Itumi Ĩkũmi na Ilĩ sya Kũtavanyʼa

Nĩkĩ tũtavanasya na kũmanyĩsya ũvoo mũseo? Kyo kĩtumi kĩla kĩnene nĩ kũtetheesya andũ ala me na ngoo nzeo mesĩle nzĩanĩ ĩla ĩelete thayũnĩ? (Mt. 7:14) Kĩu nĩkyo kĩtumi kya mbee kĩla kĩwetetwe vaa ĩtheo, ĩndĩ ti kyo kĩnene. We wĩona nĩ kĩtumi kĩva kya vata vyũ kya kũtavanyʼa katĩ wa itumi ii 12?

1. Kũtavanyʼa kũtetheeasya kũtangĩĩa mathayũ.​—Yoa. 17:3.

2. Kũtetheeasya nthĩnĩ wa kũkanyʼa ala athũku.​—Esek. 3:18, 19.

3. Kũtetheeasya nthĩnĩ wa kwĩanĩwʼa kwa wathani wa Mbivilia.​—Mt. 24:14.

4. Kwonanasya ũlũngalu wa Ngai. Vaiĩ mũndũ ũtonya kwasya kana Yeova ndaanenga andũ athũku mwanya wa kũalyũla ngoo mbee wa kũmananga.​—Meko 17:30, 31; 1 Tim. 2:3, 4.

5. Kũtũnengae mwanya wa kũĩva thiĩ witũ wa kũtetheesya andũ kĩveva, ala mathooetwe na nthakame ya Yesũ.​—Alo. 1:14, 15.

6. Kũtumaa nthakame ya andũ ĩtethĩwa ĩũlũ witũ.​—Meko 20:26, 27.

7. Nĩ ũndũ twaĩle kwĩka nĩ kana tũtangĩĩwe.​—Esek. 3:19; Alo. 10:9, 10.

8. Kwonanasya nĩtwendete atũi.​—Mt. 22:39.

9. Kwonanasya nĩtũmwĩwʼaa Yeova na Mwana wake.​—Mt. 28:19, 20.

10. Nĩ kĩlungu kĩmwe kya ũthaithi witũ.​—Aevl. 13:15.

11. Kwonanasya nĩtũmwendete Ngai.​—1 Yoa. 5:3.

12. Kũtetheeasya nthĩnĩ wa kũtaĩwa kwa syĩtwa ya Yeova.​—Isa. 43:10-12; Mt. 6:9.

Nĩ wʼo kana tũitavanasya nũndũ wa itumi isu syoka. Kwa ngelekanyʼo, kũtavanyʼa nĩkũlũlũmĩĩlasya mũĩkĩĩo witũ na kũitũnenga mwanya wa kwĩthĩwa twĩ atethya ma wĩa vamwe na Ngai. (1 Ako. 3:9) Ĩndĩ, kĩtumi kĩla kĩnene vyũ kya kũtavanyʼa nĩ namba 12. Andũ methĩwe nĩmeũtwĩthukĩĩsya kana nĩmeũlea, kũtavanyʼa kũtetheeasya nthĩnĩ wa kũtaĩwa kwa syĩtwa ya Ngai na kũtumaa Yeova amũsũngĩa ũla ũmũvũthasya. (Nth. 27:11) Vate nzika, twĩ na itumi nzeo vyũ sya kũendeea “kũmanyĩsya na kũtavanʼya ũvoo mũseo.”​—Meko 5:42.