Mwambĩlĩĩlyo

26 Ĩvinda yĩmwe nĩkweethĩiwe na yũa nthĩ ĩsu, eka yũa ya mbee yĩla yaĩ kwʼo mĩthenyanĩ ya Avalaamu. Na kwoou Isaka athi kwa Avimeleki mũsumbĩ wa Avilisiti kũu Ngelali. 2 Na ĩndĩ Yeova amumĩlĩĩla Isaka na amwĩa: “Ndũkatheee Misili. Tũa nthĩ ĩla ngũũnyuvĩa. 3 Ĩkala ta mũeni nthĩ ĩno, na ngaendeea kwĩthĩwa naku na ngakũathima, nũndũ ngaũnenga we na ũsyao waku* nthĩ ii syonthe, na ngeanĩsya wĩvĩto ũla namwĩvĩtĩe ĩthe waku Avalaamu, ndimwĩa: 4 ‘Ngatuma ũsyao waku* wongeleka wĩthĩwe ta ndata sya matunĩ; na nganenga ũsyao waku* nthĩ ii syonthe; na mbaĩ syonthe sya nthĩ ikeeyosea ũathimo kwĩsĩla ũsyao waku.’* 5 Na ngeeka ũu nũndũ Avalaamu nĩweethukĩĩisye wasya wakwa na aendeea kũlũmya mawĩaĩo makwa, motwʼĩo makwa, na mĩao yakwa.” 6 Kwoou Isaka aendeea kwĩkala Ngelali.

7 Na aũme ma kĩsio kĩu mambĩĩa kũkũlĩĩlya ĩngĩ na ĩngĩ ĩũlũ wa kĩveti kyake, ĩndĩ Isaka asũngĩaa akasya, “Ũũ nĩ mwĩĩtu-a-ia.” Nĩwakĩaa kwasya, “Ũũ nĩ mũka wakwa,” nũndũ aisye, “Aũme ma kĩsio kĩĩ nĩmatonya kũmbũaa nũndũ wa Leveka,” nĩkwĩthĩwa aĩ mwanake. 8 Ĩtina wa kavinda, Avimeleki mũsumbĩ wa Avilisiti nĩwasyaĩlilye ndĩlĩsyanĩ na oona Isaka ayonyʼa Leveka mũka wake wendo.* 9 Na vau kwa vau Avimeleki amwĩta Isaka na amwĩa: “Mbona Leveka nĩ kĩveti kyaku! Nĩkĩ ũnaisye, ‘Ũũ nĩ mwĩĩtu-a-ia’?” Nake Isaka amwĩa: “Nĩnaisye ũu nĩkwĩthĩwa nĩnĩnakĩaa kũawa nũndũ wake.” 10 Ĩndĩ Avimeleki asya: “Yu ũtwĩkie ata! Nata keka ũmwe wa andũ ma nthĩ yakwa nũkomie na mũka waku, na tũitalĩlwa ĩvĩtyo nũndũ waku?” 11 Na Avimeleki ameaĩa andũ onthe, aimea: “Ũla ũkakiita mũndũ ũũ na kĩveti kyake ndakalea kũawa!”

12 Nĩvo ĩndĩ Isaka wambĩĩie kũvanda mbeũ nthĩ ĩsu, na mwaka ũsu aketha kũndũ 100 kwa kĩla wavandie, nĩkwĩthĩwa Yeova nĩwamũathimĩte. 13 Na mũndũ ũsu athua, na aendeea kwaĩla nginya amesya malĩ mbingĩ. 14 Nĩweeyũmbanĩisye ndĩthya sya malondu na ngʼombe na athũkũmi aingĩ, na Avilisiti mambĩĩa kũmwĩwʼĩa woo.

15 Na kwoou Avilisiti moosa mũthanga na malinda ithima syonthe ila athũkũmi ma ĩthe wake Avalaamu menzĩte mĩthenyanĩ ya Avalaamu. 16 Na ĩndĩ Avimeleki amwĩa Isaka: “Thama ume vaa tũĩ, nũndũ nũmeetye vinya mũno kwĩ ithyĩ.” 17 Kwoou Isaka athama vau na amba maeema mwandanĩ wa* Ngelali na atũa kũu. 18 Na Isaka avukũa ithima ila syenzĩtwe mĩthenyanĩ ya ĩthe wake Avalaamu ĩndĩ ikalindwa nĩ Avilisiti ĩtina wa Avalaamu kũkwʼa, na asyĩta o ũndũ ĩthe wasyĩtĩte.

19 Ĩvinda yĩmwe athũkũmi ma Isaka maendeee kwĩnza ithima mwandanĩ ũsu,* nĩmavukũie kĩthima kĩ na kĩwʼũ kĩtheu. 20 Na aĩthi ma Ngelali mambĩĩa kũtetanyʼa na aĩthi ma Isaka, mayasya: “Kĩwʼũ kĩĩ nĩ kitũ!” Kwoou Isaka eeta kĩthima kĩu Eseki,* nũndũ nĩmatetanisye nake. 21 Na mambĩĩa kwĩnza kĩthima kĩngĩ, ĩndĩ aĩthi asu mambĩĩa kũtetanyʼa namo ĩngĩ nũndũ wakyo. Na kwoou Isaka akĩta Sitina.* 22 Ĩtina, nĩwaumie vau na enza kĩthima kĩngĩ, ĩndĩ mayaaũkĩlya ĩteta nũndũ wakyo. Kwoou akĩta Leovothi* na asya: “Nĩkwĩthĩwa yu Yeova nĩwanenevya mwanya wakwa na nĩwatuma twĩthĩwa na ũsyao nthĩ ĩno.”

23 Nĩvo ĩndĩ waumie vau athi Mbeeli-sieva. 24 Na ũtukũ ũsu Yeova amumĩlĩĩla na asya: “Ninyie Ngai wa ĩthe waku Avalaamu. Ndũkakĩe, nũndũ nĩ vamwe naku, na ngakũathima na ngatuma ũsyao waku* wongeleka kwondũ wa Avalaamu mũthũkũmi wakwa.” 25 Kwoou Isaka aaka kĩthembeo vau na eekaĩla ĩsyĩtwa ya Yeova. Na Isaka amba ĩeema yake vau, na athũkũmi make menza kĩthima vo.

26 Ĩtina, Avimeleki nĩwookie vala ve Isaka kuma Ngelali e vamwe na Ausathi mũtai wake na Vikoli mũnene wa ita syake. 27 Nĩvo ĩndĩ Isaka wameie: “Nĩkĩ mwooka vala nĩĩ, na nĩwʼo mũnamenete na mwambĩa nume kwenyu?” 28 Namo masya: “Nĩtwĩyoneete ũtheinĩ kana Yeova e vamwe naku. Kwoou tũtwie kũka vala ũĩ na tũikwĩa, ‘Nĩtũũkwĩsũva, nĩvethĩwe wĩvĩto katĩ witũ naku, na eka tũtianĩe ũtianĩo ũũ naku: 29 Ndũkatwĩka ũndũ mũthũku o tondũ ithyĩ tũtaakũũmĩsya, nĩkwĩthĩwa tũkwĩkĩte o maũndũ maseo na twakũekie ũthi na mũuo. Yu wĩ mũathime nĩ Yeova.’” 30 Na Isaka oombanyʼa kyathĩ kwondũ woo, na maya na manywʼa. 31 Na ĩndĩ ũnĩ wake kwakya maamũka tene na kĩla ũmwe eevĩtĩa ũla ũngĩ. Ĩtina wa ũu, Isaka nĩwamaekie mathi, na mauma vala ũĩ na mathi na mũuo.

32 Mũthenya ũsu athũkũmi ma Isaka nĩmookie vala ũĩ na mamũtavya ĩũlũ wa kĩthima kĩla menzĩte, na mamwĩa: “Nĩtwakwata kĩwʼũ!” 33 Na kwoou akĩta Siva. Nĩkyo kĩtumi ndũa ĩsu yĩtawa Mbeeli-sieva kũvika ũmũnthĩ.

34 Esaũ e na myaka 40 nĩwatwaie Yutithi mwĩĩtu wa Mbeeli, ũla waĩ Mũititi, o vamwe na Mbasemathi mwĩĩtu wa Eloni, ũla waĩ Mũititi. 35 Aka asu nĩmatumie Isaka na Leveka methĩwa na kyeva kingĩ.*