Ĩvuku ya Mbee ya Samũeli
26 Ĩtina wa ĩvinda, aũme ma Nzivu nĩmaendie kũla kwĩ Saũlo kũu Ngivea, mayasya: “We Ndaviti ndevithĩte kalĩmanĩ ka Akila kala kasianĩtye na Yesimoni?”* 2 Kwoou Saũlo nĩwookĩlile na atheea weũnĩ wa Nzivu e na aũme 3,000 manyuvĩtwe kuma Isilaeli nĩ kana akamanthe Ndaviti weũnĩ wa Nzivu. 3 Saũlo nĩwambie kambi kalĩmanĩ ka Akila, kala kasianĩtye na Yesimoni, ũtee wa nzĩa. Ĩvindanĩ yĩu, Ndaviti ekalaa weũnĩ, na nĩwamanyie kana Saũlo aĩ okie weũnĩ amũatĩĩe. 4 Kwoou Ndaviti nĩwatũmie athiani makaĩkĩĩthye kana kwa wʼo Saũlo aĩ okie. 5 Ĩtina, Ndaviti nĩwaendie vala Saũlo wambĩte kambi, na Ndaviti oona vala Saũlo na Avineli mwana wa Neli, mũnene wa ita syake, makomete; Saũlo akomete katĩkatĩ wa kambi athyũlũlũkĩtwe nĩ ita sya asikalĩ. 6 Nĩvo ĩndĩ Ndaviti wakũlilye Aimeleki, ũla waĩ Mũititi, na Avisai mwana wa Nzeluia, mwana-a-inyia wa Yoavu: “Nũũ ũkũtheeanyʼa nakwa kambinĩ kũla kwĩ Saũlo?” Nake Avisai amũsũngĩa: “Nĩngũtheeanyʼa naku.” 7 Kwoou Ndaviti na Avisai mathi ũtukũ nginya vala ita isu sya asikalĩ syaĩ, na meethĩa Saũlo akomete katĩkatĩ wa kambi na ĩtumo yake yĩtonyeewʼe nthĩ vakuvĩ na mũtwe wake; Avineli na ita sya asikalĩ makomete mamũthyũlũkĩte.
8 Nĩvo ĩndĩ Avisai weeie Ndaviti: “Ũmũnthĩ Ngai nĩwanengane mũmaitha waku kwʼokonĩ kwaku. Na yu, mwa eka nĩmũtonye na ĩtumo o ĩvinda yĩmwe nĩmũkwatanyʼe na nthĩ, na ndyĩĩthĩwa na vata wa kwĩka ũu ya kelĩ.” 9 Ĩndĩ Ndaviti eea Avisai: “Ndũkamũũmĩsye, nũndũ nũũ ũtonya kũkĩlĩlya mwĩtĩkĩwʼa mauta wa Yeova kwʼoko kwake na ayĩema kwĩthĩwa na ĩvĩtyo?” 10 Ndaviti aendeeie kwasya: “Vate nzika, o tondũ Yeova wĩ thayũ, Yeova mwene akamũaa, kana mũthenya wake ũkavika na aikwʼa, kana akathi kaũnĩ na aikwʼĩĩa kwʼo. 11 Kwosana na woni wa Yeova, nĩ ũndũ ũtasũanĩĩka nũkĩlĩlye mwĩtĩkĩwʼa mauta wa Yeova kwʼoko kwakwa! Kwoou, mwa yu osa ĩtumo yĩu yĩ vakuvĩ na mũtwe wake na sũva ũsu wa kĩw’ũ, na tũithi.” 12 Nĩvo ĩndĩ Ndaviti woosie ĩtumo yĩu na sũva ũsu wa kĩw’ũ, ila syaĩ vakuvĩ na mũtwe wa Saũlo, na mathi. Vai mũndũ waamona kana akamanya maĩ vau kana akaamũka, nũndũ onthe nĩmakomete, nĩkwĩthĩwa Yeova nĩwatumĩte makwatwa nĩ too mwingĩ. 13 Na ĩndĩ Ndaviti ainga athi ngalĩko ĩla ĩngĩ na aũngama kĩĩmanĩ ĩũlũ vandũ vaasanga, ve na ũasa wĩana ũna katĩkatĩ woo.
