‘Mwĩaĩi Nĩwamũekeie’

Mũsomi ũmwe Mũngelesa weetawa Edward Herbert aisye ũũ myaka ta 400 mĩvĩtu: “Mũndũ ũtaekeaa angĩ ethĩawa ayananga kĩao o kĩla we mwene ũkenda kũkĩtũmĩa.” Ndeto isu syake inenganĩte kĩtumi kĩmwe kya kũekea ala angĩ. Syonanĩtye kana twaĩle kũekea ala angĩ nũndũ o naitũ tũkenda matũekee. (Mathayo 7:12) Ĩndĩ ve kĩtumi kĩngĩ kĩnene kĩla kĩtumaa tũekea angĩ. Kwoona ndeto sya mũtũmwa Vaulo ila syĩ ĩvukunĩ ya Akolosai 3:13.—Soma.

Nũndũ twĩ na naĩ, mavinda angĩ nĩtũvĩtĩasya andũ angĩ, namo nĩmatũvĩtĩasya. (Alomi 3:23) Tũtonya kwĩka ata nĩ kana twĩkalanyʼe nesa na ala angĩ o na kũtwʼĩka ithyonthe twĩ na naĩ? Vaulo nĩwaveveewe nĩ Ngai asya kana twaĩlĩte kũmĩĩsya ala angĩ na kũmaekea. O na kau ũtao ũsu waandĩkiwe myaka ta ngili ilĩ mĩvĩtu, nĩ wa vata mũno ũmũnthĩ o tondũ waĩ wa vata ĩvindanĩ yĩu. Ekai yu tũkunĩkĩle nesa ndeto sya Vaulo.

“Kũmĩĩasya ũmwe kwa ũla ũngĩ.” Ĩvuku yĩmwe yaĩtye kana Aklĩsto matonya kũatĩĩa ndeto isu sya Vaulo kwa kwĩthĩwa “meyũmbanĩtye kũmĩanĩsya na ala me na tũmaũndũ tũtamendeeasya.” Ndeto ii “ũmwe kwa ũla ũngĩ,” syĩonanyʼa kana kĩla ũmwe aĩlĩte kũmĩĩsya ũla ũngĩ. Ũu nĩ kwasya kana nũndũ nĩtwĩsĩ o naitũ nĩtwĩkaa maũndũ matonya kũthatya ala angĩ, tũyaĩlĩte kwĩtĩkĩlya tũmaũndũ twoo tũla ithyĩ tũtendete twanange ũnyanya witũ namo. Nao nata matũvĩtĩsya?

“Kũekeanĩa ene kwa ene.” Kwosana na mũsomi ũmwe, ndeto ya Kĩkiliki ĩla yĩalyũlĩtwe “kũekeanĩa” “ndyonanasya o kũlea kũkwatĩĩa mavĩtyo ma ũla waũvĩtĩsya . . . ĩndĩ yonanasya kũekea na ngenda kuma ngoonĩ.” Nayo ĩvuku yĩngĩ yaĩtye kana ndeto ĩsu yonanasya “kwĩka mũndũ nesa na kũtuma ewʼa e mwĩanĩe.” Twonanasya kana twĩ ĩnee ĩla twaekea angĩ kuma ngoonĩ ‘o na ethĩwa twĩ na ũndũ namo.’ Nĩkĩ twaĩlĩte kwĩka ũu? Kĩtumi kĩmwe nĩ kana o naitũ nĩtũtonya kwĩsa kwenda mũndũ o ũsu atũekee.

“O tondũ Mwĩaĩi [Yeova] wamũekeie, inywʼĩ nenyu ĩkaai o ta ũu.” Kĩtumi kĩla kĩnene kĩtumaa tũekea ala angĩ nĩ kĩĩ: Yeova Ngai ethĩawa eyũmbanĩtye kũtũekea vyũ. (Mika 7:18) Kwamba kũsũanĩa o vanini ũseo ũla Yeova wonasya eki ma naĩ ala meelila. Yeova e kĩvathũkanyʼo naitũ nũndũ we ndekaa naĩ. Ĩndĩ we ethĩawa eyũmbanĩtye kũekea eki ma naĩ ala meelila, o na kau nĩwĩsĩ ndakesa kwenda mamũekee mũthenya o na ũmwe. Vate nzika, Yeova nĩwe ũtwonetye ngelekanyʼo ĩla nzeo vyũ ya kũekea ala meelila!

Tei wa Yeova ũtumaa twenda kwĩthĩwa anyanyae make na tũiatĩĩa ngelekanyʼo yake. (Aeveso 4:32–5:1) Kwoou nũseo tũkekũlya atĩĩ, ‘Nũndũ Yeova nũmbonetye ũseo kwa kũndekea, nyie ninyie ũũ nĩlee kũekea mũndũ ũngĩ wambĩtĩsya na ambĩtya ũekeo kuma ngoonĩ?’—Luka 17:3, 4.