Kwosana na Mathayo

25 “Ũsumbĩ wa ĩtu no ũelekanw’e na eĩtu * ĩkũmi ala moosie taa syoo na mathi kũthaũa mũtwaani. 2 Atano maĩ atumanu, na atano maĩ oĩ. 3 Ala maĩ atumanu nĩmakuie taa syoo ĩndĩ mayaakua mauta, 4 namo ala maĩ oĩ nĩmakuie taa vamwe na mauta me isũvanĩ. 5 Yĩla mũtwaani wekalangile ate kũka, onthe nĩmambĩĩie kwombosya na makoma. 6 Na ũtukũ katĩ nĩveew’ĩkie wasya mũnene ũkyasya: ‘Mũtwaani nĩwũkĩte! Umaalai mũmũthaũe.’ 7 Na ĩndĩ ala eĩtu onthe maamũka na maseũvya taa syoo. 8 Ala atumanu meea ala oĩ, ‘Tũolelei mauta, nũndũ taa sitũ ikilyĩ kũvoa.’ 9 Ala oĩ mamasũngĩa, mamea: ‘Nĩvatonyeka ũkethĩa ala twĩ namo mayĩanĩte kwondũ witũ na kwondũ wenyu. Kwoou no mũthi kwa ala matesaa nĩ kana mũkathooe menyu.’ 10 Na maendete kũthooa, mũtwaani avika. Na eĩtu ala meeyũmbanĩtye malika nake mbokanĩ ya mũtwaano na mũomo wavingwa. 11 Ĩtina wa vau, eĩtu ala angĩ nĩmookie na mambĩĩa kwĩtana, ‘Mũtwaani, Mũtwaani, tũvingũĩe!’ 12 Nake amasũngĩa, amea, ‘Nĩmũtavya w’o, nyie ndimwĩsĩ.’

13 “Kwoou, endeeai kũsyaĩĩsya, nũndũ mũyĩsĩ mũthenya ũsu kana saa ũsu.

14 “Ũsumbĩ wa ĩtu ũilye ta mũndũ waĩ vakuvĩ kũthi nthĩ ĩngĩ na eeta ngombo syake na aitiĩa syĩndũ ila waĩ nasyo. 15 Na anenga ngombo ĩmwe talendi * itano, ĩngĩ amĩnenga ilĩ, na ĩngĩ amĩnenga ĩmwe, na kĩla ĩmwe amĩnengae kwosana na ũtonyi wayo, na athi nthĩ ĩngĩ. 16 Na o mĩtũkĩ, ngombo ĩla yanengiwe talendi itano yathi yakũna viasala nasyo na yakwata ingĩ itano. 17 O ta ũu, nayo ĩla yanengiwe ilĩ yakwata ingĩ ilĩ. 18 Ĩndĩ ngombo ĩla yanengiwe ĩmwe yathi yenza ĩima, na yavitha mbesa * sya vwana wayo.

19 “Ĩtina wa ĩvinda yĩasa vwana wa ngombo isu ooka na eeka ĩsavu vamwe nasyo. 20 Na ĩla yanengetwe talendi itano yooka mbee wake na yaete talendi ingĩ itano na yasya, ‘Vwana, wanengie talendi itano; sisya, nĩngwatĩte ingĩ itano.’ 21 Nake vwana wayo amĩtavya atĩĩ: ‘Nĩwĩkĩte nesa, ngombo nzeo na ndĩkĩĩku! Ũnaĩ mũĩkĩĩku syĩndũnĩ nini. Nĩngũũtw’ĩkĩthya mũnene wa syĩndũ mbingĩ. Lika ũtanunĩ wa vwana waku.’ 22 Nayo ĩla yanengetwe talendi ilĩ yooka mbee wake na yamwĩa, ‘Vwana, wanengie talendi ilĩ; sisya, nĩngwatĩte ingĩ ilĩ.’ 23 Nake vwana wayo amĩtavya atĩĩ: ‘Nĩwĩkĩte nesa, ngombo nzeo na ndĩkĩĩku! Ũnaĩ mũĩkĩĩku syĩndũnĩ nini. Nĩngũũtw’ĩkĩthya mũnene wa syĩndũ mbingĩ. Lika ũtanunĩ wa vwana waku.’

