Ĩvuku ya Mbee ya Samũeli
2 Nĩvo ĩndĩ Aana wavoyie asya atĩĩ:
“Ngoo yakwa nĩkũtana nthĩnĩ wa Yeova;
Ũvya* wakwa nĩwũkĩlĩtwʼe nĩ Yeova.
Kanywʼa wakwa nĩwathamĩtye vyũ ũsũngĩe amaitha makwa,
Nũndũ nĩnĩtanĩaa mekonĩ maku ma ũtangĩĩo.
2 Vai ũngĩ mũtheu ta Yeova,
Vai ũngĩ eka we,
Na vai ĩvia ta Ngai witũ.
3 Ndũkaendeee kũneena na mĩngʼathĩlĩĩlyo;
Ũndũ o na wĩva wĩ na mĩyimbyo ndũkaume kanywʼanĩ waku,
Nũndũ Yeova nĩ Ngai wa ũmanyi,
Na we nũthimaa meko onthe nesa vyũ.
4 Mbũta sya aũme ngũmbaũ nitũlangawa,
Ĩndĩ ala meũlulutĩka nĩmalũlũmĩĩlawʼa.
5 Ala maĩthĩtwʼe nesa no nginya maandĩkwe nĩ kana makwate mũkate,
Ĩndĩ ala me na nzaa mai na nzaa ĩngĩ.
Mũndũ mũka ngũngũ nũsyaĩte ana mũonza,
Ĩndĩ mũndũ mũka ũla ũnaĩ na ana aingĩ atiĩtwe e weka.*
7 Yeova nũtwʼĩkĩthasya mũndũ ngya, na nũthuasya;
Nũtheeasya, na nĩwũkĩlasya.
8 Nĩwũkĩlasya mũthĩni kuma kĩtoonĩ;
Nĩwũkĩlasya ala ngya kuma kĩvumbunĩ kya mũu,*
Nĩ kana amekalye vamwe na anene me mbee ũsumbĩnĩ,
Amanenge kĩvĩla kya ndaĩa.
Ituĩ sya nthĩ nĩ sya Yeova,
Na ailĩĩlaa nthĩ ĩla ĩsyaaa ĩũlũ wasyo.
9 Nũsũvĩaa matambya ma ala malũmanasya nake,
Ĩndĩ athũku makavindĩthwʼa kĩvindunĩ,
Nũndũ mũndũ ndasindaa nũndũ wa vinya wake.
Yeova akasilĩla nginya mĩthya ya nthĩ,
Akanenga mũsumbĩ wake vinya
Na akookĩlya ũvya* wa mwĩtĩkĩwʼa mauta wake.”
11 Na ĩndĩ Elikana enũka mũsyĩ kwake Lama, ĩndĩ kamwana kau katwʼĩka mũthũkũmi wa* Yeova mbee wa mũthembi Eli.
12 Yu ana ma Eli maĩ aũme athũku; mayamũnengae Yeova ndaĩa. 13 Ũũ nĩwʼo meekanaa na kĩla andũ maumya kyaĩlĩte kũnengwa athembi: Kĩla ĩvinda mũndũ o na wĩva waumya nthembo, yĩla nyama ĩtheũkĩte, mũthũkũmi wa mũthembi ookaa akwete ũma wĩ na maeo atatũ, 14 na ayĩũlikya na vinya kalaĩnĩ, mbisũnĩ ya kũua yĩ na moko elĩ, ĩsilianĩ, kana mbisũnĩ ya kũua yĩ na kwʼoko kũmwe. Mũthembi eeyoseaa nyama o na yĩva ĩla yatonywa nĩ ũma ũsu. Ũu nĩwʼo meekanaa na Aisilaeli onthe ala mookaa kũu Silo. 15 O na ĩngĩ, o na mũndũ ũla ũkumasya nthembo atanamba kũtuma mathunya matoa, mũthũkũmi wa mũthembi ookaa na aimwĩa atĩĩ: “Nenga mũthembi nyama akavĩvye. Ndeosa nyama ĩla ntheũkye kuma kwaku, ĩndĩ eosa o ĩla ĩte mbue.” 16 Yĩla mũndũ ũsu wamwĩa atĩĩ: “Eka vambe kũĩkĩĩthwʼa kana mathunya nĩmatoa, na ĩndĩ ũyĩyosea kĩla ũkwenda,”* amwĩaa atĩĩ: “Aiee, nenge oyu; waema kwĩka ũu, nĩĩyosea na vinya!” 17 Kwoou naĩ ya athũkũmi asu nĩyeethĩiwe yĩ nene mũno mbee wa Yeova, nũndũ aũme asu mayanengae nthembo ya Yeova ndaĩa.
18 Yu Samũeli athũkũmaa mbee wa Yeova, ekĩĩte* evoti ya katane, o na kau aĩ o kamwana. 19 O na ĩngĩ, inyia wake amũtumĩaa kakoti kate moko, na aimũetee ko kĩla mwaka yĩla wookanyʼa na mũũme kumya nthembo ya kĩla mwaka. 20 Na Eli aathima Elikana na mũka wake, ayasya atĩĩ: “Yeova nakũnenge mwana kuma kĩvetinĩ kĩĩ ose mwanya wa ũla wanengiwe Yeova.” Na masyoka mũsyĩ. 21 Na Yeova amũlilikana Aana, nĩ kana atonye kũitava; na asyaa ana angĩ atatũ na eĩtu elĩ. Na kamwana Samũeli kaendeea kwĩana mbee wa Yeova.
