Kwĩyumya vyũ mũtwaanonĩ no kũelekanwʼe na nanga. Kwĩka ũu kũtumaa mũtwaano wenyu ũendeea kwĩthĩwa wĩ mũlũmu o na mwakomana na mathĩna maito
KWONDŨ WA ALA MATWAANĨTE
1 Kwĩyumya Vyũ
ŨU NĨ KWASYA ATA?
Aũme na aka ala meyumĩtye vyũ mĩtwaanonĩ yoo mamyonaa ĩtaĩlĩte kũthela. Ũndũ ũsu ũtumaa mewʼa me eanĩe. Kĩla ũmwe ethĩawa esĩ nesa kana o na vakesa kumĩla mathĩna mũtwaanonĩ woo, ũla ũngĩ ndesa kũmũtia.
Amwe ala matwaanĩte maemawa nĩ kũthasya mĩtwaano yoo nũndũ wa kũkĩa anyanyae moo na andũ ma mũsyĩ. Ĩndĩ ũndũ ũla wa vata waĩle kũtuma maendeea kwĩkalanyʼa ĩmwe nĩ kwĩthĩwa mendanĩte na manenganĩte ndaĩa.
MWOLOOTO WĨ MBIVILIANĨ: “Mũndũũme o nake ndaĩle kũtia mũka wake.”—1 Akolintho 7:11.
“Ethĩwa nĩwĩyumĩtye vyũ mũtwaanonĩ waku, ndũkathataa mĩtũkĩ yĩla wavĩtĩwʼa. Ũkethĩawa wĩyũmbanĩtye kũekea na kwĩtya ũekeo. Ĩthĩawa na woni ũla waĩle wakomana na mathĩna vandũ va kũmonaa ta kĩtumi kya kwĩsa kũthasya mũtwaano waku.”—Micah.
NĨKĨ NĨ ŨNDŨ WA VATA?
Ala mateyumĩtye vyũ mĩtwaanonĩ yoo makomana na mathĩna, nĩ laisi mũno kwasya, ‘Tũyaaĩlanĩte’ na mayambĩĩa kũmantha itumi sya kũthasya mũtwaano woo.
“Andũ aingĩ malikaa mũtwaanonĩ o mesĩ kana mesa kũkomana na mathĩna, makathasya mũtwaano ũsu. Yĩla andũ matwaana maisũanĩa makathasya mũtwaano woo mathĩna maumĩla, mayĩthĩawa meyumĩtye vyũ mũtwaanonĩ ũsu kuma mwambĩĩonĩ.”—Jean.
ŨNDŨ ŨTONYA KWĨKA
ĨYĨOSYE
Yĩla mwaemanwa . . .
We nĩwĩsaa kwĩwʼa ũyĩlila nũndũ wa ũla ũtwaanĩte nake?
Nũsũanĩaa ũtwaĩte kana ũkatwawa nĩ mũndũ ũngĩ?
Nũwetaa ndeto ta “Nĩngũũtia” kana “Nĩngũmantha mũndũ ũngĩ ũmbendete”?
Weethĩa ve ĩkũlyo wasũngĩa ĩĩ, manya kana yĩĩ nĩyo ĩvinda ya kwĩlũlũmĩĩlya mũtwaanonĩ waku.
NEENEA MAKŨLYO AA WĨ NA ŨLA ŨTWAANĨTE NAKE
Nĩtwĩyumĩtye vyũ mũtwaanonĩ witũ ta tene? Ethĩwa ti wʼo, nĩkĩ?
Nĩ maũndũ meva tũtonya kwĩka yu makalũlũmĩĩlya mũtwaano witũ?
MAŨNDŨ MATONYA KŨŨTETHEESYA
Mavinda kwa mavinda, mũandĩkĩae ũla ũtwaanĩte nake ndeto syĩkwonanyʼa nũmwendete
Onanyʼa nĩwĩyumĩtye vyũ mũtwaanonĩ waku kwa kwia visa ya ũla ũtwaanĩte nake vandũ yenekee, vala ũthũkũmĩaa
Kũnĩaa ũla ũtwaanĩte nake simũ kĩla mũthenya wĩ wĩanĩ kana ũte vakuvĩ nake
MWOLOOTO WĨ MBIVILIANĨ: “Kĩla Ngai ũlũmanĩtye vamwe, mũndũ ndakakĩtaananyʼe.”—Mathayo 19:6.