Meko ma Atũmwa

21 Ĩtina wa kũtaanĩsya namo, o na kau ndwaĩ ũndũ wĩ laisi, nĩtwalikile melinĩ na twathi ĩmwe kwa ĩmwe nginya Kosi, na ũnĩ wake twavika Lote, na kuma vau twathi Vatala. 2 Na yĩla tweethĩie meli yaingaa ĩthi Voenike, twalika melinĩ ĩsu na twathi. 3 Na tũendete nĩtwoonie kĩthama kya Kuvolo, na twakĩtia ngalĩ ya kw’oko kwa aka na twathi nginya Silia na twaũngama Tile, nũndũ vau nĩ vo meli ĩsu yaĩ yumĩsye mĩio ĩla yakuĩte. 4 Na twĩ kũu nĩtwamanthie amanyĩw’a na twamona, na twekala kw’o mĩthenya mũonza. Ĩndĩ matongoew’e nĩ veva mũtheu nĩmatavisye Vaulo ĩngĩ na ĩngĩ ndakatate kũkinya Yelusaleme. 5 Na yĩla ĩvinda yitũ ya kwĩkala kũu yathelile, nĩtwaumie kw’o nĩ kana tũendeee na kyalo kitũ, ĩndĩ amanyĩw’a asu onthe, vamwe na aka na syana, matumaasya nginya nza wa ndũa. Na twavika ũtee wa ũkanga, twatulya ndu na twavoya 6 na twataanĩsya namo. Na ĩndĩ twalika melinĩ, namo menũka.

7 Na twauma Tile na meli na twathi twavika Vetolemai, na twakethya ana-a-asa na twekala namo mũthenya ũmwe. 8 Ũnĩ wake nĩtwaumie kũu na twavika Kaisalea na twathi nyũmba kwa Vilivu ũla waĩ mũtavany’a, na ũmwe wa ala aũme mũonza, * na twekala nake. 9 Mũndũ ũsu aĩ na eĩtu ana mataĩ atwae na nĩmathanaa. 10 Ĩndĩ ĩtina wa kwĩkala Kaisalea matukũ maingĩ, mwathani weetawa Akavo nĩwatheeie kũu kuma Yutia. 11 Na ooka vala twaĩ na oosa mũsivi wa Vaulo eeyova maaũ na moko, na asya: “Ũũ nĩw’o veva mũtheu ũkwasya, ‘Ayuti kũya Yelusaleme makamwova mwene mũsivi ũũ ũndũ neeyova, na maimũnengane mokonĩ ma andũ ma mbaĩ ingĩ.’” 12 Yĩla tweewie ũu, ithyĩ na ala angĩ maĩ vau nĩtwambĩĩie kũmwĩsũva ndakambate Yelusaleme. 13 Ĩndĩ Vaulo asũngĩa, asya: “Nĩkĩ mũkũĩa na kũtuma nĩtũlĩka ngoo? Mũikethĩwe na nzika, nũndũ nyie nĩnĩyũmbanĩtye kwovwa, o na kũkw’ĩĩa Yelusaleme kwondũ wa ĩsyĩtwa ya Mwĩaĩi Yesũ.” 14 Yĩla twatatie kũneena nake na aema, nĩtwaekanie * nake, na twasya: “Eka kwenda kwa Yeova kwĩkĩke.”

15 Ĩtina wa mĩthenya ĩsu, nĩtweeyũmbanisye na twakũsya twathi Yelusaleme. 16 Na amanyĩw’a amwe kuma Kaisalea nĩmaendanisye naitũ, na matũtwaa kwa Masoni wa kuma Kuvolo, mũmanyĩw’a wa tene, ũla twaĩ twĩkale mũsyĩ kwake. 17 Yĩla twavikie Yelusaleme, ana-a-asa nĩmatũthokisye na ũtanu. 18 Ĩndĩ mũthenya ũla waatĩĩe, Vaulo nĩwaendanisye naitũ kũla kwĩ Yakovo, na atumĩa onthe maĩ vo. 19 Vaulo nĩwamakethisye na ambĩĩa kũmaelesya maũndũ maingĩ ala Ngai weekĩte katĩ wa andũ ma mbaĩ ingĩ kwĩsĩla ũthũkũmi wake.

