Kũtũngĩlĩĩlwa kwa Mĩao
30 “Yĩla ndeto ii syonthe ikeanĩa kwenyu, moathimo na kĩumo kĩla naia mbee wenyu, na mũyĩililikana* mwĩ mbaĩnĩ syonthe ila Yeova Ngai wenyu ũmũnyaĩĩkĩtye, 2 na mũisyokea Yeova Ngai wenyu na mũyĩthukĩĩsya wasya wake kwosana na kyonthe kĩla ngũmwĩaĩa ũmũnthĩ, inywʼĩ na ana menyu, na ngoo yenyu yonthe na thayũ* wenyu wʼonthe, 3 nĩvo ĩndĩ Yeova Ngai wenyu ũkatũnga andũ menyu ala atave na aimewʼĩa tei na aimũmbanyʼa ĩngĩ kuma ngonĩ syonthe sya andũ kũla Yeova Ngai wenyu ũmũnyaĩĩkĩtye. 4 O na ethĩwa andũ menyu manyaĩĩkĩtwʼe kũvika mũthyanĩ wa matu, kuma kũu Yeova Ngai wenyu akamũmbanyʼa na aimũtũnga. 5 Yeova Ngai wenyu akamũtũnga nthĩ ĩla aa-ĩthe menyu moosie na mamĩmesya, na mũkamĩmesya; na akatuma mwaĩla na aimwingĩvya kwĩ aa-ĩthe menyu. 6 Yeova Ngai wenyu akathesya* ngoo yenyu na ngoo ya ũsyao wenyu, nĩ kana mũmwende Yeova Ngai wenyu na ngoo yenyu yonthe na thayũ* wenyu wʼonthe na nĩ kana mwĩkale thayũ. 7 Nĩvo ĩndĩ Yeova Ngai wenyu wĩetee amaitha menyu, ala mamũmenie na mamũthĩnyʼa iumo ii syonthe.
8 “Na ĩndĩ mũkasyoka na mũyĩthukĩĩsya wasya wa Yeova na mũyĩatĩĩa mĩao yake yonthe ĩla ngũmwĩaĩa ũmũnthĩ. 9 Yeova Ngai wenyu akatuma mwaĩla mũno wĩanĩ wʼonthe wa moko menyu, akaingĩvya syana syenyu na indo syenyu na ũsyao wa nthĩ yenyu, nũndũ Yeova akatanĩa ĩngĩ kũtuma mwaĩla, o tondũ watanĩaa kũtuma aa-ũmae menyu maĩla. 10 Nũndũ ĩvindanĩ yĩu mũkethukĩĩsya wasya wa Yeova Ngai wenyu na mũikwata mĩao yake na motwʼĩo ala maandĩkĩtwe ĩvukunĩ yĩĩ ya Mĩao, na mũkasyokea Yeova Ngai wenyu na ngoo yenyu yonthe na thayũ* wenyu wʼonthe.
11 “Yu mwĩao ũũ ngũmwĩaĩa ũmũnthĩ ti mũito mũno kwenyu, o na ti aĩ mũitonya kũũkwata.* 12 Ũi matunĩ, nĩ kana mwasye, ‘Nũũ ũkwambata matunĩ akatwosee, nĩ kana tũwĩwʼe na tũiũatĩĩa?’ 13 O na ndwĩ ngalĩko ĩla ĩngĩ ya ũkanga nĩ kana mwasye, ‘Nũũ ũla ũkũinga ngalĩko ĩla ĩngĩ ya ũkanga akatwosee, nĩ kana tũwĩwʼe na tũiũatĩĩa?’ 14 Nũndũ ndeto ĩsu yĩ vakuvĩ vyũ nenyu, kanywʼanĩ wenyu na ngoonĩ yenyu, nĩ kana mũmĩke.
15 “Sisyai, nĩngwia mbee wenyu ũmũnthĩ thayũ na ũseo, na kĩkwʼũ na ũthũku. 16 Ethĩwa nĩmũkwĩthukĩĩsya mĩao ya Yeova Ngai wenyu ĩla ngũmwĩaĩa ũmũnthĩ, kwa kũmwendaa Yeova Ngai wenyu, kwa kũendaa nzĩanĩ syake, na kwa kũkwataa mĩao yake na motwʼĩo make na sila wake, nĩvo ĩndĩ mũkekala thayũ na mũyingĩva, na Yeova Ngai wenyu akamũathima mwĩ nthĩ ĩla mũendete kũmesya.
17 “Ĩndĩ ethĩwa ngoo yenyu ĩkeelelũka na mũilea kwĩthukĩĩsya na mũisesengwa na mũikumanĩa ngai ingĩ na kũithũkũma, 18 nĩmũtavya ũmũnthĩ kana vate nzika mũkathela. Mũikekala ĩvinda yĩasa nthĩ ĩla mũkũinga Yolotani mũmĩmesye. 19 Nĩosa ĩtu na nthĩ syĩthĩwe ngũsĩ ĩũlũ wenyu ũmũnthĩ kana nĩniĩte thayũ na kĩkwʼũ mbee wenyu, ũathimo na kĩumo; na no nginya mũnyuve thayũ nĩ kana mwĩkale thayũ, inywʼĩ na nzyawa syenyu, 20 kwa kũmwenda Yeova Ngai wenyu, kwa kwĩthukĩĩsya wasya wake, na kwa kũlũmanyʼa nake, nũndũ nĩwe thayũ wenyu na nũndũ wake mũkekala ĩvinda yĩasa nthĩ ĩla Yeova weevĩtie kũnenga aa-ũmae menyu, Avalaamu, Isaka, na Yakovo.”