ĨSOMO YA 55
Tetheesya Kĩkundi Kyaku
Ĩũlũ wa nthĩ yonthe, andũ milioni mbingĩ nĩmamũthaithaa Yeova me atanu nthĩnĩ wa ikundi ngili mbingĩ syĩ kĩvathũkanyʼo. Nĩmatũngaa mũvea mũno nũndũ wa myolooto na motao ala makwataa, na nĩmethĩawa na wendi wa kũtetheesya ikundi kwa nzĩa syĩ kĩvathũkanyʼo. We ũu nĩwʼo wĩwʼaa kwelekela kĩkundi kyaku?
1. Nĩ kwa nzĩa ta syĩva ũtonya kũtũmĩa ĩvinda na vinya waku kũtetheesya kĩkundi?
Ithyonthe no twĩyumye kũtetheesya kĩkundi. Kwa ngelekanyʼo, amwe kĩkundinĩ kyenyu no methĩwe me akũũ na me na mathĩna ma mwĩĩ? No ũmatetheesye kũvika maũmbanonĩ? No ũmatetheesye maũndũnĩ angĩ ta kũmathooea syĩndũ ila me na vata nasyo sokonĩ, kana o mawĩa angĩ ma nyũmba? (Soma Yakovo 1:27.) O na ĩngĩ no twĩyumye kũthesya na kũsũvĩa Nyũmba yitũ ya Ũsumbĩ. Vaiĩ mũndũ ũtũthingʼĩĩasya kwĩka maũndũ asu. Kũmwenda Ngai na ana-a-asa maitũ nĩkwʼo kũtũsukumaa twĩyumye kana ‘twĩthembe na ngoo ya kwenda.’—Savuli 110:3.
Aklĩsto ala avatise no matetheesye kĩkundi kwa nzĩa mbingangĩ. Ana-a-asa ala meanĩĩsye nguma ila iwetetwe Mbivilianĩ no matwʼĩke atetheesya ma kĩkundi, na ĩtina mayĩsa kũtwʼĩka atumĩa ma kĩkundi. Ana-a-asa o vamwe na eĩtu-a-asa no meyumye makakwata mbau wĩa wa kũtavanyʼa kwa kwĩthĩwa me mavainia. Namo angĩ no matetheesye kwaka myako ya kũthaithĩa kana makathamĩĩa kĩkundinĩ kĩ kĩsionĩ kĩngĩ kĩtonya kwĩthĩwa kĩyenda ũtethyo o kwa nzĩa ingĩ.
2. Tũtonya kũtũmĩa mbesa sitũ na syĩndũ ingĩ ila twĩ nasyo ata kũtetheesya kĩkundi?
Nĩtũtonya ‘kũmũtaĩa Yeova na syĩndũ sitũ.’ (Nthimo 3:9) Nĩtũtanaa twaumya mbesa sitũ kana syĩndũ ingĩ ila twĩ nasyo kũtetheesya kĩkundi kĩla twĩthĩawa, na wĩa wa kũtavanyʼa ũla ũendeewʼe ĩũlũ wa nthĩ yonthe. (Soma 2 Akolintho 9:7.) O na ĩngĩ mĩvothi yitũ nĩtetheeasya yĩla kwaumĩla mĩisyo. Aingĩ nĩmanyuvaa “kwia kĩndũ ũtee” kĩla ĩvinda nĩ kana meumya ta mũvothi. (Soma 1 Akolintho 16:2.) No twĩkĩe mĩvothi yitũ masandũkũnĩ ma mĩvothi ala me Nyũmbanĩ sitũ sya Ũsumbĩ, kana tũkaumya kwĩsĩla donate.jw.org. Tũmwonasya Yeova kana nĩtũmwendete yĩla twatũmĩa mbesa sitũ na syĩndũ ingĩ ila twĩ nasyo kũtetheesya kĩkundi.
ĨMANYĨSYE MŨNANGO
Ĩmanyĩsye ĩũlũ wa nzĩa imwe ũtonya kũtetheesya kĩkundi.
3. No tũtũmĩe syĩndũ sitũ sya kĩ-mwĩĩ
Yeova na Yesũ nĩmendete mũndũ ũla ũnenganae na ũtanu. Kwa ngelekanyʼo, Yesũ nĩwakathie mũndũ mũka waĩ ndiwa, ũla waĩ na tũvesa tũnini mũno, ĩndĩ eeka kyonthe kĩla ũtonya amumĩsya Yeova mũvothi. Somai Luka 21:1-4, na ĩndĩ mũineenea makũlyo aa:
No nginya tumye mbesa mbingĩ nĩ kana tũmwendeesye Yeova?
Yeova na Yesũ mewʼaa ata yĩla twaumya mĩvothi na ngoo ya kwenda?
