Kwosana na Maliko
15 Na o mĩtũkĩ kũkilyĩ kũkya, anene ma athembi vamwe na atumĩa na aandĩki, ũu nĩ kwasya Nzama yonthe ya Ayuti, yasamana na mamwova Yesũ na mamũtwaa na mamũnengane kwa Vilato. 2 Kwoou Vilato amũkũlya: “We nue Mũsumbĩ wa Ayuti?” Nake amũsũngĩa: “We mwene nĩwaneena.” 3 Ĩndĩ anene ma athembi nĩmamũsikatĩe maũndũ maingĩ. 4 Vilato ambĩĩa kũmũkũlya atĩĩ: “Ndwĩ na ũndũ ũtonya kũsũngĩa? Kwoona ũndũ maũndũ ala meũkũsikatĩa maingĩvĩte.” 5 Ĩndĩ Yesũ ndaasũngĩa ĩngĩ, na kwoou Vilato asengʼa.
6 Kĩla ĩvinda ya mboka, Vilato nĩwamathaĩasya mwovwa ũmwe, o ũla meetya. 7 Na ĩvinda yĩu vaĩ mũndũ ũmwe weetawa Valava ũla waĩ mwove e na andũ angĩ maleanaa na ũsumbĩ, na nĩmooaanĩte ĩvinda yĩla maleanaa na ũsumbĩ. 8 Kwoou ĩkomano yooka na yambĩĩa kwĩtya kĩla yĩkwenda kwosana na ũndũ Vilato wamanyĩĩte kũyĩka. 9 Nake ayĩsũngĩa, ayĩa: “Nĩmũkwenda nĩmũthaĩsye Mũsumbĩ wa Ayuti?” 10 Nũndũ Vilato nĩweesĩ kana anene ma athembi mamũnenganĩte kwake nũndũ wa kĩwĩu. 11 Ĩndĩ anene ma athembi na atumĩa mathingʼĩĩsya ĩkomano yasye yĩthaĩwʼe Valava vandũ vake. 12 Na Vilato amakũlya ĩngĩ: “Mwĩenda nĩkane ata na ũla mũmwĩtaa Mũsumbĩ wa Ayuti?” 13 Namo maneena ĩngĩ na wasya mũnene: “Akoaĩwe mũtĩnĩ!” 14 Ĩndĩ Vilato amakũlya: “Nĩkĩ? Ekĩte ĩvĩtyo yaũ?” Namo maendeea kũneena na wasya mũnene mũno, makyasya: “Akoaĩwe mũtĩnĩ!” 15 Vilato eewʼa ũu, nũndũ nĩwendaa kwendeesya ĩkomano, ayĩthaĩsya Valava; na asya Yesũ akũnwe ivoko, na ĩndĩ amũnengane akoaĩwe mũtĩnĩ.
16 Na ĩndĩ asikalĩ mamũtwaa nyũmba kwa ngavana vau nza, na moombanyʼa ita syonthe sya asikalĩ vamwe. 17 Na mamwĩkĩa ngũa ya langi wa nzambalaũ, na maseũvya ngovia ya mĩwʼa na mamwĩkĩa; 18 na mambĩĩa kũneena na wasya mũnene, maimwĩa: “Ũvoo waku, Mũsumbĩ wa Ayuti!” 19 O na ĩngĩ, nĩmamũkũnaa mũtwe na mũangi na maimũtwʼĩlanga mata, o na nĩmatulilye ndu na kũmũkumanĩa. 20 Na mũthya, mamina kũmũthekeea, mamumya ĩla ngũa ya langi wa nzambalaũ na mamwĩkĩa ngũa syake sya ĩũlũ. Na mamũtwaa makamũathĩĩe mũtĩnĩ. 21 O na nĩmamũlasimĩthisye mũndũ ũmwe wavĩtĩte aumĩte mĩũndanĩ, nake eetawa Simoni kuma Kulene, ĩthe wa Alekisanda na Luvusi, amũkuĩe mũtĩ * wa mathĩna.
22 Kwoou mamũtwaa vandũ veetawa Kolokotha, na ũalyũlo wayo nĩ, “Vandũ va Kĩngʼala.” 23 Me vau nĩmatatie kũmũnenga mbinyu ĩvulanĩtwʼe na manemane, ĩndĩ ndaamĩnywʼa. 24 Na mamũathĩĩa mũtĩnĩ na maaana ngũa syake sya ĩũlũ kwa kũkũna kula nĩ kana mamanye kĩla ũmwe eosa yĩkũ. 25 Ĩvinda yĩu kwaĩ ta saa itatũ, * na mamũathĩĩa mũtĩnĩ. 26 Na ũandĩko ũla wawetete kĩla wasikatĩwe waĩtye: “Mũsumbĩ wa Ayuti.” 27 O na ũtee wake vaĩ ingʼei ilĩ, kĩla kĩmwe mũtĩnĩ wakyo, kĩmwe kwʼokonĩ kwake kwa aũme na kĩla kĩngĩ kwʼokonĩ kwake kwa aka. 28* —— 29 Na ala mesĩlaa vau mamũneeneaa naĩ, makĩthingithya mĩtwe yoo na kwasya: “A! We ũla ũnaĩ wanange ĩkalũ na kũyaka na mĩthenya ĩtatũ, 30 ĩtangĩĩe mwene kwa kuma mũtĩnĩ * wa mathĩna.” 31 O ta ũu, o namo anene ma athembi na aandĩki mambĩĩa kũmũthekeea, mayĩana atĩĩ: “Nĩwatangĩĩe angĩ; ĩndĩ ndatonya kwĩtangĩĩa mwene! 32 Eka yu Klĩsto, Mũsumbĩ wa Isilaeli, aume mũtĩnĩ * wa mathĩna nĩ kana twone na tũyĩĩkĩĩa.” O na ala maĩ mĩtĩnĩ ũtee wake nĩmamũneeneaa naĩ.
33 Yĩla saa sita syavikie, * nĩkwethĩiwe kĩvindu nthĩ ĩsu yonthe nginya ta saa kenda. * 34 Na saa kenda, Yesũ aneena na wasya mũnene, akyasya: “Eli, Eli, lama savakathani?” na ũalyũlo wayo nĩ, “Ngai wakwa, Ngai wakwa, ũndekee kĩ?” 35 Na amwe ala maũngamĩte vau vakuvĩ, yĩla meewie ũu, mambĩĩa kwasya: “Sisyai! Eĩta Eliya.” 36 Na mũndũ ũmwe asemba, ainda sivongyi mbinyunĩ ngaatu, amĩtonyeesya mũanginĩ, na amũnenga anywʼe, akyasya: “Ekanai nake! Ekai twone kana Eliya nũkũka kũmumya.” 37 Ĩndĩ Yesũ aneena na wasya mũnene, na akwʼa. * 38 Na vasia wa vala vandũ vatheu watembũkanĩla katĩ, kuma ĩũlũ kũvika nthĩ. 39 Na yĩla mũnene wa asikalĩ ũla waũngeme amũsyaĩtye woonie maũndũ ala meekĩka aikwʼa, asya atĩĩ: “Nĩ wʼo mũndũ ũũ eĩ Mwana wa Ngai.”
40 Na vaĩ aka masyaĩĩsye me kũasa, amwe katĩ woo nĩ Meli Makatalene, o na Meli inyia wa Yakovo * na Yose, na Salome, 41 ala maendanasya na Yesũ na kũmũthũkũma yĩla waĩ Kalilii, na aka angĩ aingĩ ala mookĩte vamwe nake Yelusaleme.
42 Na kwaĩ kũnavika ĩ ya mawĩoo, na nũndũ waĩ mũthenya wa Kwĩyũmbanyʼa, kana mũthenya ũla waĩ mbee wa Savato, 43 vooka Yosevu wa kuma Alimathia, mũndũ wanengetwe ndaĩa wa ĩla Nzama, ũla o nake mwene weeteele Ũsumbĩ wa Ngai. Nĩwaendie mbee wa Vilato e na ũkũmbaũ, na eetya mwĩĩ wa Yesũ. 44 Ĩndĩ Vilato enda kũmanya kana Yesũ nũkwie, na kwoou eeta mũnene wa asikalĩ na amũkũlya kana Yesũ nũkwie. 45 Na ĩtina wa kũmanya nesa kuma vala ve mũnene wa asikalĩ, amũnenga Yosevu mwĩĩ wa Yesũ. 46 Ĩtina wa kũthooa kĩtambaa kĩseo kya katane na kũmumya mũtĩnĩ, amwova na kĩtambaa kĩu kĩseo na amwia mbũanĩ ĩla yenzĩtwe ĩvianĩ; na ĩndĩ avingilitya ĩvia nginya mũomonĩ wa mbũa. 47 Ĩndĩ Meli Makatalene na Meli inyia wa Yose maendeea kũsyaĩĩsya vala waiĩtwe.