22 Yu Eli aĩ mũkũũ mũno, ĩndĩ nĩweewʼĩte maũndũ onthe ala ana make meekaa Aisilaeli onthe na ũndũ makomaa na aka ala mathũkũmaa mũomonĩ wa ĩeema ya kũmbanĩa. 23 Akothaa kũmea: “Nĩkĩ mũendeee kwĩka maũndũ mailye ũu? Nũndũ maũndũ ala ngwĩwʼa ĩũlũ wenyu kuma andũnĩ onthe nĩ mathũku. 24 Aiee, ana makwa, ũvoo ũla ngwĩwʼa ũendeee kũnyaĩĩka katĩ wa andũ ma Yeova ti mũseo. 25 Ethĩwa mũndũ nĩwavĩtĩsya mũndũ ũngĩ, mũndũ no amwĩsũvanĩe vala ve Yeova;* ĩndĩ ethĩwa mũndũ nĩwavĩtĩsya Yeova, nũũ ũtonya kũmũvoyea?” Ĩndĩ nĩmaleile kwĩthukĩĩsya ĩthe woo, nũndũ Yeova nĩwatwʼĩte kũmoaa. 26 Ĩvindanĩ o yĩu, kamwana Samũeli nĩkaendeeie kwĩana na kwona ũseo methonĩ ma Yeova na ma andũ.
27 Mũndũ wa Ngai nĩwookie kũla kwĩ Eli na amwĩa atĩĩ: “Ũũ nĩwʼo Yeova ũkwasya: ‘Nyie ndyaaĩyonanyʼa ũtheinĩ kũla kwĩ nyũmba ya ĩthe waku yĩla maĩ ngombo Misili nyũmbanĩ ya Valao? 28 Na anyuviwe kuma mbaĩnĩ syonthe sya Isilaeli nĩ kana athũkũmae e mũthembi wakwa na nĩ kana ambatae kĩthembeonĩ kyakwa aumye nthembo, aumye ũvumba,* na ayĩkĩa evoti mbee wakwa; na nĩnanengie nyũmba ya ũmae waku nthembo syonthe ivĩvĩtwʼe na mwaki sya Aisilaeli.* 29 Nĩkĩ inywʼĩ aũme mũvũthasya* nthembo syakwa na mĩthĩnzĩo yakwa ĩla nĩyĩaĩte yumawʼe wĩkalonĩ wakwa? Nĩkĩ mũendeeaa kũnenga ana menyu ndaĩa kwĩ inyie kwa kwĩnosya na ilungu ila nzeo vyũ sya kĩla nthembo yaumwʼa nĩ andũ makwa Isilaeli?
30 “‘Nĩkyo kĩtumi ndeto ya Yeova Ngai wa Isilaeli yaĩtye atĩĩ: “Nĩwʼo naisye kana nyũmba yaku na nyũmba ya ũmae waku ĩkaendaa mavinda onthe mbee wakwa.” Ĩndĩ yu Yeova easya: “A vakwa, ũu ndwĩendeea kwĩthĩwa, nũndũ ala manengae ndaĩa ngamanenga ndaĩa, ĩndĩ ala mambũthasya makavũthwʼa.” 31 Sisya! Mĩthenya nĩyũkĩte yĩla ngatila vinya waku* na wa nyũmba ya ĩthe waku, wĩthĩe vai mũndũũme o na ũmwe nyũmbanĩ yaku ũkekala thayũ nginya atumĩe. 32 Na ũkasisya mũmaitha wĩkalonĩ wakwa katĩ wa maũndũ onthe maseo ala mekĩtwe Isilaeli, na vaikesa kwĩthĩwa ĩngĩ mũndũũme mũkũũ nyũmbanĩ yaku. 33 Mũndũũme waku ũla ndakatila aeke kũthũkũma kĩthembeonĩ kyakwa akatuma metho maku mathela vinya na akakũetee kyeva,* ĩndĩ andũ ala aingĩ nyũmbanĩ yaku makooawa na ũvyũ wa andũ. 34 Na kĩla kĩkakwata ana maku elĩ, Ovini na Vineasi, kĩkeethĩwa wonanyʼo kwaku: Elĩ makakwʼa mũthenya ũmwe. 35 Nĩvo ĩndĩ ngeyũkĩlĩlya mũthembi mũĩkĩĩku. Akeekaa kwosana na wendi wa ngoo yakwa;* na ngamwakĩa nyũmba ya ĩvinda yonthe, na akaendaa mbee wa mwĩtĩkĩwʼa mauta wakwa mavinda onthe. 36 Mũndũ o na wĩva ũla ũkatiala nyũmbanĩ yaku akooka na aimũkumanĩa nĩ kana aĩvwe mbesa na ainengwa mũkate, na akasya atĩĩ: “Mwa nĩngũkwĩsũva, ũnenge wĩa ũmwe wa ũthembi, nĩ kana nĩĩsae kalungu ka mũkate.”’”