24 “Na mũthya ngombo ĩla yanengiwe talendi ĩmwe yooka mbee wake na yamwĩa: ‘Vwana, nĩneesĩ wĩ mũndũ mwetu, ũkethaa vala ũtaavanda na ũmbanasya vala ũtaaũlũkĩlya. 25 Na nũndũ wa ũu, nakĩa na nathi nenzĩa talendi yaku mũthanganĩ. Kwata ĩ kyaku.’ 26 Nake vwana wayo amĩsũngĩa atĩĩ: ‘Ngombo nthũku na ndulu, aĩ nĩweesĩ nĩkethaa vala ndavandĩte na nũmbanasya vala ndaũlũkĩlye? 27 Ethĩwa nĩweesĩ ũu, waaĩle kwia mbesa * syakwa vengi, nĩ kana nooka nose ila syakwa vamwe na ũsyao.

28 “‘Kwoou, osai talendi ĩla wĩ nayo na mũimĩnenga ũla wĩ na talendi ĩkũmi. 29 Nũndũ kĩla mũndũ wĩ na kĩndũ akongeleelwa, na ayĩthĩwa na mbingĩ. Ĩndĩ ũla ũte na kĩndũ, o na kĩla wĩ nakyo akavenwa. 30 Kwoou mĩkyei nza kĩvindunĩ ngombo ĩno ĩtatethya. Vau nĩ vo ĩkaĩĩa na kũvevetany’a maeo mayo.’

31 “Yĩla Mwana wa mũndũ ũkoka ũtheunĩ wake mũtisu vamwe na alaĩka onthe, akekala nthĩ kĩvĩlanĩ kyake kĩtheu kya ũsumbĩ. 32 Na mbaĩ syonthe ikoombanw’a mbee wake, nake akavathany’a andũ o ũndũ mũĩthi ũvathanasya malondu na mbũi. 33 Na akaia malondu kw’okonĩ kwake kwa aũme, na mbũi kw’okonĩ kwake kwa aka.

34 “Nĩvo ĩndĩ Mũsumbĩ ũkamea ala me kw’okonĩ kwake kwa aũme: ‘Ũkai inyw’ĩ ala mũathimĩtwe nĩ Asa wakwa, osai Ũsumbĩ ũla waseũviw’e kwondũ wenyu kuma mwambĩlĩlyo wa nthĩ. 35 Nũndũ naĩ na nzaa na mwanenga kyaũya; naĩ na waũni na mwanenga kyaũnyw’a. Naĩ mũeni na mwanthokya nesa; 36 naĩ mũthei * na mwambw’ĩka ngũa. Naĩ mũwau na mwooka kũnzisya. Naĩ yela na mwooka kũmbona.’ 37 Namo ala alũngalu makamũsũngĩa kwa ndeto ii: ‘Mwĩaĩi, nĩ ĩndĩĩ twakwonie wĩ na nzaa na twaũnenga kyaũya, kana wĩ na waũni na twaũnenga kyaũnyw’a? 38 Nĩ ĩndĩĩ twakwonie wĩ mũeni na twaũthokya nesa, kana wĩ mũthei na twaũnenga ngũa? 39 Nĩ ĩndĩĩ twakwonie wĩ mũwau kana wĩ yela na twooka kũkwona?’ 40 Na Mũsumbĩ akamasũngĩa na kũmea, ‘Nĩ w’o nĩngũmwĩa, o ũndũ mweekie ũmwe wa aa anini ma ana-a-asa makwa, ninyie mweekie.’

41 “Na ĩndĩ akamea ala me kw’okonĩ kwake kwa aka: ‘Umai vaa nĩĩ inyw’ĩ aumanĩe, endai mwakinĩ wa tene na tene ũla ũseũvĩw’e Ndevili na alaĩka make. 42 Naĩ na nzaa na mũyaanenga kyaũya, naĩ na waũni na mũyaanenga kyaũnyw’a. 43 Naĩ mũeni, na mũyaanthokya nesa; naĩ mũthei na mũyaanenga ngũa; naĩ mũwau na naĩ yela, ĩndĩ mũyaaũka kũmbona.’ 44 Namo makamũsũngĩa kwa ndeto ii: ‘Mwĩaĩi nĩ ĩndĩĩ twakwonie wĩ na nzaa kana wĩ na waũni kana wĩ mũeni kana wĩ mũthei kana wĩ mũwau kana wĩ yela na twaema kũũtethya?’ 45 Nake akamasũngĩa, akĩmea: ‘Nĩ w’o nĩngũmwĩa, o ũndũ mwaleile kũmwĩka ũmwe wa aa anini ma ana-a-asa makwa, ninyie mwaleile kũmbĩka.’ 46 Asu makathi wanangĩkonĩ wa tene na tene, ĩndĩ ala alũngalu makalika thayũnĩ wa tene na tene.”