Ĩvuku ya Kelĩ ya Asumbĩ

6 Na ĩndĩ ana ma athani meea Elisa atĩĩ: “Sisya! Vandũ vaa tũkwĩkala twĩ naku nĩ vanini mũno kwitũ. 2 Nĩtũũkwĩsũva ũtũeke tũthi Yolotani. Na eka kĩla ũmwe witũ ose kĩting’ĩ kuma vau nĩ kana tũseũvye vandũ tũtonya kũtũa.” Nake amea: “Endai.” 3 Na ũmwe woo asya: “Mwa no ũendanyʼe naitũ athũkũmi maku?” Nake asya: “Nĩtũkũendanyʼa.” 4 Na kwoou aendanyʼa namo, na mavika Yolotani na mambĩĩa kũtema mĩtĩ. 5 Na ĩndĩ ũmwe woo aitema mũtĩ, ĩthoka yake yauma na yavota kĩwʼũnĩ, na akaya ũũ na wasya mũnene: “Ĩiaa, vwana wakwa, yĩĩ ya ngwatyo!” 6 Na mũndũ wa Ngai ũla wa wʼo akũlya: “Yavotela va?” Na amwonyʼa vala yavotela. Na ĩndĩ mũndũ wa Ngai ũla wa w’o atila kĩlungu kya mũtĩ na akĩkya vo na atuma yĩthambalala. 7 Na kwoou amwĩa: “Yose.” Nake atambũũkya kwʼoko kwake na ayosa.

8 Yu ĩndĩ, mũsumbĩ wa Silia nĩwaumaalile okite na Isilaeli. Na aoanyʼa na athũkũmi make na asya: “Twĩthi vandũ vana twambe maeema vau nĩ nenyu.” 9 Na ĩndĩ mũndũ wa Ngai ũla wa wʼo atũmana vala ve mũsumbĩ wa Isilaeli, ayasya: “Ĩthĩwa wĩ metho na ndũkesĩle vaa, nũndũ vau nĩ vo Asilia matheeete.” 10 Na kwoou mũsumbĩ wa Isilaeli atũmana vala ve andũ make, ala maĩ vala vandũ ũla mũndũ wa Ngai ũla wa wʼo wamũkanĩtye ĩũlũ wavo. Na aendeea kũmũkanyʼa, nake aendeea kwĩsũvĩa mavinda kauta* ndakavathengeee.

11 Ũndũ ũsu nĩwathatisye mũsumbĩ* wa Silia mũno, na nũndũ wa ũu, eeta athũkũmi make na amea: “Ndavyei! Nũũ katĩ witũ wĩ ngalĩ ya mũsumbĩ wa Isilaeli?” 12 Na ũmwe wa athũkũmi make asya: “Vai ũmwe witũ wĩkĩte ũu, mwĩai wakwa mũsumbĩ! Ĩndĩ Elisa mwathani wa Isilaeli nĩwe ũtavasya mũsumbĩ wa Isilaeli maũndũ ala waneena wĩ nyũmbanĩ yaku ya kũkoma.” 13 Nĩvo ĩndĩ waisye: “Endai mũmũmanthe vala ũĩ, nĩ kana nĩtũme aũme mamũkwate.” Na ĩtina eewa atĩĩ: “E Ndothani.” 14 Na ndatĩkanĩ ĩsu atwaa mbalasi na makasya ma kaũ vau, o vamwe na nguthu nene ya asikalĩ; namo mathi ndũanĩ ĩsu na ũtukũ na mamĩthyũlũlũka.

15 Yĩla mũthũkũmi wa mũndũ wa Ngai ũla wa wʼo wookĩlile kwakya tene na aumaala, nĩwoonie nguthu ya asikalĩ yĩ na mbalasi na makasya ma kaũ ĩthyũlũlũkĩte ndũa ĩsu. Na vau kwa vau mũthũkũmi ũsu asya: “Asi, vwana wakwa! Yu twĩĩka ata?” 16 Ĩndĩ asya: “Ndũkakĩe! Nĩkwĩthĩwa ala me naitũ nĩ aingĩ kwĩ ala me namo.” 17 Na ĩndĩ Elisa ambĩĩa kũvoya, ayasya: “Ame Yeova, nĩngũkwĩsũva ũsalukye metho make nĩ kana one.” Na vau kwa vau Yeova asalukya metho ma mũthũkũmi wake na oona kĩla kyaendeee. Na sisya! kĩsio kĩu kĩ iĩma kyausũĩte mbalasi sya mwaki na makasya ma kaũ ma mwaki kũthyũlũlũka Elisa.

