Ũwʼo Ĩũlũ wa Ũsumbĩ wa Ngai
Yesũ amanyĩisye amanyĩwʼa make mavoyae atĩĩ: “Asa waitũ ũla wĩ ĩtunĩ, ĩsyĩtwa yaku yĩtaĩwe. Ũsumbĩ waku wũke. Kwenda kwaku kwĩke kũũ nthĩ o ta kũya ĩtunĩ.” (Mathayo 6:9, 10) Ũsumbĩ wa Ngai nĩ kyaũ? Kĩeleelo kya Ũsumbĩ ũsu nĩ kĩva? Na nĩkĩ twaĩlĩte kũvoya ĩũlũ wa Ũsumbĩ ũsu?
Yesũ nĩwe Mũsumbĩ wa Ũsumbĩ wa Ngai.
Luka 1:31-33: “Ũkaketa Yesũ. Ũsu akeethĩwa e mũnene na akeetwa Mwana wa Ũla wĩ Ĩũlũ wa Onthe, na Yeova Ngai akamũnenga kĩvĩla kya ũsumbĩ kya Ndaviti ĩthe wake, na akasumbĩka e Mũsumbĩ ĩũlũ wa nyũmba ya Yakovo tene na tene, na Ũsumbĩ wake ndũkethĩwa na mũminũkĩlyo.”
Ũndũ ũla mũnene Yesũ watavanasya nĩ Ũsumbĩ wa Ngai.
Mathayo 9:35: “Yesũ alika ndũanĩ syonthe na motũinĩ, aimanyĩsya masinakokenĩ na kũtavanyʼa ũvoo mũseo wa Ũsumbĩ, o vamwe na kũvosya mĩthemba yonthe ya ũwau na mĩthemba yonthe ya mawonzu.”
Yesũ nĩwatavisye amanyĩwʼa make maũndũ ala mesaa kwĩkĩka mamatetheesye kũmanya kana Ũsumbĩ wa Ngai wĩ vakuvĩ kũka.
Mathayo 24:7: “Nũndũ mbaĩ ĩkookĩlĩla mbaĩ na ũsumbĩ ũkookĩlĩla ũsumbĩ, na kũkeethĩwa ũnyivu wa lĩu na ithingitho sya nthĩ kũũ na kũũ.”
Ũmũnthĩ amanyĩwʼa ma Yesũ matavanasya ĩũlũ wa Ũsumbĩ wa Ngai nthĩ yonthe.
Mathayo 24:14: “Na ũvoo ũũ mũseo wa Ũsumbĩ ũkatavanwʼa nthĩ yonthe wĩthĩwe ũkũsĩ kwa mbaĩ syonthe, na ĩndĩ mũthya ũivika.”