MOSŨNGĨO MA MAKŨLYO MA MBIVILIA

Yo Mbivilia nĩ Ndeto ya Ngai?

Ndeto ya Ngai yaĩlĩte kwĩthĩwa yĩ ya mwanya, na ũu now’o Mbivilia yĩilyĩ. Mbivilia mbilioni mbingĩ nitumbĩthĩtw’e kwa ithyomo maana maingĩ. Ũtao ũla wĩ Mbivilianĩ nĩwĩthĩawa na ũtonyi wa kũalyũla mĩkalĩle ya andũ ĩkaseũva.—Soma 1 Athesalonika 2:13; 2 Timotheo 3:16.

Nĩtwĩsĩ kana Mbivilia nĩ Ndeto ya Ngai nũndũ wathani wayo ndũleaa kwĩanĩa. Vai mũndũ ũtonya kumya wathani kwa ũtonyi wake na ũkeanĩa. Kwa ngelekany’o, sũanĩa ĩvuku ya Isaia. Ũvoo ũla waandĩkiwe ĩvukunĩ yĩla yaĩ ya mbee waumĩĩiw’e ĩvukunĩ yĩngĩ ĩkũnze mbee wa myaka 100 Yesũ ate mũsyae. Ĩvuku yĩu ĩkũnze yesie kwoneka ngunganĩ ĩmwe yĩ vakuvĩ na Ũkanga wa Mũnyũ. Ĩvuku yĩu yaĩtye kana mũsyĩ wa Mbaviloni ũkatiwa ta ĩanzo. Ũndũ ũsu weanĩie myaka mingĩ ĩtina wa ũtavany’a wa Yesũ vaa nthĩ.—Soma Isaia 13:19, 20; 2 Vetelo 1:20, 21.

Mbivilia yaandĩkiwe ata?

Mbivilia yaandĩkiwe vandũ va myaka ta 1,600. Andũ ta 40 ala maandĩkie Mbivilia maandĩkie ĩũlũ wa ũndũ ũmwe mateũvĩngana. Ũu watonyekie ata? Watonyekie nũndũ Ngai nĩwamatongoesye.—Soma 2 Samueli 23:2.

Mavinda amwe Ngai nĩwaneenaa na aandĩki ma Mbivilia kwĩsĩla alaĩka, woni, kana ndoto. Ngai eekĩaa ũvoo wake ilĩkonĩ sya aandĩki asu, na ĩndĩ aimaeka manyuve ndeto ila meũtũmĩa.—Soma Ũvuan’yo 1:1; 21:3-5.

Nĩ kana ũkwate ũvoo mwingangĩ, sisya kĩlungu kya 2 kya ĩvuku yĩĩ yĩla yĩtumbĩthĩtw’e nĩ Ngũsĩ sya Yeova

O na no ũyĩkwate kĩsesenĩ kya www.jw.org/kam