KYONGO KYA ĨTHANGŨ YA MBEE | WE NGAI NĨWENDEEAW’A NUE?
Ngai Nũkũeleawa
“Ame Yeova, nĩwĩnguũĩte, na ũkamanya nyie.”—SAVULI 139:1.
“Metho maku nĩmoonie ndanombĩka.”—SAVULI 139:16“Metho maku nĩmoonie ndanombĩka.”—SAVULI 139:16
KĨLA KĨTUMAA AMWE METHĨWA NA NZIKA: Andũ aingĩ mesilasya kana Ngai amonaa me eki ma naĩ, mate atheu, na Ngai atesa kwendeew’a nĩmo. Mũndũ mũka ũmwe wĩtawa Kendra, ũla wakw’ĩte ngoo ũkethĩa ũsu watw’ĩka ũwau, eew’aa e mũndũ mũthũku mũno nũndũ ndaĩ atonya kwĩanĩsya kwenda kwa Ngai. Na nũndũ wa ũu aĩtye: “Nĩnaekie kũvoya.”
KĨLA NDETO YA NGAI ĨMANYĨASYA: Yeova ndonaa o mawonzu maku, nũeleawa nesa vyũ ũndũ ũilyĩ. Mbivilia yaĩtye ũũ: “Nĩwĩsĩ wũmbe witũ; nũlilikanaa kana twĩ kĩtoo.” Ĩndĩ ũndũ ũla wa vata nĩ kana, we ndatũkuaa “kwĩanana na naĩ sitũ,” vandũ va ũu nũtwĩw’ĩaa tei na aitũekea ĩla tweelila.—Savuli 103:10, 14.
Kwasũanĩa ĩũlũ wa Ndaviti, ũla waĩ mũsumbĩ wa Isilaeli, na ũla ũwetetwe kĩlungunĩ kya mbee. Ndaviti aisye ũũ aivoya Ngai: “Metho maku nĩmoonie ndanombĩka; na ĩvukunĩ yaku mamutha nĩmaandĩkĩtwe onthe . . . Nthiana, ame Ngai, na manya ngoo yakwa.” (Savuli 139:16, 23) Kwoou, ndeto isu syĩonany’a kana Ndaviti aĩ na mũĩkĩĩo vyũ kana Yeova nĩwoonaa ũndũ weelilaa kuma ngoonĩ ĩla wavĩtya, o na ĩla weeka naĩ ngito.
Yeova nũkũeleawa nesa vyũ mbee wa mũndũ o na wĩva. Mbivilia yaĩtye: “Mũndũ asiasya mũvw’anĩle wa ũtheinĩ, ĩndĩ Yeova asiasya ngoonĩ.” (1 Samueli 16:7) Ngai nĩwĩsĩ kĩla kĩtumaa wĩka maũndũ mana. Nĩwĩsĩ wĩthĩawa ũilyĩ ũndũ ũilyĩ nũndũ wa ũndũ wasyaiwe ũilyĩ, ũndũ weanie, na vala weanĩie. O na nĩwonaa kĩthito kyaku kya kũtata ũalyũke kĩ kya vata o na kau nĩwĩkaa mavĩtyo.
Ĩndĩ Ngai atũmĩaa ata ũmanyi wake ĩũlũ waku nĩ kana aũkiakisye?