Nĩ kana ũmanye ũndũ mĩvothi yitũ ĩtũmĩkaa, ĩloelei VITIO. Na ĩndĩ mũineenea ĩkũlyo yĩĩ yĩatĩĩe:
Mĩvothi ĩtũmĩkaa ata kũtetheesya ikundi ĩũlũ wa nthĩ yonthe?
4. No twĩyumye tũtetheesye
Ĩvindanĩ ya tene, athũkũmi ma Yeova nĩmathũkũmaa na kĩthito nĩ kana masũvĩe kũla mathaithĩaa. Ĩndĩ ve maũndũ maingĩ mendekaa eka o kumya mbesa. Somai 2 Mavinda 34:9-11, na ĩndĩ mũineenea ĩkũlyo yĩĩ:
Kĩla Mũisilaeli atetheeisye ata kũsũvĩa nyũmba ya Yeova kana vala mathaithĩaa?
Nĩ kana mwone ũndũ Ngũsĩ sya Yeova iatĩĩaa ngelekanyʼo ĩsu ya tene, ĩloelei VITIO. Na ĩndĩ mũineenea makũlyo aa maatĩĩe:
Nĩkĩ twaĩle kwĩkalasya Nyũmba yitũ ya Ũsumbĩ yĩ ntheu, na yĩ nzũvĩĩku?
We ũtonya kũtetheesya kwa nzĩa ta syĩva?
5. Ana-a-asa no mekĩe kĩthito nĩ kana mavikĩĩe ianda mbingangĩ
Maandĩko nĩmekĩĩte ana-a-asa vinya matate kwĩka kyonthe kĩla matonya nĩ kana matetheesye kĩkundi. Nĩ kana mwone ngelekanyʼo, ĩloelei VITIO. Na ĩndĩ mũineenea ĩkũlyo yĩla yĩatĩĩe.
Kwosana na ũndũ twoona vitionĩ, Ryan eekie ata nĩ kana atetheesye kĩkundi mũnango?
Mbivilia nĩyĩeleetye nguma ila ana-a-asa maĩle kwĩthĩwa nasyo nĩ kana mavikĩĩe kwĩthĩwa atetheesya ma kĩkundi na atumĩa. Somai 1 Timotheo 3:1-13, na ĩndĩ mũineenea makũlyo aa:
Ana-a-asa ala mekwenda kwĩthĩwa me atetheesya ma kĩkundi na atumĩa maĩle kwĩanĩsya maũndũ meva?
Nao nata ĩũlũ wa mĩsyĩ yoo?—Sisya mũsoa wa 4 na 11.
Yĩla ana-a-asa matata methĩwe na nguma isu, kĩla ũmwe nthĩnĩ wa kĩkundi atethekaa ata?
ANDŨ AMWE NO MAKŨLYE: “Ngũsĩ sya Yeova syumasya va mbesa sya kũtetheesya wĩa woo?”
We ũtonya kũsũngĩa ata?
KĨLA TWEEMANYĨSYA
Yeova nũtanaa mũno yĩla woona twĩkĩĩte kĩthito nĩ kana tũtetheesye kĩkundi tũtũmĩĩte ĩvinda yitũ, vinya witũ, na syĩndũ sitũ sya kĩ-mwĩĩ.
Makũlyo ma Kũsyokeleela
Tũtonya kũtũmĩa ĩvinda na vinya witũ ata kũtetheesya kĩkundi?
Tũtonya kũtetheesya kĩkundi ata tũtũmĩĩte syĩndũ sitũ sya kĩ-mwĩĩ?
We ũtonya kwenda kũtetheesya kĩkundi kwa nzĩa ta syĩva?
MAŨNDŨ ANGĨ MA KWĨMANYĨSYA
Soma wone nĩkĩ ũmũnthĩ Ngai ũtendaa athũkũmi make maumye kĩlungu kya ĩkũmi.
“Mbivilia Yaasyaa Ata Ĩũlũ wa Kumya Kĩlungu kya Ĩkũmi?” (Ũvoo wĩ kĩsesenĩ)
Mbivilia nĩnengete aũme ala avatise ianda imwe. Ĩndĩ nao nata ethĩwa aka ala avatise nĩmekwenda kwĩanĩsya ianda isu?
“Kũelewa Ũkũmũ wa Atumĩa Kĩkundinĩ” (Mũsyaĩĩsya, Mwei wa 2, 2021)
Ĩloele vitio wone ũndũ ana-a-asa amwe monanĩtye ũkũmbaũ kwa kwĩyumya vyũ matwaĩe ana-a-asa na eĩtu-a-asa moo mavuku.
Soma wone ũndũ wĩa witũ ũendeeawʼa kwa nzĩa yĩ kĩvathũkanyʼo vyũ na ndĩni ila ingĩ.
“Mbesa sya Kũendeesya Wĩa wa Ngũsĩ sya Yeova Syumaa Va?” (Ũvoo wĩ kĩsesenĩ)