Ũvuanyʼo kwa Yoana

14 Na noona, na sisya! kala Kalondu aũngamĩte Kĩĩmanĩ kya Saioni, e na ala 144,000 ala maandĩkĩtwe itulyanĩ syoo ĩsyĩtwa yake na ĩsyĩtwa ya Ĩthe wake. 2 Na neew’a wasya kuma ĩtunĩ ũilye ta wasya wa kĩw’ũ kingĩ na wasya wa kĩtundumo; wasya ũla neewie waĩ ta wa aini mekwina makũnĩte mbeve syoo. 3 Na mainaa wathi weew’ĩkaa ta mweũ me mbee wa kĩla kĩvĩla kya ũsumbĩ na mbee wa ila syũmbe inya na ala atumĩa, na vaiĩ ũmwe waĩ atonya kũmanya wathi ũsu ate o ala 144,000, ala mathooetwe kuma ĩũlũ wa nthĩ. 4 Asu nĩmo ala mataaĩvukya na aka; ĩĩ, nĩ andũ atheu. Asu nĩmo ala maatĩĩaa kala Kalondu kw’onthe kũla ũendaa. Mathooiwe kuma andũnĩ ta ũsyao wa mbee kwa Ngai na kwa kala Kalondu, 5 na vaiĩ ũvũngũ waaoneka makanyw’anĩ moo; mo mai na ĩlanga.

6 Na noona mũlaĩka ũngĩ aũlũkĩte ĩtunĩ katĩ, na aĩ na ũvoo mũseo wa tene na tene nĩ kana aũtavany’e kwa ala matwĩe ĩũlũ wa nthĩ, kwa kĩla mbaĩ na ũko na kĩthyomo na andũ. 7 Nake aneena na wasya mũnene, akyasya: “Mũkĩei Ngai na mũimũkumya, nũndũ saa wake wa ũsilĩlo nĩ mũviku, kwoou mũthaithei Ũla woombie ĩtu na nthĩ na ũkanga na nthongo * sya kĩw’ũ.”

8 Na mũlaĩka ũngĩ wa kelĩ aatĩĩa, akyasya: “Nĩ mbalũku! Mbaviloni Ĩla Nene nĩ mbalũku, ĩla yatumie mbaĩ syonthe inyw’a mbinyu ya wendi * wayo mwingĩ wa kwĩka ũlaalai!” *

9 Na mũlaĩka ũngĩ wa katatũ aatĩĩa, akyasya ũũ na wasya mũnene: “Ethĩwa mũndũ o na wĩva nũkũthaitha ĩla nyamũ ya kĩthekanĩ na mũvw’anano wayo na ayĩkĩwa ũvano kĩtulyanĩ kyake kana kw’okonĩ kwake, 10 akanyw’a mbinyu ya ũthatu wa Ngai ĩla ĩtulũlawa kĩkombenĩ Kyake kya ũthilĩku ĩtongeletwe kĩndũ, na akathĩnw’a na mwaki na mũvĩlĩtĩ methonĩ ma alaĩka atheu na kala Kalondu. 11 Na syũki ya kũthĩnw’a kwoo yambataa tene na tene, na mayĩthĩawa na ũthũmũo mũthenya na ũtukũ, ala mathaithaa ĩla nyamũ ya kĩthekanĩ na mũvw’anano wayo na mũndũ o na wĩva ũla wĩkĩawa ũvano wa ĩsyĩtwa yayo. 12 Vaa nĩ vo ala atheu mendekaa kwĩthĩwa na wũmĩĩsyo, ala maatĩĩaa mĩao ya Ngai na malũmanasya vyũ na mũĩkĩĩo woo nthĩnĩ wa Yesũ.”

13 Na neew’a wasya kuma ĩtunĩ, ũkyasya, “Andĩka: Nĩ atanu ala kuma yu na kũendeea makusaa me ngwatanĩo vamwe na Mwĩaĩi. Ĩĩ, veva wĩasya, eka mathũmũe kuma mawĩanĩ moo momũ, nũndũ maũndũ ala meekie maendaa vamwe namo.”

14 Na noona, na sisya! ĩthweo yeũ, na ũla wekalĩte ĩũlũ wa ĩthweo yĩu ailye mwana wa mũndũ, e na ngovia ya ũsumbĩ ya thaavu mũtwenĩ wake na kavyũ koĩ ke ngoto kw’okonĩ kwake.

15 Na mũlaĩka ũngĩ auma vala vandũ vatheu va ĩkalũ na amwĩta na wasya mũnene ũla wekalĩte ĩũlũ wa yĩla ĩthweo, akyasya: “Tũmĩa kavyũ kaku ke ngoto na ũiketha, nũndũ saa wa kũketha nĩ mũviku, nĩkwĩthĩwa ngetha ya nthĩ nĩ mbĩu.” 16 Na ũla wekalĩte ĩũlũ wa yĩla ĩthweo ekya kavyũ kake ke ngoto ĩũlũ wa nthĩ, na nthĩ yakethwa.

17 Na mũlaĩka ũngĩ auma vala vandũ vatheu va ĩkalũ ĩtunĩ, o nake aĩ na kavyũ koĩ ke ngoto.

18 Na mũlaĩka ũngĩ auma kĩthembeonĩ, na aĩ na ũkũmũ ĩũlũ wa mwaki. Na amwĩta na wasya mũnene ũla waĩ na kavyũ koĩ ke ngoto, akyasya: “Tũmĩa kavyũ kaku koĩ ke ngoto na ũyũmbany’a itũngo sya mũsavivũ wa nthĩ, nũndũ nzavivũ syaw’o nĩ mbĩu.” 19 Na mũlaĩka ekya kavyũ kake ke ngoto ĩũlũ wa nthĩ na oombany’a mũsavivũ wa nthĩ, na awĩkya kĩangĩonĩ kya ũthatu wa Ngai. 20 Kĩangĩo kĩu kyaangĩiwe nza wa ndũa, na nthakame ĩla yaumie kĩangĩonĩ kĩu yambata yavikĩa itang’a sya makanyw’a ma mbalasi, vandũ ve na ũasa wa maili 184. *