KYONGO KYA ĨTHANGŨ YA MBEE
Ũndũ Ũtonya Kwĩka Ĩla Mũndũ Wendete Wakwʼa
“Ngai ekaa nesa mavinda onthe. . . . Eka . . . kũĩa.”
Mũndũ mũka ũmwe wĩtawa Bebe nĩwe wataviwʼe ndeto isu na kĩwe e mathikonĩ ma ĩthe wake ũla wakwie kumana na mũisyo wa lelũnĩ.
Bebe nĩwendete ĩthe wake mũno. Ataviwʼe ndeto isu nĩ mũndũ maĩ ndũũ, ĩndĩ ndeto isu syeekie kũmũũmĩsya vandũ va kũmũkiakisya. Atindĩaa kwasya ũũ ngoonĩ yake, “Ĩthe wakwa ndanaaĩle kũkwʼa.” Ĩtina wa myaka yĩana ũndũ mũna, Bebe nĩwaeleisye ũndũ ũsu ĩvukunĩ, na maelesyo make moonanyʼa kana aĩ o na kyeva.
O tondũ Bebe wesie kũmanya, mũndũ nũkuaa ĩvinda yĩasa e na kyeva, na mũno mũno ethĩwa ũla ũkwʼĩĩwe nũnendete ũla ũnakwie. Mbivilia nĩeleetye nesa kana kĩkwʼũ nĩkyo “mũmaitha wa mũminũkĩlyo.” (1 Akolintho 15:26) Kĩkwʼũ kyũkaa tũtataĩĩe na vai mũndũ wĩsa kũkĩsiĩĩa, nĩkĩminaa andũ ala twendete. Vai mũndũ ũtonya kwĩsianĩa na kyeva kĩla kĩkwataa mũndũ ĩtina wa kũkwʼĩĩwa. Kwoou, ti ũsengyʼo kwĩthĩwa na kyeva kingĩ ĩla wakwʼĩĩwa.
No wĩthĩwe wĩkũlasya: ‘Mũndũ akwʼĩĩwa atonya kwĩthĩwa na kyeva ĩvinda yĩana ata? Mũndũ atonya ata kũmĩanĩsya na kyeva? Ndonya ata kũmakiakisya ala makwʼĩĩwe? Ve wĩkwatyo kwa andũ ala makwie?’