyei aũme menyu, o tondũ vaĩle nthĩnĩ wa Mwĩaĩi. 19 Inyw’ĩ aũme, endeeai kũsyenda iveti syenyu na mũikaithatĩe. 20 Inyw’ĩ syana, mew’ei asyai menyu maũndũnĩ onthe, nũndũ ũu nũmwendeeasya Mwĩaĩi mũno. 21 Inyw’ĩ aa-ĩthe, mũikathatye syana syenyu, nĩ kana iikakw’e ngoo. 22 Inyw’ĩ ngombo, mew’ei mavwana menyu ala me kũũ nthĩ maũndũnĩ onthe, na ti o yĩla mamũsyaĩĩsye, ta mũkwendeesya andũ, ĩndĩ ĩkai ũu mwĩ na ngoo ntheu, mũimũkĩa Yeova. 23 Ũndũ o na wĩva ũla mũkwĩka, wĩkei na thayũ wenyu w’onthe ta mũkũmũthũkũma Yeova, na ti andũ, 24 nũndũ nĩmwĩsĩ kana kuma kwa Yeova mũkakwata ũtiĩwa taw’o ĩtuvi. Mũthũkũmei Vwana wenyu, Klĩsto. 25 Vate nzika, mũndũ ũla wĩkaa ĩvĩtyo akaĩvwa nũndũ wa ĩvĩtyo yĩla wĩkĩte, nĩkwĩthĩwa Ngai nde kyende.