Yesũ Nĩwaumĩlĩĩile Amanyĩwʼa Make Ũtee wa Ũkanga wa Kalilii

Ũtukũ wa mũthya yĩla Yesũ waĩ vamwe na atũmwa make, ameie atĩĩ: “Ĩtina wa kũthayũũkwʼa, ngathi mbee wenyu Kalilii.” (Mathayo 26:32; 28:7, 10) Aingĩ ma aatĩĩi ma Yesũ nĩmaendie Kalilii, ĩndĩ mo maendete ku kwĩka ata?

Mũthenya ũmwe me Kalilii, Vetelo eeie atũmwa thanthatũ atĩĩ: “Nyie nĩngũthi kũtea makũyũ.” Namo mamwĩa: “Nĩtũũthi naku.” (Yoana 21:3) Ĩndĩ mateie makũyũ ũtukũ wʼonthe na vai kĩndũ maakwatya. Kũkilyĩ kũkya, Yesũ nĩwookie ũtee wa ũkanga ĩndĩ mayaamũmanya. Yesũ amakũlilye-ĩ: “Syana, mwĩ na kĩndũ mũya?” Namo mamũsũngĩa: “Aiee!” Nake Yesũ amea atĩĩ: “Ĩkyai kĩtei kĩwʼũnĩ ngalĩ ya kwʼoko kwa aũme kwa ĩsiwa na nĩmũũkwatya kĩndũ.” (Yoana 21:5, 6) Yĩla mekisye kĩtei kĩwʼũnĩ, makwatisye makũyũ maingĩ mũno nginya maemwa nĩ kũkĩkusya kuma kĩwʼũnĩ.

Ũndũ ũsu watumie Yoana atavya Vetelo atĩĩ: “Nĩ Mwĩaĩi!” (Yoana 21:7) Na Vetelo eewʼa kana nĩ Mwĩaĩi, eekĩa ngũa yake ya ĩũlũ na mĩtũkĩ nũndũ aĩ amyumisye. Ĩtina wa ũu nĩweeyĩkisye ũkanganĩ na athambĩa vakuvĩ mita 90 elekele ũtee wa ũkanga. Atũmwa ala angĩ mamũatĩĩie o kavola makusĩtye kĩla kĩtei kyausĩe makũyũ.

Yĩla mavikie ũtee wa ũkanga, moonie “mĩkate na makũyũ mailĩĩlwe mwakinĩ wa makaa.” Yesũ ameie-ĩ: “Etei makũyũ amwe katĩ wa ala mwakwatya oyu.” Kwoou Vetelo nĩwaendie alika ĩsiwanĩ na akusya kĩla kĩtei kyausĩe makũyũ manene 153! Ĩtina wa ũu, Yesũ eeie atũmwa atĩĩ: “Ũkai mũye lĩu wa kwakya.” Vai ũmwe waĩ na ũkũmbaũ wa kũmũkũlya, “We nue ũũ?” nũndũ nĩmeesĩ kana nĩ Yesũ. (Yoana 21:9-12) Yĩĩ nĩyo yaĩ ĩvinda yake ya katatũ kũmaumĩlĩĩla amanyĩwʼa me vamwe.

Yesũ nĩwanengie atũmwa mĩkate na makũyũ maye. Ĩtina wa ũu, Yesũ asyaisye makũyũ maingĩ ala makwatĩtwʼe na ĩndĩ akũlya Vetelo atĩĩ: “Simoni mwana wa Yoana, we nũmbendete kwĩ aa?” Yesũ endaa kũmanya kana Vetelo nĩwendete wĩa wa kũtea makũyũ mbee wa wĩa ũla Yesũ wendaa atethye. Mũtũmwa Vetelo amũsũngĩie ata? Amwĩie-ĩ: “Ĩĩ, Mwĩaĩi, we nĩwĩsĩ nĩngwendete.” Yĩla wasũngĩie ũu Yesũ amwĩie: “Ĩthya tũlondu twakwa.”—Yoana 21:15.

