MOSŨNGĨO MA MAKŨLYO MA MBIVILIA
We Ngai no atũekee naĩ sitũ?
[Ũvoo ĩũlũ wa visa ĩthangũnĩ ya 32]
Mbivilia yaĩtye kana kĩla mũndũ nĩwĩkaa naĩ. Twatiĩwe naĩ nĩ mũndũ wa mbee, Atamu. Nĩkyo kĩtumi mavinda amwe twĩkaa maũndũ na ĩtina tũyĩsa kwĩlila. Mwana wa Ngai, Yesũ Klĩsto, nĩwakwie kwondũ wa naĩ sitũ. Ngai no atũekee nũndũ wa nthembo ya Yesũ ya wovosyo. Ũsu nĩ mũthĩnzĩo kuma kwa Ngai.—Soma Alomi 3:23, 24.
Andũ amwe nĩmekĩte naĩ ngito na monaa Ngai ta ũtesa kũmaekea. Ĩndĩ Ndeto ya Ngai yaĩtye ũũ: ‘Nthakame ya Yesũ Mwana wake nĩtũtheasya naĩ syonthe.’ (1 Yoana 1:7) Yeova nũekeaa o na naĩ ila ngito ethĩwa mũndũ nĩweelila kuma ngoonĩ.—Soma Isaia 1:18.
Twaĩle kwĩka ata nĩ kana tũekewe?
Ethĩwa nĩtũkwenda Yeova atũekee, twaĩle kũmanya ũndũ wĩkaa maũndũ, na kĩla wendaa twĩke. (Yoana 17:3) Yeova nũekeaa vyũ ala melilaa na mayĩalyũka.—Soma Meko ma Atũmwa 3:19.
Kwĩka maũndũ ala matonya kũtuma Yeova atwĩtĩkĩla ti ũndũ wĩ vinya. Yeova nĩwĩsĩ mawonzu maitũ na e tei. Nũndũ wa ũseo wake wĩ wendo, we tyo wende kwĩmanyĩsya ũndũ ũtonya kũmwendeesya?—Soma Savuli 103:13, 14.