18 Na yĩla Asilia matheeie vala ve Elisa, amũvoya Yeova, ayasya: “Nĩngũkwĩsũva ũkũne mbaĩ ĩno na mbindu.” Na kwoou amakũna na mbindu, o tondũ Elisa wavoyete. 19 Na ĩndĩ Elisa amea: “Ĩĩ ti yo nzĩa ĩla mwaĩle kũatĩĩa, na ĩno ti yo ndũa ĩla mũkwenda. Mbatĩĩei, na nĩngũmwonyʼa mũndũ ũla mũũmantha.” Ĩndĩ amatwaa Samalia.

20 Na yĩla mavikie Samalia, Elisa asya: “Ame Yeova, salukya metho moo nĩ kana mone.” Na kwoou Yeova asalukya metho moo, na meethĩa kana maĩ Samalia katĩ. 21 Na yĩla mũsumbĩ wa Isilaeli wamonie, eea Elisa: “Nĩmoae, nĩmoae, Asa wakwa?” 22 Ĩndĩ Elisa asya: “Ndũkatate kũmoaa. We nĩwũaaa ala woosa ta mũtavo ũtũmĩĩte ũvyũ waku na ũta waku? Manenge mũkate na kĩwʼũ maye na mainywʼa na maisyoka vala ve mwĩai woo.” 23 Na kwoou amombanĩsya kyathĩ kĩnene, namo maya na manywʼa, na ĩtina wa ũu, amaeka masyoka kũla kwĩ mwĩai woo. Na vai ĩvinda yĩngĩ o na yĩva nguthu ya avenani ya Asilia yaalika ĩngĩ nthĩ ya Isilaeli.

24 Ĩtina wa maũndũ asu, Mbeni-atati mũsumbĩ wa Silia nĩwoombanisye ita syake* syonthe vamwe na ambata na athyũlũlũka Samalia. 25 Na nũndũ wa ũu, kweethĩwa yũa yingĩ Samalia, na maendeea kũmĩthyũlũlũka nginya weethĩa mũtwe wa ĩng’oi wĩthoowʼa ilungu 80 sya vetha, na kĩlungu kya kana kya kĩthimo kya kavi* kya mai ma ĩvũĩ kĩthoowʼa ilungu 5 sya vetha. 26 Na mũsumbĩ wa Isilaeli esĩlĩte ĩũlũ ũkũtanĩ wa ndũa ĩsu, mũndũ mũka amwĩkaĩla, ayasya: “Ame mwĩai wakwa mũsumbĩ, tũtethye!” 27 Nake asya: “Ethĩwa Yeova ndeũkũtethya, nyie nĩumya ũtethyo va kwondũ waku? Nĩwumya kĩvũĩonĩ? Kana nĩwumya kĩangĩonĩ kya mbinyu kana kya mauta?” 28 Na mũsumbĩ amũkũlya: “Wĩ na thĩna mwaũ?” Nake amũsũngĩa: “Mũndũ mũka ũũ anambĩie, ‘Ete mwana waku tũmũye ũmũnthĩ, na ũnĩ tũkaya mwana wakwa.’ 29 Na kwoou twatheũkya mwana wakwa na twamũya. Na ũnĩ wake namwĩa, ‘Ete mwana waku nĩ kana tũmũye.’ Ĩndĩ amũvitha.”

30 Yĩla mũsumbĩ weewie ndeto sya mũndũ mũka ũsu oou, nĩwatembũie ngũa syake. Na avĩtĩlĩte ũkũtanĩ ĩũlũ, andũ mamũsisya na moona kana eekĩĩte ngũa ya ĩkunia ungu wa ngũa syake.* 31 Na ĩndĩ asya: “Ngai nandetee ũkũno mũnene na ayĩka ũu o na mbeange ethĩwa mũtwe wa Elisa mwana wa Savati nũũtiwa ĩũlũ wake ũmũnthĩ!”

32 Ĩvindanĩ yĩu, Elisa ailyĩ nthĩ nyũmbanĩ yake, na atumĩa mekalĩte nthĩ vamwe nake. Na mũsumbĩ atũma mũndũũme mbee wake, ĩndĩ mũndũ ũsu atanavika, Elisa eea atumĩa asu atĩĩ: “Inywʼĩ nĩmwene kana mwana ũsu wa mũaani atũmanĩte nĩtilwe mũtwe? Ĩkalai mwĩtũĩĩe mũndũ ũsu aivika, na avika vingai mũomo na mũiũkwatĩĩa wĩthĩe ndalika. Mo matuu ma mwĩai wake mai ĩtina wake?” 33 Na Elisa aendeee kũneena namo, mũndũ ũsu avika vala ũĩ, na mũsumbĩ asya: “Yeova nĩwe ũetete mũisyo ũũ. Ve vata mwaũ nĩendeee kũmweteela Yeova?”