Kwosana na Mathayo
16 Na Avalisi na Asatukai mooka vala ũĩ nĩ kana mamũtate, na mamũkũlya amonyʼe kyama kuma ĩtunĩ. 2 Nake amasũngĩa, amea: “Yĩla kwambĩĩa kũtuka mwaasya kana nzeve ĩkeethĩwa nzeo nũndũ yayaya nĩ ĩtune, 3 na kwakya, mũkyasya, ‘Kwĩĩthĩwa kwĩ mbevo na mbua nũndũ yayaya nĩ ĩtune na nĩ ĩtuku.’ Nĩmwĩsĩ kũvathũkanyʼa ũndũ yayaya yĩkwĩthĩwa yĩilye, ĩndĩ mũyĩsĩ kũvathũkanyʼa mavinda. 4 Inywʼĩ nzyawa nthũku na yusĩe ũlaalai, * mũendeee kũkũlya nĩmwonyʼe kyama, ĩndĩ vaiĩ kyama mũkona ate o kĩla kya Yona.” Na amina kũneena ũu akwata nzĩa athi amatia.
5 Na amanyĩwʼa mainga mũingo ũla ũngĩ na moolwa nĩ kũkua mĩkate. 6 Na Yesũ amea: “Ĩkalai mwĩ metho na mũyĩsũvĩana na ĩlawa ya Avalisi na Asatukai.” 7 Kwoou mambĩĩa kũneenanyʼa ene kwa ene, makyasya: “Tũinakua mũkate o na ũmwe.” 8 Yĩla Yesũ wamanyie ũu, asya: “Nĩkĩ mũũneena ĩũlũ wa mĩkate, inywʼĩ mwĩ na mũĩkĩĩo mũnini? 9 O na yu mũinesa kũelewa, kana mũyĩũlilikana ĩla mĩkate ĩtano ĩvinda ya ala andũ 5,000 na ikavũ ila mwoosanisye? 10 Kana ĩla mĩkate mũonza ĩvinda ya ala andũ 4,000 na ikavũ nene * ila mwoosanisye? 11 Nĩkĩ mũte kũmanya kana ndinaneena nenyu ĩũlũ wa mĩkate? Ĩndĩ nĩmwĩa mwĩsũvĩane na ĩlawa ya Avalisi na Asatukai.” 12 Nĩvo ĩndĩ maeleiwe kana ameaa mesũvĩane na ũmanyĩsyo wa Avalisi na Asatukai, ĩndĩ ti ĩlawa ya mĩkate.
13 Yĩla mavikie kĩsionĩ kya Kaisalea ya Vilivu, Yesũ nĩwakũlilye amanyĩwʼa make ũũ: “Andũ measya Mwana wa mũndũ nũũ?” 14 Namo masya: “Amwe measya nĩ Yoana Mũvatisi, angĩ measya nĩ Eliya, namo angĩ measya nĩ Yelemia, kana ũmwe wa athani.” 15 Nake amea: “Inywʼĩ nenyu mwĩasya ninyie ũũ?” 16 Simoni Vetelo asũngĩa, asya: “We nue Klĩsto, Mwana wa Ngai ũla wĩ thayũ.” 17 Nake Yesũ amwĩa: “Wĩ mũathime we Simoni mwana wa Yona, nũndũ mwĩĩ na nthakame * ti syo syakũvuanĩsya ũu, ĩndĩ nĩ Asa wakwa ũla wĩ ĩtunĩ.” 18 O na nĩngũkwĩa atĩĩ: “We nue Vetelo, na ĩvianĩ yĩĩ ngaaka kĩkundi kyakwa, na mĩvĩa ya Mbũa * ndĩkakĩkĩlya vinya. 19 Ngaũnenga mbungũo sya Ũsumbĩ wa ĩtu, na kĩla ũkova ĩũlũ wa nthĩ kĩkeethĩwa kĩkyove ĩtunĩ, na kĩla wĩthasya ĩũlũ wa nthĩ kĩkeethĩwa kĩkĩthasye ĩtunĩ.” 20 Na ĩndĩ akanyʼa amanyĩwʼa kwa ũito na amea maikatavye mũndũ kana nĩwe Klĩsto.
21 Kuma ĩvinda yĩu na kũendeea, Yesũ nĩwambĩĩie kũelesya amanyĩwʼa make kana no nginya athi Yelusaleme na aikwatwa nĩ mathĩna maingĩ maumanĩte na atumĩa na anene ma athembi na aandĩki na ayũawa, na mũthenya wa katatũ aithayũũkwʼa. 22 Na Vetelo amwosa na amũtwaa vandũ ũtee na ambĩĩa kũmũkanyʼa, aimwĩa: “Ĩyĩwʼĩe tei, Mwĩaĩi; ũndũ ũsu ndwĩsa kũũkwata.” 23 Ĩndĩ eethyũũa amwonyʼa Vetelo mũongo na amwĩa: “Thi ĩtina wakwa, Satani! Wĩ kĩndũ kya kũlulutĩkya kwakwa, nũndũ mosũanĩo maku nĩ ma andũ, ĩndĩ ti ma Ngai.”
24 Na Yesũ amea amanyĩwʼa make: “Ethĩwa mũndũ o na wĩva nũkwenda kũngatĩĩa, nĩ elee mwene, na aikua mũtĩ wake wa mathĩna * na ayĩendeea kũngatĩĩa. 25 Nũndũ mũndũ o na wĩva ũla wendaa kũtangĩĩa thayũ wake akawasya, ĩndĩ mũndũ o na wĩva ũla waasya thayũ wake kwondũ wakwa akaũkwata. 26 Kwa wʼo, mũndũ atonya kũunĩka ata o na akakwata nthĩ yonthe ĩndĩ ayasya thayũ wake? Kana mũndũ atonya kũnengane kyaũ atũngĩwe thayũ wake? 27 Nũndũ Mwana wa mũndũ akooka ũtheunĩ mũtisu wa Asa wake e na alaĩka make, na akaĩva kĩla ũmwe kwosana na mwĩkalĩle wake. 28 Nĩ wʼo nĩngũmwĩa kana ve amwe maũngamĩte vaa matakasama kĩkwʼũ nongi nginya mambe kwona Mwana wa mũndũ ayũka Ũsumbĩnĩ wake.”