Kwosana na Yoana
21 Ĩtina wa maũndũ asu, Yesũ nĩweeyumĩlilye ĩngĩ kwa amanyĩwʼa, Ũkanganĩ wa Tivelia. Kweethĩiwe ũũ ĩvinda ya kwĩyumĩlya kwake. 2 Simoni Vetelo, Thoma (ũla weetawa Ĩvatha), Nathanaeli kuma Kena ya Kalilii, ana ma Sevetii, na amanyĩwʼa angĩ make elĩ maĩ vamwe. 3 Na Simoni Vetelo amea: “Nyie nĩngũthi kũtea makũyũ.” Namo mamwĩa: “Nĩtũũthi naku.” Na mathi malika ĩsiwanĩ, * ĩndĩ ũtukũ ũsu mayaakwatya kĩndũ.
4 Ĩndĩ kũikya, Yesũ nĩwaũngamie ũtee wa ũkanga, ĩndĩ amanyĩwʼa mayaamanya kana nĩ Yesũ. 5 Na ĩndĩ Yesũ amakũlya: “Syana, mwĩ na kĩndũ mũya?” Namo mamũsũngĩa: “Aiee!” 6 Nake amea: “Ĩkyai kĩtei * kĩwʼũnĩ ngalĩ ya kwʼoko kwa aũme kwa ĩsiwa na nĩmũũkwatya kĩndũ.” Kwoou mekya kĩtei kĩwʼũnĩ, ĩndĩ maemwa nĩ kũkĩkusya nũndũ kyaĩ na makũyũ maingĩ mũno. 7 Na ĩndĩ mũmanyĩwʼa ũla wendetwe nĩ Yesũ amwĩa Vetelo: “Nĩ Mwĩaĩi!” Na Simoni Vetelo eewʼa kana nĩ Mwĩaĩi, eekĩa ngũa yake ya ĩũlũ, nũndũ aĩ mũthei, * na eeyĩkya ũkanganĩ. 8 Ĩndĩ amanyĩwʼa ala angĩ mooka me ĩsiwanĩ, makusĩtye kĩla kĩtei kyusĩe makũyũ, na mayaĩ vaasa na nthĩ nyũmũ, nũndũ yaĩ ta vuti 300 * kuma vala maĩ.
9 Yĩla mavikie ũtee wa ũkanga, nĩmoonie mĩkate na makũyũ mailĩĩlwe mwakinĩ wa makaa. 10 Na Yesũ amea: “Etei makũyũ amwe katĩ wa ala mwakwatya oyu.” 11 Kwoou Simoni Vetelo athi alika ĩsiwanĩ na akusya kĩla kĩtei na akĩia ũtee wa kĩwʼũ, na kyausĩe makũyũ manene 153. Na o na maingĩvĩte ũu, kĩtei kĩu kĩyaatembũka. 12 Na Yesũ amea: “Ũkai mũye lĩu wa kwakya.” Ĩndĩ vaiĩ ũmwe wa amanyĩwʼa asu waĩ na ũkũmbaũ wa kũmũkũlya: “We nue ũũ?” nũndũ nĩmeesĩ nĩ Mwĩaĩi. 13 Na Yesũ oosa ĩla mĩkate amanenga, na amanenga makũyũ o namo. 14 Na yĩĩ nĩyo yaĩ ĩvinda ya katatũ ya Yesũ kũmaumĩlĩĩla amanyĩwʼa ĩtina wa kũthayũũkwʼa.
15 Na mamina kũya lĩu wa kwakya, Yesũ amũkũlya Simoni Vetelo: “Simoni mwana wa Yoana, we nũmbendete kwĩ aa?” Nake amũsũngĩa: “Ĩĩ, Mwĩaĩi, we nĩwĩsĩ nĩngwendete.” Yesũ amwĩa: “Ĩthya tũlondu twakwa.” 16 Na amũkũlya ĩngĩ ya kelĩ: “Simoni mwana wa Yoana, we nũmbendete?” Nake amũsũngĩa: “Ĩĩ, Mwĩaĩi, we nĩwĩsĩ nĩngwendete.” Yesũ amwĩa: “Ĩthya tũlondu twakwa.” 17 Na amũkũlya ya katatũ: “Simoni mwana wa Yoana, we nũmbendete?” Na Vetelo akwatwa nĩ kyeva nũndũ wa Yesũ kũmũkũlya ya katatũ: “We nũmbendete?” Kwoou amwĩa: “Mwĩaĩi, we nĩwĩsĩ maũndũ onthe; nĩwĩsĩ kana nĩngwendete.” Yesũ amwĩa: “Ĩthya tũlondu twakwa. 18 Nĩũtavya wʼo ki kana, yĩla waĩ mũnini nĩweekĩaa ngũa na ũithi kũla ũkwenda. Ĩndĩ yĩla wĩkũa, ũkatambũũkasya moko maku na mũndũ ũngĩ aikwĩkĩa ngũa na aikũtwaa kũla ũte kwenda.” 19 Aneenie ũu nĩ kana onanyʼe Vetelo aĩ amũtaĩe Ngai kwĩsĩla kĩkwʼũ kĩilye ata. Ĩtina wa kwasya ũu, amwĩa: “Endeea kũngatĩĩa.”
20 Na Vetelo eethyũũa na oona ũla mũmanyĩwʼa Yesũ wendete amaatĩĩe, ũla ĩvinda ya kyaũya kya wĩoo wamwaĩĩie Yesũ kĩthũinĩ na amũkũlya: “Mwĩaĩi, nũũ ũla ũkũũvũnyanĩa?” 21 Yĩla Vetelo wamwonie, amũkũlya Yesũ: “Mwĩaĩi, nao nata ĩũlũ wa mũndũ ũũ?” 22 Nake Yesũ amwĩa: “Ngenda ekale nginya yĩla nĩũka, ũu ũkũkonetye ata? Endeea kũngatĩĩa.” 23 Kwoou ndeto isu syanyaĩĩka katĩ wa ana-a-asa, makyasya kana mũmanyĩwʼa ũsu ndakakwʼa, ĩndĩ Yesũ ndaasya kana mũmanyĩwʼa ũsu ndakakwʼa, we aisye: “Ngenda ekale nginya yĩla nĩũka, ũu ũkũkonetye ata?”
24 Mũmanyĩwʼa ũũ nĩwe wumĩtye ũkũsĩ ĩũlũ wa maũndũ aa, na nĩwe ũandĩkĩte maũndũ aa, na nĩtwĩsĩ kana ũkũsĩ wake nĩ wa wʼo.
25 Kwa wʼo, ve maũndũ angĩ maingĩ ala Yesũ weekie, na onthe makaandĩkwa, nĩona o na nthĩ ndĩanĩa mavuku ma kũkũnzwa ala maandĩkwa.