Kũtũngĩlĩĩlwa kwa Mĩao

27 Nĩvo ĩndĩ Mose vamwe na atumĩa ma Isilaeli meeaĩe andũ, maimea atĩĩ: “Atĩĩai kĩla mwĩao ngũmũnenga ũmũnthĩ. 2 Na mũthenya ũla mwĩinga Yolotani mũlike nthĩ ĩla Yeova Ngai wenyu ũkũmũnenga, mwĩvanga mavia manene na mũimakandĩka.* 3 Na ĩndĩ mwamina kũinga mũkaandĩka ndeto syonthe sya Mĩao ĩĩ ĩũlũ wamo, nĩ kana mũtonye kũlika nthĩ ĩla Yeova Ngai wenyu ũkũmũnenga, nthĩ yusũĩte ĩia na ũkĩ wa nzũkĩ o tondũ Yeova, Ngai wa aa-ũmae menyu, ũmwathĩte. 4 Mwainga Yolotani mwaĩlĩte kũvanga mavia asu Kĩĩmanĩ kya Evali na mũimakandĩka,* o tondũ ngũmwĩaĩa ũmũnthĩ. 5 O na ĩngĩ, mũkaakĩa Yeova Ngai wenyu kĩthembeo, kĩthembeo kya mavia. Mũyaĩlĩte kũtũmĩa mĩio ya kyũma* kũmatila. 6 Mwaĩlĩte kwaka kĩthembeo kĩu kya Yeova Ngai wenyu na mavia mate matile na mũyumĩsya Yeova Ngai wenyu nthembo sya kũvĩvwʼa ĩũlũ wakyo. 7 Mũkaumya nthembo sya ngwatanĩo na mũiya nthembo isu mwĩ vau, na mũkatana mbee wa Yeova Ngai wenyu. 8 Na mũiandĩka nesa ndeto syonthe sya Mĩao ĩĩ mavianĩ asu.”

9 Nĩvo ĩndĩ Mose na athembi Alivai maneenie na Aisilaeli onthe, mayasya atĩĩ: “Vindyai na mũyĩthukĩĩsya, inywʼĩ Aisilaeli. Ũmũnthĩ nĩmwatwʼĩka andũ ma Yeova Ngai wenyu. 10 No nginya mwĩthukĩĩsye wasya wa Yeova Ngai wenyu na mũyĩka kwosana na mĩao yake na myolooto yake, ĩla ngũmwĩaĩa ũmũnthĩ.”

11 Mũthenya ũsu Mose eeaĩe andũ, ayasya: 12 “Mbaĩ ii iatĩĩe ikaũngama Kĩĩmanĩ kya Ngelisimu iathime andũ mwainga Yolotani: Simeoni, Livai, Yuta, Isakali, Yosevu, na Mbenyamini. 13 Nasyo ii iatĩĩe ikaũngama Kĩĩmanĩ kya Evali itangaase kĩumo: Leũveni, Ngati, Aseli, Nzevuluni, Ndani, na Navitali. 14 Na Alivai makasũngĩa kĩla Mũisilaeli ũũ na wasya mũnene:

15 “‘Nĩ mũumanĩe mũndũ ũla ũseũvasya mũvwʼanano mwasũvye kana wa kyũma,* kĩndũ kĩla nĩ ũthatyo kwa Yeova, wĩa wa moko ma vundi,* na akaũvitha.’ (Na andũ onthe makasũngĩa mayasya, ‘Ameni!’*)

16 “‘Nĩ mũumanĩe mũndũ ũla ũvũthasya ĩthe kana inyia.’ (Na andũ onthe makasya, ‘Ameni!’)

17 “‘Nĩ mũumanĩe mũndũ ũla ũkũĩĩasya mũvaka wa mũtũi wake.’ (Na andũ onthe makasya, ‘Ameni!’)

18 “‘Nĩ mũumanĩe mũndũ ũla ũtumaa kĩlalinda kĩvĩtya nzĩa.’ (Na andũ onthe makasya, ‘Ameni!’)

19 “‘Nĩ mũumanĩe mũndũ ũla welelũkasya sila wa katĩ aisilĩla mwĩkali wa ũeninĩ, mwana ũte ĩthe,* kana mũndũ mũka ndiwa.’ (Na andũ onthe makasya, ‘Ameni!’)

20 “‘Nĩ mũumanĩe mũndũ ũla ũkomaa na kĩveti kya ĩthe wake, nũndũ nĩwavũthya ĩthe wake.’* (Na andũ onthe makasya, ‘Ameni!’)

21 “‘Nĩ mũumanĩe mũndũ ũla ũkomaa na nyamũ o na yĩva.’ (Na andũ onthe makasya, ‘Ameni!’)

22 “‘Nĩ mũumanĩe mũndũ ũla ũkomaa na mwĩĩtu masyaanĩwʼe, mwĩĩtu wa ĩthe wake kana mwĩĩtu wa inyia wake.’ (Na andũ onthe makasya, ‘Ameni!’)

23 “‘Nĩ mũumanĩe mũndũ ũla ũkomaa na inyia wa mũka.’ (Na andũ onthe makasya, ‘Ameni!’)

24 “‘Nĩ mũumanĩe mũndũ ũla woveeasya na ayũaa mũtũi wake.’ (Na andũ onthe makasya, ‘Ameni!’)

25 “‘Nĩ mũumanĩe mũndũ ũla wĩtĩkĩlaa ĩvaki nĩ kana oae* mũndũ ũte ĩvĩtyo.’* (Na andũ onthe makasya, ‘Ameni!’)

26 “‘Nĩ mũumanĩe mũndũ ũla ũtakaatĩĩaa ndeto sya Mĩao ĩĩ kwa kwĩka kwosana nasyo.’ (Na andũ onthe makasya, ‘Ameni!’)