20 Yĩla meewie maũndũ asu, nĩmambĩĩie kũmũkumya Ngai, ĩndĩ mamwĩa Vaulo: “Mwana-a-asa, sisya ũndũ kwĩ na Ayuti maingĩvĩte ala matw’ĩkĩte etĩkĩli, na onthe nĩmakwataa ĩla Mĩao na kĩthito. 21 Ĩndĩ nĩmew’ĩte kũineenwa ĩũlũ waku kana wĩthĩĩtwe ũimanyĩsya Ayuti onthe ala matwĩe katĩ wa andũ ma mbaĩ ingĩ maũndũ meũleana na Mĩao ya Mose, ũimea maikaĩke syana syoo, o na maikaatĩĩe syĩthĩo ila iatĩĩawa. 22 Yu twĩĩka ata? Vate nzika, nĩmeũmanya kana nũvikie. 23 Kwoou ĩka ũndũ tũũkũtavya: Twĩ na aũme ana meyĩavĩte kwa Ngai. 24 Osa aũme asu ũthi namo, na mũyĩthesya kwosana na Mĩao na ũimaĩvĩa nĩ kana menzwe mĩtwe yoo. Weeka ũu, andũ onthe nĩmeũmanya kana maũndũ ala matavĩtw’e ĩũlũ waku ti ma w’o, ĩndĩ we mwene wĩ na mwĩkalĩle mũseo na nũatĩĩaa ĩla Mĩao. 25 Na ĩũlũ wa andũ ma mbaĩ ingĩ ala matw’ĩkĩte etĩkĩli, nĩtwamaandĩkĩie ĩũlũ wa ũtwi witũ kana nĩmaĩle kwĩvathana na syĩndũ ila ithembewe mĩvw’anano, mevathane na nthakame na nyamũ ila sitĩtwe, * na mayĩvathana na ũlaalai.” *

26 Na ĩndĩ ũnĩ wake Vaulo oosa ala aũme, na eethesya vamwe namo kwosana na Mĩao, na alika ĩkalũnĩ nĩ kana awete yĩla mĩthenya ya kwĩthesya kwosana na Mĩao yĩthela, nĩ kana nthembo yumw’e kwondũ wa kĩla ũmwe woo.

27 Na mĩthenya mũonza ya kwĩthesya ĩkilye kũthela, Ayuti kuma Asia nĩmamwonie Vaulo ĩkalũnĩ, na mookĩlya kĩthokoo ĩkomanonĩ yonthe, nayo yamũkwata, 28 na yaneena na wasya mũnene, yĩkyasya: “Andũ ma Isilaeli, tũtetheesyei! Ũũ nĩ ũla mũndũ ũmanyĩasya andũ onthe kĩla vandũ maũndũ meũvũthĩĩsya andũ maitũ, Mĩao yitũ, na vandũ vaa vatheu. O na eka ũu, nũetie Akiliki ĩkalũnĩ na avukya vandũ vaa vatheu.” 29 Maisye ũu nũndũ maĩ manamwona Telovimo kuma Eveso e ndũanĩ vamwe na Vaulo, na masũanĩaa kana Vaulo nĩwamũlikilye ĩkalũnĩ. 30 Na kweethĩwa ithokoo ndũanĩ yonthe, na andũ onthe mooka masembete mamũkwata Vaulo na mamũkusũlany’a mamumaalya nza wa ĩkalũ, na vau kwa vau mĩomo yavingwa. 31 Na maendeee kũmũvũa mamũae, mũũngamĩi wa ita avikĩwa nĩ ũvoo ũkwasya kana Yelusaleme yonthe yusĩe ithokoo; 32 na vau kwa vau, oosa asikalĩ na anene ma asikalĩ na masemba matheea vala maĩ. Yĩla moonie mũnene ũsu wa ita na asikalĩ, maeka kũmũvũa Vaulo.

33 Nĩvo ĩndĩ mũnene wa ita wathengeeie na asya kana Vaulo akwatwe na ayovwa na nyololo ilĩ, na ĩndĩ akũlya we nũũ na ekĩte ata. 34 Ĩndĩ amwe ĩkomanonĩ mambĩĩa kũlonzany’a, amwe moo maiweta kĩĩ na angĩ makaweta kĩya. Na nũndũ wa kĩlonzo kĩu mũnene ũsu ndaamanya nesa kĩla kyeekĩkĩte, na kwoou asya Vaulo atwawe kambinĩ ya asikalĩ. 35 Ĩndĩ yĩla Vaulo wavikie ngasinĩ sya kũlĩsa kambinĩ ĩsu, asikalĩ nĩmamũkuie nũndũ andũ nĩmendaa kũmũũmĩsya, 36 na ĩkomano nĩyamũatĩĩe yĩneenete na wasya mũnene, yĩkyasya: “Minai mũndũ ũsu!”

37 Na e vakuvĩ kũlikw’a kambinĩ ya asikalĩ, Vaulo nĩwamwĩie ũla mũnene wa asikalĩ atĩĩ: “No ngũtavye ũndũ?” Nake amũkũlya: “Nũtonya kũneena Kĩkiliki? 38 We tuuwe Mũmisili ũla ĩvinda ĩvĩtu watumie andũ maleana na mũsumbĩ na watongoesya aũme 4,000 me na mbyũ wamatwaa weũnĩ?” 39 Nake Vaulo amwĩa: “Nyie kwa w’o nĩ Mũyuti, mwĩkali wa Taliso, ndũa ya Silisia yĩsĩkĩe nesa. Kwoou nĩngũkwĩsũva, mbĩtĩkĩlye nĩneene na andũ.” 40 Ĩtina wa kwĩtĩkĩlw’a aneene na andũ, Vaulo nĩwamokĩlĩilye kw’oko aũngamĩte ngasinĩ, namo mavindya ki, na ĩndĩ aneena namo na kĩthyomo kya Kĩevelania, akyasya atĩĩ: