Valũa wa Mbee kwa Timotheo

3 Ndeto ii nĩ sya kũĩkĩĩka: Ethĩwa mũndũ nĩwĩkĩĩte kĩthito atw’ĩke mũsyaĩĩsya, endaa wĩa mũseo. 2 Mũsyaĩĩsya aĩle kwĩthĩwa ataweteka ũthũku, mũũme wa kĩveti kĩmwe, wĩ na wĩting’o maũndũnĩ onthe, wĩ na kĩlĩko kĩanĩu, wĩ mĩvango, mũlau, wĩ na ũtonyi wa kũmanyĩsya, 3 na ti mũnywi, * ti mũndũ wa ithokoo, ĩndĩ aĩle kwĩthĩwa mũndũ ũtakwatĩĩaa mũno woni wake, ũte ĩteta, ũtendete mbesa, 4 mũndũ ũũngamĩaa mũsyĩ wake nesa, wĩ na syana syĩ na wĩnyivyo na syosaa maũndũ kwa ũito 5 (nũndũ ethĩwa mũndũ o na wĩva ndesĩ kũũngamĩa nyũmba yake mwene, akasũvĩa ata kĩkundi kya Ngai?), 6 na ti mũndũ ũneetĩkĩlile mĩtũkĩ, ndakese kwĩthĩwa na mĩtũlyo na aikwatwa nĩ ũsilĩlo ũla wasilĩlwe Ndevili. 7 O na ĩngĩ, aĩle kwĩthĩwa aiwetwa nesa * nĩ ala me nza wa kĩkundi nĩ kana ndakavũthw’e na ndakalike kĩteinĩ kya Ndevili.

8 Atetheesya ma kĩkundi o namo maĩlĩte kwĩthĩwa mayosa maũndũ kwa ũito, mate akengani, mate anywi ma mbinyu mbingĩ, matamanthaa na ĩtomo nzĩa sya kwĩyĩuna mo ene, 9 na makwataa kĩmbithĩ kĩtheu me na wasya mũtheu wa ngoo.

10 O na ĩngĩ, ekai mambe kũtatĩthw’a kana nĩmaĩle; na ĩndĩ ethĩwa maiweteka ũthũku, maithũkũma ta atetheesya ma kĩkundi.

11 Aka namo nĩmaĩle kwĩthĩwa mayosa maũndũ kwa ũito, mate asukani, me na wĩting’o maũndũnĩ onthe, na me aĩkĩĩku kĩla ũndũnĩ.

12 Mũtetheesya wa kĩkundi aĩle kwĩthĩwa mũũme wa kĩveti kĩmwe, ũũngamĩaa nesa syana syake na mũsyĩ wake. 13 Nĩkwĩthĩwa aũme ala mathũkũmaa kwa nzĩa nzeo nĩmanengawe ndaĩa, na nĩmethĩawa na ũthasyo mũnene wa kũneena ĩũlũ wa mũĩkĩĩo woo nthĩnĩ wa Klĩsto Yesũ.

14 Nĩkũandĩkĩa maũndũ asu, o na kau nĩngwenda kũka kũla ũĩ o mĩtũkĩ, 15 nĩ kana naselewa, wĩthĩwe ũtonya kũmanya ũndũ waĩle kwĩthĩwa na mwĩkalĩle ũilye nyũmbanĩ ya Ngai, ĩla nĩ kĩkundi kya Ngai ũla wĩ thayũ, na nĩkyo kĩtuĩ na mũsingi wa ũla w’o. 16 Vate nzika, kĩmbithĩ kĩĩ kĩtheu kya kũmũkĩa Ngai nĩ kĩnene: ‘Nĩwaumĩlilw’e nthĩnĩ wa mwĩĩ, atalwa kwĩthĩwa mũlũngalu nthĩnĩ wa veva, aumĩlĩĩla alaĩka, atavanw’a mbaĩnĩ, aĩkĩĩwa nĩ andũ ĩũlũ wa nthĩ, na ooswa ĩũlũ ĩtunĩ na akumw’a.’