14 Ndaviti eetie ita isu vamwe na Avineli mwana wa Neli, na wasya mũnene, ayasya: “Avineli, ndwĩsũngĩa?” Nake Avineli amũsũngĩa: “We nue ũũ ũkwĩta mũsumbĩ?” 15 Ndaviti eeie Avineli: “We ndwĩ mũndũũme? Na nũũ ũilye taku Isilaeli? Kwoou nĩkĩ ũtanaendeea kũsunga mwĩai waku mũsumbĩ? Nĩkwĩthĩwa ve mũsikalĩ ũmwe wũkie kũaa mwĩai waku mũsumbĩ. 16 Kĩla weeka ti kĩseo. Vate nzika, o tondũ Yeova wĩ thayũ, waĩlĩte kũkwʼa, nũndũ ndũnaendeea kũsunga mwĩai waku, mwĩtĩkĩwʼa mauta wa Yeova. Yu sisya kĩla ngalĩko! Yĩĩva ĩtumo ya mũsumbĩ na sũva wa kĩw’ũ, ila syĩĩ vakuvĩ na mũtwe wake?”
17 Nĩvo ĩndĩ Saũlo wamanyie wasya wa Ndaviti na amũkũlya: “Ũsu nĩ wasya waku, mwanawa Ndaviti?” Nake Ndaviti amũsũngĩa: “Nĩ wasya wakwa, mwĩai wakwa mũsumbĩ.” 18 Na Ndaviti ongela kwasya: “Nĩkĩ mwĩai wakwa mũsumbĩ ũsembanĩtye mũthũkũmi wake, nĩ ũndũ wĩva nĩkĩte, na nĩ ĩvĩtyo yĩva nĩ nayo? 19 Mwa mwĩai wakwa mũsumbĩ, ĩthukĩĩsye ndeto sya mũthũkũmi waku: Ethĩwa nĩ Yeova ũtumĩte ũmbũkĩlĩla, eka etĩkĩle* nthembo yakwa ya lĩu. Ĩndĩ ethĩwa nĩ andũ makwĩkĩĩte vinya wĩke ũu, nĩ aumanĩe mbee wa Yeova, nũndũ nĩmandũngĩtye ũmũnthĩ ndikekale ũtiĩwanĩ wa Yeova, mayasya, ‘Enda, ũkathũkũme ngai ingĩ!’ 20 Na yu ndũketĩkĩlye nthakame yakwa yĩtĩke nthĩ vaasa na Yeova, nũndũ mũsumbĩ wa Isilaeli aumaalũkĩte amanthe ngala o ĩmwe, ta ũsembanĩtye ngwae iĩmanĩ.”
21 Nake Saũlo asya: “Nĩnĩkĩte naĩ. Syoka, mwanawa Ndaviti, nũndũ ndikũũmĩsya ĩngĩ, nĩkwĩthĩwa nĩwonie thayũ wakwa wĩ wa vata ũmũnthĩ ũũ. Ĩĩ, nĩkĩte na ũtumanu na ngeka ĩvĩtyo ĩnene mũno.” 22 Ndaviti amũsũngĩie atĩĩ: “Ĩtumo ya mũsumbĩ nĩ yĩĩ. Mwanake ũmwe nĩoke ayose. 23 Yeova nĩwe ũkaĩva kĩla ũmwe nũndũ wa ũlũngalu wake mwene na ũĩkĩĩku wake mwene, nĩkwĩthĩwa ũmũnthĩ Yeova nĩwaũnengane kwʼokonĩ kwakwa, ĩndĩ ndikwendaa kũkĩlĩlya mwĩtĩkĩwʼa mauta wa Yeova kwʼoko kwakwa. 24 Sisya! O tondũ ũmũnthĩ thayũ waku weethĩwa wĩ wa vata kwakwa, o ta ũu thayũ wakwa nĩwĩthĩwe wĩ wa vata methonĩ ma Yeova, na nĩambonokye kuma mathĩnanĩ onthe.” 25 Saũlo asũngĩie Ndaviti amwĩa atĩĩ: “Athimwa, mwanawa Ndaviti. Vate nzika, ũkeeka maũndũ manene, na vate nzika ũkaendeea nesa.” Na ĩndĩ Ndaviti eeyĩendea, na Saũlo asyoka mũsyĩ.