Yesũ asyokie akũlya Vetelo atĩĩ: “Simoni mwana wa Yoana, we nũmbendete?” Nĩvatonyeka Vetelo akethĩwa asengʼie nĩkĩ Yesũ wamũkũlya ũu ĩvinda ya kelĩ, ĩndĩ amũsũngĩa amwĩa: “Ĩĩ, Mwĩaĩi, we nĩwĩsĩ nĩngwendete.” Yesũ amwĩie o ũndũ wamwĩĩte mbeenĩ: “Ĩthya tũlondu twakwa.”—Yoana 21:16.

Yesũ nĩwamũkũlilye Vetelo ĩngĩ o yĩla ĩkũlyo wamũkũlĩtye mavinda elĩ. Amũkũlilye atĩĩ: “Simoni mwana wa Yoana, we nũmbendete?” No nginya Vetelo ethĩwe ambĩĩie kwona Yesũ ta ũte kũmũĩkĩĩa, na kwoou akwatwa nĩ kyeva na amũsũngĩa Yesũ amwĩa atĩĩ: “Mwĩaĩi, we nĩwĩsĩ maũndũ onthe; nĩwĩsĩ kana nĩngwendete.” Yesũ asyokeleeile kũmũtavya o ũndũ wamũtavĩtye ĩtina wa kũmũkũlya ĩkũlyo yĩu ĩvinda ya mbee na ya kelĩ. Amwĩie: “Ĩthya tũlondu twakwa.” (Yoana 21:17) Ndeto isu sya Yesũ syoonanasya kana ala matongoetye ikundinĩ maĩle kũĩthya nesa ĩĩthya ya Ngai.

Yesũ nĩwasyokie atavya Vetelo ũndũ ũngĩ nĩ kana Vetelo amanye ũndũ ũkakwʼa. Mĩthenya mĩvũthũ mĩvĩtu, Yesũ aĩ anakwatwa nĩ asikalĩ na akoawa nũndũ wa kwĩka wĩa ũla Ngai wamũtavĩtye eke. Ndeto ila watavisye Vetelo syoonanasya kana o nake akakwʼa oou. Amwĩie atĩĩ: “Yĩla waĩ mũnini nĩweekĩaa ngũa na ũithi kũla ũkwenda. Ĩndĩ yĩla wĩkũa, ũkatambũũkasya moko maku na mũndũ ũngĩ aikwĩkĩa ngũa na aikũtwaa kũla ũte kwenda.” Ĩndĩ o na ũu wĩ o vo Yesũ amwĩie Vetelo atĩĩ: “Endeea kũngatĩĩa.”—Yoana 21:18, 19.

Vetelo amina kũtavwʼa ndeto isu, amũsyaisye mũtũmwa Yoana na amũkũlya Yesũ atĩĩ: “Mwĩaĩi, nao nata ĩũlũ wa mũndũ ũũ?” Vetelo endaa kũmanya nĩ maũndũ meva makamũkwata mũtũmwa ũla Yesũ wendete mũno. Yesũ amũsũngĩie amwĩa: “Ngenda ekale nginya yĩla nĩũka, ũu ũkũkonetye ata?” (Yoana 21:21-23) Vetelo aaĩle kũendeea kũmũatĩĩa Yesũ ate kũthĩnĩka ĩũlũ wa maũndũ ala mesaa kũkwata atũmwa ala angĩ. O na ũu wĩ o vo, Yesũ endaa Vetelo amanye kana Yoana akekala ĩvinda yĩasa kwĩ atũmwa ala angĩ, na kana akoonwʼa woni wa Yesũ e Mũsumbĩ Ũsumbĩnĩ wa Ngai.

Kwa wʼo, ve maũndũ maingĩ Yesũ weekie, na kethĩwa onthe nĩmaandĩkiwe, vai mavuku ma kũkũnzwa matonya kwĩanĩa maũndũ asu.